ރާއްޖޭގެ ސިޔާސީ މަޞްރަޙުގައި ހިނގަމުންދާ ކަންކަމުގެ ޞައްޙަ މަޢުލޫމާތު ބޭރުގެ ދައުލަތްތަކަށް ދެއްވުމަށް، ދެވަޒީރަކު ޝްރީލަންކާގައި މިހާރު މަސައްކަތްތަކެއް ކުރައްވަމުން އެބަގެންދަވައެވެ. މިގޮތުން މިދަތުރުފުޅުގައި ބައިވެރިވެވަޑައިގަންނަވާ ޚާރިޖީ ވަޒީރު ދުންޔާ މައުމޫނާއި، ފިޝަރީޒް މިނިސްޓަރ މުހައްމަދު ޝައިނީ އިއްޔެ ވަނީ ޝްރީލަންކާގައި ތިއްބަވާ ބޭރުގެ ޑިޕްލޮމެޓުންނާ ބައްދަލުކުރައްވައި ރާއްޖޭގެ ސިޔާސީ މަޞްރަޙްގެ މަޢުލޫމާތު ޙިއްޞާކުރައްވާފައެވެ.
މި ބައްދަލުކުރެއްވުމުގައި ޚާރިޖީ ވަޒީރު ދުންޔާ މައުމޫން ދެއްކެވި ވާހަކަފުޅުގައި ރާއްޖޭގައި އޮތް ޑިމޮކްރަސީގެ ޘަޤާފަތް އިތުރަށް ހަރުދާނާކުރެއްވުމަށް ސަރުކާރުން އިޞްލާޙީ ބަދަލުތަކެއް ތަންފީޒުކުރައްވަމުން ގެންދަވާކަމަށް ވިދާޅުވެފައިވެއެވެ. އަދި ސަރުކާރުން އިސްނަންގަވައިގެން ބާއްވަވާ ސިޔާސީ މަޝްވަރާތަކުގައި މިހާތަނަށް ލިބިފައިވާ ކުރިއެރުންތަކުގެ ތަފްޞީލް ޑިޕްލޮމެޓުންނާ ޙިއްޞާކޮށްދެއްވާފައިވެއެވެ. ސިޔާސީ ޕާޓީތަކުގެ މެދުގައި ބާއްވަވާ ވާހަކަތަކުގައި ދިމާވާ ޚިޔާލު ތަފާތުވުންތައް ނައްތާލެއްވުމަށް ސަރުކާރުން އަބަދުވެސް އިސްކަން ދެއްވާކަމަށާއި މިކަން ޙައްލުކުރެއްވުމަށްވެސް މަސައްކަތް ކުރައްވަމުން ގެންދަވާކަމަށް ވިދާޅުވެފައިވެއެވެ. ރާއްޖޭގައި އޮތް ޑިމޮކްރަސީ ނިޒާމް ދަނީ ފުރިހަމަވަމުން ކަމަށާއި، ސަރުކާރުގެ ހިންގުމުގެ ނިޒާމް އިޞްލާޙުކުރުމުގެ ޕްލޭން ފުރިހަމަ ގޮތެއްގައި ތަންފީޒުކުރެއްވުމަށް ޓެކްނިކަލް އެހީ ހޯއްދަވަން ކޮމަންވެލްތާއި، ޔޫއެންއާއި އަދި އީޔޫފަދަ ބޭރުގެ ޕާޓްނަރ-ފަރާތްތަކާއެކު ސަރުކާރުން މަޝްވަރާކުރައްވަމުން ގެންދަވާކަމަށް ވިދާޅުވެފައިވެއެވެ.
img:http://s2.psmnews.mv/images/660x400/14624372866611.jpg|މިނިސްޓަރ ދުންޔާ މައުމޫން އަދި މިނިސްޓަރ މުހައްމަދު ޝައިނީ، ސްރީލަންކާގެ ބޮޑުވަޒީރާއި ބައްދަލުކުރައްވަނީ / ފޮޓޯ: ޕީއެސްއެމް ފައިލް
މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑޮކްޓަރ މުޙައްމަދު ޝައިނީގެ ވާހަކަފުޅުގައި އެމަނިކުފާނު ވަނީ ރާއްޖޭގެ ސިޔާސީ މަޞްރަޙުގައި މިފަހުން ހިނގައިދިޔަ ކަންކަމުގެ ތަފްޞީލް ޑިޕްލޮމެޓުންނަށް ހާމަކޮށްދެއްވާފައެވެ. ސިޔާސީ ވާހަކަތަކުގައި ސަރުކާރުގެ ފަރާތުން އިސްކޮށް ޙަރަކާތްތެރިވެވަޑައިގަންނަވާ ޑރ.ޝައިނީ ވަނީ ސިޔާސީ ޕާޓީތަކާއެކު ބާއްވަވާ ވާހަކަތައް ކުރިޔަށްދާ ގޮތާމެދު ހިތްޕުޅުހަމަޖެހިވަޑައިގަންނަވާ ކަމަށް ވިދާޅުވެފައެވެ.
މިނިސްޓަރ ދުންޔާ އާއި މިނިސްޓަރ ޝައިނީ އިއްޔެ ވަނީ ސްރީލަންކާގެ ބޮޑުވަޒީރު ރަނިލް ވިކްރަމަސިންގހައާ ބައްދަލުކުރައްވާފައެވެ. މީގެ އިތުރުން މިނިސްޓަރ ދުންޔާ ވަނީ ޝްރީލަންކާގައި ތިއްބަވާ ބޭރުގެ ބައެއް އިސްފަރާތްތަކާ ވަކިވަކިން ބައްދަލުކުރައްވައި މަޝްވަރާތައް ބާއްވަވާފައެވެ.