ހިނގާފައި އުޅޭ ސަރަޙައްދުތަކުގެ ގޮތުގައި ކަނޑައެޅުއްވި ގޯޅިތައް މިހާރަށްވުރެ ހިތްފަސޭހަ ގޮތަކަށް ބަދަލުކުރެއްވުމުގެ މަސައްކަތް މިއަހަރުގެ ތެރޭގައި ފަށްޓަވާނެކަމަށް ހައުސިންގ މިނިސްޓަރ ވިދާޅުވެއްޖެއެވެ.
ހައުސިންގ މިނިސްޓަރ ޑރ މުހައްމަދު މުއިއްޒު ވިދާޅުވީ ހިނގާފައި އުޅޭ ސަރަޙައްދުތަކުގެ ގޮތުގައި ސަރުކާރުން ހަމަޖެއްސެވި ގޯޅިތައް ތަރައްޤީ ކުރެވިގެންދާނީ މިގޯޅީތަކަށް ޚާއްޞަ ޑިޒައިންތަކާއެކު މިހާރަށްވުރެ ހިތްފަސޭހަ ގޮތަކަށްކަމަށެވެ. މިގޮތުން މިގޯޅިތަކުގައި ޖަހާފައިހުރި ގާ ބަދަލުކުރައްވައި، އިށީންދެ ތިބެވޭގޮތަށް ބެންޗްފަދަ ތަކެތި ބަހައްޓަވަން ހަމަޖެހިފައިވާކަމަށް ހައުސިންގ މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ގޯޅިތަކަށް މިބަދަލުތައް ގެންނަވަނީ ގޯޅިތަކުގައި ހުރި ގެތަކުގައި ދިރިއުޅޭ ފަރާތްތަކާ މަޝްވަރާ ކުރައްވައިގެން ކަމަށެވެ. މިގޮތުން ބައެއް ގޯޅިތަކުގައި ދިރިއުޅޭ ފަރާތްތަކުގެ މަޝްވަރާއާއެކު އެގޯޅިތަކުގެ ޑިޒައިންތައްވެސް ނިންމަވާފައިވާކަން މިނިސްޓަރ ފާހަގަކުރެއްވިއެވެ.
ހިނގާފައި އުޅޭ ސަރަޙައްދުގެ ގޮތުގައި މިތަންތަން ކަނޑައެޅުމުން ޢާންމު ދިރިއުޅުމަށް އެތައް ފަސޭހަތަކެއް ލިބިގެންދާކަން މިސަރަޙައްދުތަކުގައި ދިރިއުޅޭ ބައެއް ފަރާތްތަކުން ފާހަގަކުރެއެވެ. ހިނގާފައި އުޅޭ ސަރަޙައްދުތަކުގެ ގޮތުގައި މާލޭގެ 8 ގޯޅިއެއް މިހާރު ހަމަޖައްސަވާފައިވާއިރު، މިގޯޅިތައް ޑިޒައިންކުރައްވާ، ހިތްފަސޭހަ ތަންތަނުގެ ގޮތުގައި ތަރައްޤީކުރައްވާނެކަމަށް ހައުސިންގ މިނިސްޓްރީން މަޢުލޫމާތުދެއްވައެވެ.