މާލެއާއި އަތޮޅުތެރޭގައި ޑެންގީ ހުން ފެތުރޭ މިންވަރު އިތުރުވަމުންދާތީ، އެކަމަށް ސަމާލުވުމަށް ހެލްތު ޕްރޮޓެކްޝަން އޭޖޭންސީ، އެޗް.ޕީ.އޭއިން އިލްތިމާސްކުރައްވައިފިއެވެ.
މިކަމަށް އިލްތިމާސްކުރައްވައި އެޗް.ޕީ.އޭއިން އާއްމު ކުރެއްވި އެލާޓްގައި ވިދާޅުވެފައިވަނީ، މިދުވަސްވަރު މާލެއާއި ބައެއް އަތޮޅު ތަކުން ޑެންގީހުން ޖެހިގެން ރިޕޯރޓް ކުރަމުންދާ މީހުންނާއި ކުދިން އިތުރުވަމުންދާ ކަމަށް އެ އޭޖެންސީގެ ތަފާސް ހިސާބުތަކުން ދައްކާކަމަށެވެ. އަދި ކުރިއަށް އޮތް ދުވަސްވަރަކީ، ކޮންމެ އަހަރަކުވެސް އެންމެ ބޮޑަށް ޑެންގީ ހުން ފެތުރޭޭ ދުވަސް ވަރަށްވާތީ، ޑެންގީހުމުން ރައްކާތެރިވުމުގެ ގޮތުން ދުރާލާ މަދިރި މަދުކުރުމުގެ މަސައްކަތްތައް ކުރިއަށް ގެންދިއުމަށްވެސް އެލާޓްގައި، އިލްތިމާސްކުރައްވާފައިވެއެވެ. އެޗްޕީއޭގެ އެލާޓްގައި ޑެންގީ ހުމުން ރައްކާތެރިވުމަށް މިދުވަސްވަރު ކުރެވިދާނެ ކަންތައްތައް ވެސް ބަޔާންކޮށްފައިވެއެވެ. އޭގެ ތެރޭގައި، ހަފްތާއަކު އެއްފަހަރު ގެއާއި ގޯތިތެރޭގައި ފެން ހަރުލާގޮތަށް ހުންނަ ތަންތަނާއި ތަކެތި ނައްތާލުން ނުވަތަ ފެން ހުސްކޮށް ސާފުކުރުން ހިމެނެއެވެ.
img:http://s4.psmnews.mv/images/660x400/3386.jpg|މަދިރި އާލާވަގޮތަށް ހުރިތަނެއް-
މީގެ އިތުރުން މަގުމައްޗާއި، ގޯތިތެރެއާއި ވައިގޮޅިފަދަ ތަންތަނަށް ކުނި އުކާލުމުގެ ބަދަލުގައި ޑަސްބިންތަކަށް ކުނި އުކާލުމާއި، ކުނިއުކާލާ ޑަސްބިންފަދަ ތަކެތި ފެން ނޭޅޭގޮތަށް މަތިބަންދުކޮށްފައި ބެހެއްޓުންވެސް ހިމެނެއެވެ. މީގެ އިތުރުން މަދިރިން ރައްކާތެރިވުމުގެ ގޮތުން ހަށިގަނޑު ނިވާވާފަދަ ހެދުން އެޅުމާއި، މަދިރި ލޯޝަން އަދި މޮސްކިޓޯ ރެޕެލެންޓް ފަދަ ތަކެތި ބޭނުން ކުރަންވެސް އެޗްޕީއޭގެ އެލާޓްގައި އިލްތިމާސްކުރައްވާފައިވެއެވެ.
ހަމަ އެއާއި އެކު، މަދިރިއަށް ނުވަދެވޭނެފަދަ ގޮތަކަށް އިރުއޮއްސޭ ވަގުތާއި އިރުއަރާ ވަގުތު ދޮރުތައް ބަންދުކޮށްފައި ބެހެއްޓުމަށާއި، ހުމުގެ އަލާމާތްތައް ފެނިއްޖެނަމަ، ޕެނެޑޯލް ނޫން ބޭހެއް ބޭނުން ނުކުރުމަށްވެސް އިލްތިމާސް ކުރައްވާފައިވެއެވެ.
ޑެންގީ ހުމުގެ އަލާމާތްތަކުގެ ތެރޭގައި ގައިގައި ރިއްސުމާއެކު ހުން އައުމާއި ބޮލުގައި ރިއްސުމާއި ލޮލުގައި ރިއްސުމާއި އަދި ހަމުގައި ކުދި ރަތް ބިހިތަކެއް ނެގުން ހިމެނެއެވެ.