ސޫރިޔާގެ އުތުރުގެ ރަށެއްކަމަށްވާ ޙަލަބްއަށް ހަމަލާތައް ނުދެވޭނެ ސާޅީސް އަށްގަޑިރުގެ މުހުލަތެއް ސޫރިޔާގެ އަސްކަރިއްޔާއިން އަނެއްކާވެސް އިޢުލާންކޮށްފިއެވެ.
ދައުލަތުގެ ޓީވީން ޢާންމު ކުރި ގޮތުގައި ރޭދަންވަރު އެކަކުން ފެށިގެން، ސާޅީސް އަށްގަޑިއިރުތެރޭ ޙަލަބަށް އަސްކަރިއްޔާގެ އެއްވެސް ހަމަލާއެއް ނުދޭނެކަމަށެވެ. ހަލަބްގައި ހިނގަމުންދާ ހަނގުރާމައިގެ ސަބަބުން އެސިޓީގެ އާންމުންގެ އެތަށް ބަޔަކު ކޮންމެ ދުވަހަކު ވަރަށް އަނިޔާވެރި ގޮތްގޮތަށް މަރާލެވެމުންދާއިރު އދ. ގެ ސަލާމަތީ މަޖިލީހުން ވަނީ އެއީ ހަނގުރާމައިގެ ޖަރީމާކަމަށް ބެލެވޭ ޤަތުލު ޢާންމުތަކެއްކަމަށް ސިފަކޮށްފައެވެ. ސޫރިޔާގެ ޙަލަބްގައި ހިނގަމުންދާ ހަނގުރާމާގައި ޢާންމުންނަށް އަމާޒުކޮށް ދެމުންދާ ޙަމަލާތައް ޢަރަބި ލީގުންވެސް ވަނީ ކުށްވެރިކޮށްފައެވެ.
img:http://s4.psmnews.mv/images/660x400/14624235454757.jpg|ހަނގުރާމައިގެ ސަބަބުން ވީރާނާވެފައިވާ ސޫރިޔާގެ ޙަލަބް / ފޮޓޯ: ޒިންހުއާ
މިޞްރުގެ ވެރިރަށް ޤާހިރާގައި ބޭއްވި ޢަރަބި ލީގުގެ ކުއްލި ބައްދަލުވުމެއްގައި އެޖަމާޢަތުން ވަނީ ޙަލަބްގައި މިހާރު ކުރަމުންދާ ހަނގުރާމާގައި ހޮސްޕިޓަލްތަކާއި، ސްކޫލްތަކާއި ޢާންމުން ދިރިއުޅޭ ސަރަޙައްދުތަކަށް އަމާޒުކޮށް ދީފައިވާ އަދި ދެމުންދާ ޙަމަލާތައް ހަރުކަށި ޢިބާރާތުން ކުށްވެރިކޮށްފައެވެ. އަދި މިޙަމަލާތަކަކީ އިންސާނިއްޔަތާއި ޚިލާފު ޖަރީމާތަކެއް ކަމަށާއި މިކަމުގައި ޒިންމާވާ ފަތާތްތައް ޢަދުލު އިންޞާފުގެ ކުރިމައްޗަށް ގެންނަންޖެހޭ ކަމަށް އެޖަމާޢަތުގެ ސެކްރެޓަރީ ޖެނެރަލް ނަބީލް އަލްޢަރަބީ ވަނީ ވިދާޅުވެފައެވެ. ފާއިތުވެދިޔަ ބާރަވަރަކަށް ދުވަހު ޙަލަބަށް ދިން އެކި ޙަމަލާތަކުގައި 250 އަށްވުރެ ގިނަ މީހުން ވަނީ މަރުވެފައެވެ.
ސޫރިޔާގެ ހަނގުރާމަ ނިމުމަކަށް ގެނެވޭތޯ ޑިޕްލޮމެޓިކް ފެންވަރުގައި ހޮނިހިރު ދުވަހުން ފެށިގެން މަސައްކަތްތަކެއް ކުރަމުންދާއިރު، ރަޝިޔާގެ ޚާރިޖީ ވަޒީރު ސަރްގެއި ލަވްރޯވް ވަނީ ޙަމަލާތައް ނުދިނުމަށް ސޫރިޔާ ސަރުކާރުން އަމިއްލައަށް ކަޑައަޅާފައިވާ ތަންތަނުގެ ތެރޭގައި ޙަލަބްވެސް ހިމެނުމަށް މަސައްކަތްތަކެއް ކުރެވެމުންދާކަމަށް ވިދާޅުވެފައެވެ.