ކައިވެނި ރޫޅުމުން ދެމަފިރިންގެ މަސައްކަތުން ހޯދާފައިވާ މުދަލުން ބައެއް، އަންހެން މީހާއަށް ލިބޭގޮތަށް ޢާއިލާއާބެހޭ ޤާނޫނަށް ގެންނެވި އިޞްލާޙު ރައީސުލްޖުމްހޫރިއްޔާ މިއަދު ތަސްދީޤުކުރައްވައިފިއެވެ. މި އިޞްލާޙު ރައީސް ތަސްދީޤުކުރެއްވުމާއި ގުޅިގެން ވަނީ ސަރުކާރުގެ ގެޒެޓުގައި ޝާޢިއުކުރައްވާފައެވެ.
މިއަދު ތަސްދީޤުކުރެއްވި އިޞްލާޙުގައި ވަނީ، ދެމަފިރިން ވަކިވުމުން، އަންހެން މީހާއަށް ހައްޤުވާ މިންވަރު ކޯޓުން ކަނޑައަޅާއިރު އެމުދާ ހޯދުމަށް ދެމަފިރިން ވަކިވަކިން މަސައްކަތްކޮށްފައިވާ މިންވަރު ބަލަންޖެހޭނެ ކަމަށާއި، އެ މުދަލާއި ފައިސާއަށް ނިސްބަތްވާ ދަރަންޏެއް އޮތްތޯއާއި، 18 އަހަރުން މަތީގެ ދަރިންގެ މަސްލަޙަތަށް ބަލަންޖެހޭނެ ކަމަށެވެ.
މީގެއިތުރުން ދެމަފިރިން އެކުގައި އުޅުނުއިރު ހޯދާފައިވާ މުދަލެއް ޢަދުލުވެރި ގޮތެއްގައި ކޯޓުން ބަހަންޖެހޭނީ އެއްބަސްވުމުގައިވާ ގޮތުގެ މަތީން ކައިވެނި ރޫޅޭ ޙާލަތުގައި ކައިވެނީގެ މުއްދަތުގައި ދެމަފިރިން އެކުގައި ޙާޞިލުކޮށްފައިވާ މުދަލާއި މެދު ޢަމަލުކުރާނެ ގޮތަކާއި މެދުގައި ޚިލާފުވެއްޖެ ހާލަތެއްގައި ކަމަށް ތަސްދިޤުކުރެއްވި އިޞްލާޙުގައިވެއެވެ. އެގޮތުން ދެމަފިރިންގެ ދެމެދުގައި މުދާ ބަހާއިރު، އެ ފައިސާއިން ނުވަތަ މުދަލުން އަނބިމީހާ ނުވަތަ ފިރިމީހާއަށް ހައްޤުވާ ބައި ނުވަތަ މިންވަރު ކޯޓުން ކަނޑައަޅަންޖެހޭނެކަމަށް ލަޠީފް ހުށައެޅުއްވި އިޞްލާޙުގައިވެއެވެ.