މިދިޔަ ހުކުރުދުވަހުގެ ރޭ ކެންޔާގެ ވެރިރަށް ނައިރޯބީގައި ވެއްޓުނު ޢިމާރާތުގެ ދަށުން އެއްއަހަރުގެ ކުއްޖަކު ދިރިހުއްޓައި ސަލާމަތްކޮށްފިއެވެ. މިޢިމާރާތް ވެއްޓިފައިވަނީ ބޯކޮށް ވާރޭވެހި ބިންގަޑު ކަނޑައިގެން ދިއުމުގެ ސަބަބުންނެވެ. މިޙާދިސާގައި މަރުވި މީހުންގެ އަދަދު މިހާރު ވަނީ އެކާވީހަށް އަރާފައެވެ.
ކެންޔާ ރެޑްކްރޮސްގެ ތަރުޖަމާން ބުނީ މިއަދު ސަލާމަތްކުރެވުނު ކުއްޖާގެ ހަށިގަޑުން ވަނީ ވަރަށް ބޮޑަށް ފެން މަދުވެފައިކަމަށާއި ނައިރޯބީގެ ކެންޔާޓާ ނޭޝަނަލް ހޮސްޕިޓަލްގައި އެކުއްޖާއަށް ފަރުވާ ދެމުން އަންނަކަމުގައެވެ. ޢިމާރާތުގެ ދަށުން އިތުރު މީހަކު ދިރިހުއްޓައި ފެނުމުގެ އުންމީދު ކުޑަ ކަމުގައި މީހުން ސަލާމަތްކުރުގައި ޙަރަކާތްތެރިވާ ފަރާތްތަކުން ބުނެއެވެ.
ކެންޔާގެ ރެޑްކްރޮސްގެ އޮފިޝަލުން ވިދާޅުވީ ވެއްޓުނު 6 ބުރީގެ ޢިމާރާތުގެ ދަށުން މިހާތަނަށް 135 މީހުން ސަލާމަތް ކޮށްފައިވާކަމަށެވެ. ނަމަވެސް ޢިމާރާތުގެ ދަށުވިކަމަށް ބެލޭ 73 މީހަކު އަދިވެސް ނުފެންނަ ކަމަށް ރެޑް ކްރޮސްއިން ބުނެއެވެ.