ސަރުކާރުން އިސްނަންގަވައިގެން ފަށްޓަވާފައިވާ، ސިޔާސީ ޕާޓީތަކުގެ މަޝްވަރާގައި ސިޔާސީ ހުރިހާ ޕާޓީތަކުން ބައިވެރިވުމަށް، ޚާރިޖީ ވަޒީރު ދުންޔާ މައްމޫން އެދިވަޑައިގެންފިއެވެ.
ސަރުކާރުން ފަށްޓާފައިވާ ސިޔާސީ މަޝްވަރާތަކާބެހޭ މަޢުލޫމާތު ޕީ.އެސް.އެމްއާ ޙިއްޞާކުރައްވަމުން ޚާރިޖީ ވަޒީރު ދުންޔާ މައުމޫން ވިދާޅުވީ، ރާއްޖެއަށް ސިޔާސީ ގޮތުން ކުރިމަތިވެފައިވާ މައްސަލަތައް ޙައްލުކުރުމަށްޓަކައި ހުރިހާ ސިޔާސީ ޕާޓީތަކުން މަޝްވަރާއަށް އައުމަކީ ވަރަށް މުހިންމު ކަމެއް ކަމަށެވެ.
ރާއްޖޭގެ ހަމަޖެހުމާއި، ރައްޔިތުންގެ ހެވާއި ލާބައަށް ސަރުކާރުން އިސްނަންގަވައިގެން، ސިޔާސީ ޕާޓީތަކާއެކު، ކުރިޔަށް ގެންދެވުމަށް ހުޅުވާލެއްވި މަޝްވަރާތަކުގައި އެހީވެދެއްވުމަށް، އޭޕްރީލް 16 އިން 29 އަށް އދ.ގެ ޚާއްޞަ މަންދޫބު، އދ. ގެ ޑިޕާޓްމަންޓް އޮފް ޕޮލިޓިކަލް އެފެއަރޒްގެ ސީނިއަރ އެޑްވައިޒަރ މިސްޓަރ ސެމިއުލް ތަމްރަތު، ރާއްޖެއަށް ކުރެއްވި ޒިޔާރަތަށްފަހު ނެރުއްވާފައިވާ ބަޔާނުގައި ވަނީ، ރާއްޖޭގެ އިދިކޮޅު ސިޔާސީ ޕާޓީތަކާއި، އަދި ސަރުކާރާއެކު ކުރިއަށް ގެންދެވި ވާހަކަތަކުން، ރާއްޖޭގެ ސިޔާސީ މަސްރަޙަށް ޙައްލެއް ގެނައުމަށް ދެފަރާތުންވެސް ބޭނުންވާކަން ހާމަވެގެން ގޮސްފައިވާކަމަށެވެ.
ނަމަވެސް މަޝްވަރާތަކަށް އައުމަށް ދެފަރާތުގެ ޚިޔާލު ތަފާތުވުންތަކަށް ޙައްލެއް ބޭނުންވާކަމަށާއި، ކުރިއަށް އޮތްތަނުގައިވެސް މަޝްވަރާތައް ކުރިއަށް ގެންދިއުމަށް އޭނާ ރާއްޖެ ވަޑައިގެން މަސައްކަތް ކުރައްވާނެކަމަށް ވިދާޅުވެފައިވެއެވެ.