ވެޓެރަންސް މުބާރާތަކީ އަރަމުން އަންނަ ކުޅުންތެރިންނަށް ލިބޭނެ ބޮޑު ހިތްވަރެއް: ނައިބު ރައީސް
ކޮންމެ ރަމަޟާން މަހަކު ބާއްވަމުން އަންނަ ވެޓެރަންސް ލީގުގެ ސަބަބުން ރާއްޖޭގައި އަރަމުން އަންނަ ޒުވާން ކުޅުންތެރިންނަށް ބޮޑު ހިތްވަރެއް ލިބިގެންދާނެ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
މި އަހަރުގެ މުބާރާތުގައި ވާދަކުރަމުން އަންނަ މުއިވެޔޮ ފްރެންޑްސް ޓީމުގެ ކެޕްޓަން ބޭންޑް އަޅައިގެން ކުޅުއްވަމުން އަންނަވަނީ ނައިބު ރައީސެވެ. އެގޮތުން މުބާރާތުގައި މުއިވެޔޮއިން ވަނީ ކުޅުނު ފުރަތަމަ މެޗުގައި ލެގޫންސް ސްޕޯޓްސް ކުލަބު އަތުން ފަހަތުން އަރައި 3-1 ގެ ނަތީޖާއަކުން މޮޅުވެފައެވެ. އެ މެޗުގައި ނައިބު ރައީސް ވަނީ ޕެނަލްޓީއެއްވެސް ކާމިޔާބުކުރައްވާފައެވެ.
އެ މެޗަށްފަހު "ޕީއެސްއެމް ސްޕޯޓްސް" އަށް ދެއްވި ޚާއްސަ އިންޓަރވިއުއެއްގައި ނައިބު ރައީސް ވިދާޅުވީ މުބާރާތުގައި ވާދަކުރުމަކީ ލިބިގެންދިޔަ ވަރަށް ބޮޑު ޝަރަފެއް ކަމަށެވެ. އަދި ވަކިން ޚާއްސަކޮއް ކުރީގެ މަޝްހޫރު ކުޅުންތެރިންނާއެކު ކުޅެލަން ލިބުމަކީ ޚާއްސަ އުފަލެއް ކަމަށްވެސް ވިދާޅުވިއެވެ. އަދި ނައިބު ރައީސް ވަނީ މުބާރާތުގައި ކުޅުމުގެ ފުރުސަތު ދެއްވީތީ، ކުޅެމުން އަންނަ ޓީމަށާ މުބާރާތުގެ އިންތިޒާމު ކޮމިޓީއަށް ޝުކުރު އަދާކުރައްވާފައެވެ.
"އަޅުގަނޑު ގަބޫލުކުރާ ގޮތުގައި މީގެ ސަބަބުން އަޅުގަނޑުމެންގެ ރިޓަޔާޑް ކުޅުންތެރިންނާއެކު، އަރައިގެން އަންނަ ކުޅުންތެރިންނަށް ލިބިގެންދާނެ ވަރަށް ބޮޑު ހިތްވަރަކަށް ވެގެންދާނެ. ޚާއްސަކޮށް ސުކޫލުތަކުގައި އުޅޭ ކުދިން މިހެން ރޯދަ މަހު ހަވީރު އައިސް ބަލާލަން، ވަރަށް ހިތްގައިމު ކަމަކަށް ވެގެންދާނެ.ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް
ނައިބު ރައީސް ވިދާޅުވީ މުބާރާތުގައި ވާދަކުރާ ޓީމުތަކާއި ކުޅުންތެރިން ފެނިގެންދަނީ ވަރަށް ޑިސިޕްލިންކޮށް ކަމަށެވެ. އަދި ދިވެހި މުޖްތަމައު ބަދަހިކުރުމައްޓަކައި މުބާރާތުގެ ސަބަބުން ފައިދާތަކެއް ވެގެންދާނެ ކަމަށްވެސް ވަނީ ވިދާޅުވެފައެވެ.
40 އަހަރުން މަތީގެ ކުޅުންތެރިންނަށް ޚާއްސަކޮށްގެން ބާއްވާ ވެޓެރަންސް ލީގު މި ފަހަރު ކުރިއަށްދަނީ 10 ޓީމުގެ މެދުގައެވެ. ދެ ގްރޫޕަކަށް ބަހާލައިގެން މުބާރާތުގެ ކުޅުން ކުރިއަށްދާއިރު، ގްރޫޕް ބީގައި ހިމެނޭ މުއިވެޔޮ، ދެވަނަ މެޗުގައި އަންނަ ބުދަ ދުވަހު ނުކުންނާނީ އެންމެ ފަހުގެ ރަނަރަޕް ދަ ގްރާންޑޭ ސްޕޯޓްސް ކުލަބާ ދެކޮޅަށެވެ.