ހަތަރު ރަށެއްގެ ފުޓްބޯޅަ ދަނޑުގައި ޓާފް އެޅުމުގެ މަސައްކަތް ކުޅިވަރާއި ހަށިހެޔޮކަމާ ބެހޭ ވުޒާރާއި ކޮންޓްރެކްޓަރުންނާ ހަވާލުކޮށްފިއެވެ.
ކުޅިވަރާ ބެހޭ ވުޒާރާއި މިއަދު ކުރިއަށްގެންދިޔަ ރަސްމިއްޔާތެއްގައި ސޮއިކޮށްފައިވަނީ ފުވައްމުލައް ސިޓީގެ ދަނޑިމަގާއި، ހދ. ވައިކަރަދޫ އާއި، ށ. ފުނަދޫ އަދި ހއ. ވަށަފަރުގެ ފުޓްބޯޅަ ދަނޑުތަކުގެ ޓާފް އެޅުމުގެ މަސައްކަތުގެ އެއްބަސްވުމުގައެވެ. މި ހަތަރު ރަށުގެ ފުޓްބޯޅަ ދަނޑުގައި ޓާފް އެޅުމުގެ މަސައްކަތްކުރުމަށް ހަވާލުކޮށްފައިވަނީ ބޮޑުތިލަ އިންވެސްޓްމަންޓާއި، މޯލްޑިވްސް އެޝުއަރ ސަޕްލައި އަދި ކޯލްޑް ރީފްއާއެވެ. މި އެއްބަސްވުންތަކުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ ޙުސައިން ޝަރީފެވެ.
މީގެ ތެރެއިން ދަނޑިމަގު ފުޓްބޯޅަ ދަނޑަށް ބޭނުންވާ ޓާފް ސަޕްލައިކޮށް އިންސްޓޯލްކުރުމަށް ވުޒާރާއިން ހަވާލުކޮށްފައިވަނީ ބޮޑުތިލަ އިންވެސްޓްމަންޓާއެވެ. ބޮޑުތިލަ އިންވެސްޓްމަންޓުގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ޕްރޮޖެކްޓްސް މެނޭޖަރ އާމިނަތު ޝަކީލާއެވެ. މި އެއްބަސްވުމުގެ ދަށުން ދަނޑިމަގު ފުޓްބޯޅަ ދަނޑުގައި ޓާފް އެޅުމުގެ މަސައްކަތް ކުރުމަށް ބޮޑުތިލަ އިންވެސްޓްމަންޓާ ހަވާލުކުރީ މަސައްކަތް ފަށާތާ، 81 ދުވަހުގެ ތެރޭގައި ނިންމަން ޖެހޭ ގޮތަށެވެ. މި މަޝްރޫއަކީ ކުޅިވަރާ ބެހޭ ވުޒާރާގެ ބަޖެޓުން 4،609،431.36 (ހަތަރު މިލިޔަން ހަލައްކަ ނުވަހާސް ހަތަރުސަތޭކަ ތިރީސް އެއްރުފިޔާ ތިރީސް ހަލާރި) ޚަރަދުކޮށްގެން ކުރިއަށްގެންދަން ނިންމާފައިވާ މަޝްރޫއެކެވެ.
ވައިކަރަދޫ ފުޓްބޯޅަ ދަނޑަށް ބޭނުންވާ ޓާފް ސަޕްލައިކޮށް އިންސްޓޯލްކުރުމުގެ މަސައްކަތް ހަވާލުކޮށްފައިވަނީ ކޯލްޑް ރީފްއާއެވެ. މި އެއްބަސްވުމުގައި ކޯލްޑް ރީފްގެ ފަރާތުން ސޮއިކުރެއްވީ އެ ކުންފުނީގެ ޕްރޮޖެކްޓް މެނޭޖަރ ޠާރިގު ލަތީފެވެ. މި އެއްބަސްވުމުގެ ދަށުން ވައިކަރަދޫ ފުޓްބޯޅަ ދަނޑުގައި ޓާފް އެޅުމުގެ މަސައްކަތްކުރުމަށް ހަވާލުކުރީ މަސައްކަތް ފަށާތާ، 82 ދުވަހުގެ ތެރޭގައި ނިންމަން ޖެހޭ ގޮތަށެވެ. އަދި މި މަޝްރޫއަކީ ކުޅިވަރާ ބެހޭ ވުޒާރާގެ ބަޖެޓުން 4،395،104.82 (ހަތަރު މިލިޔަން ތިންލައްކަ ނުވަދިހަ ފަސްހާސް އެއްސަތޭކަ ހަތަރު ރުފިޔާ އަށްޑިހަ ދެލަރީ) ޚަރަދުކޮށްގެން ކުރިއަށްގެންދަން ނިންމާފައިވާ މަޝްރޫއެކެވެ.
މީގެ އިތުރުން ފުނަދޫ އާއި ވަށަފަރު ފުޓްބޯޅަ ދަނޑަށް ބޭނުންވާ ޓާފް ސަޕްލައިކޮށް އިންސްޓޯލްކުރުމުގެ މަސައްކަތް ހަވާލުކޮށްފައިވަނީ މޯލްޑިވްސް އެޝުއަރ ސަޕްލައި އާއެވެ. މި އެއްބަސްވުންތަކުގައި މޯލްޑިވްސް އެޝުއަރ ސަޕްލައިގެ ފަރާތުން ސޮއިކުރެއްވީ އެ ކުންފުނީގެ ޕްރޮޖެކްޓް އޮފިސަރ ހައިކަލް އަލީ މުސްތަފާއެވެ.
މި އެއްބަސްވުމުގެ ދަށުން ފުނަދޫ ފުޓްބޯޅަ ދަނޑުގެ މަސައްކަތް ފަށާތާ 84 ދުވަހުގެ ތެރޭގައި ނިންމަން ޖެހެއެވެ. އަދި މި މަޝްރޫއަކީ ކުޅިވަރާ ބެހޭ ވުޒާރާގެ ބަޖެޓުން 3،110،670.00 (ތިން މިލިޔަން އެއްލައްކަ ދިހަހާސް ހަސަތޭކަ ހަތްދިހަ ރުފިޔާ) ޚަރަދުކޮށްގެން ކުރިއަށްގެންދަން ނިންމާފައިވާ މަޝްރޫއެކެވެ.
މީގެ އިތުރުން ވަށަފަރު ފުޓްބޯޅަ ދަނޑުގައި ޓާފް އެޅުމުގެ މަސައްކަތްކުރުމަށް މޯލްޑިވްސް އެޝުއަރ ސަޕްލައިއާ ހަވާލުކުރީ މަސައްކަތް ފަށާތާ، 82 ދުވަހުގެ ތެރޭގައި ނިންމަން ޖެހޭ ގޮތަށެވެ. މި މަޝްރޫއަކީ ކުޅިވަރާ ބެހޭ ވުޒާރާގެ ބަޖެޓުން 4،823،382.00 (ހަތަރު މިލިޔަން އަށްލައްކަ ތޭވީސްހާސް ތިންސަތޭކަ އަށްޑިހަ ދެރުފިޔާ ފަސްދޮޅަސްލާރި) ޚަރަދުކޮށްގެން ކުރިއަށްގެންދަން ނިންމާފައިވާ މަޝްރޫއެކެވެ.