އެފްއޭއެމް ވެޓެރަންސް ލީގު 2024 ގައި ދިވެހި ސިފައިންގެ ކުލަބު (ޑީއެސްސީ) އިން ކުޅުނު ފުރަތަމަ މެޗުގައި ފަސޭހަކަމާއެކު ވިލިމާލެ ޔުނައިޓެޑް ބަލިކޮށްފިއެވެ.
ހެންވޭރު ދަނޑުގައި ކުރިއަށްދާ މި މުބާރާތުގައި މިއަދު ކުޅުނު ގްރޫޕް އޭގެ މެޗު ސިފައިންގެ ކުލަބުން ކާމިޔާބުކުރީ 6-0 ގެ ތަފާތު ބޮޑު ނަތީޖާއަކުންނެވެ.
މި މެޗުގެ ފުރަތަމަ ހާފުގައި ވިލިމާލެ ޓީމުން ވަނީ ރަނގަޅަށް ޑިފެންސްކޮށް، ސިފައިންގެ ކުލަބުގެ ގިނަ ހަމަލާތަކެއް ހުއްޓުވާފައެވެ. އެއާއެކު މެޗުގެ ފުރަތަމަ ހާފުގެ ކުޅުން ނިމިގެންދިޔައީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.
މި މެޗުގައި ސިފައިންގެ ކުލަބުން ލީޑު ނެގީ ދެވަނަ ހާފު ފަށައިގެން 15 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ އިބްރާހީމް މުޙައްމަދެވެ. އެ ލަނޑަށްފަހު ވިލިމާލެ ޓީމުގެ ޑިފެންސް އާދައިގެ ގޮތަކަށް ފެނިގެންދިޔައިރު، އޭގެ ދެ މިނެޓު ފަހުން ސިފައިންގެ ކުލަބުން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަލީ ހިޝާމެވެ.
ގާތްގާތުގައި ސިފައިންގެ ކުލަބުން ގިނަ ލަނޑުތަކެެއް ޖެހިއިރު، އެ ޓީމުގެ ތިންވަނަ ލަނޑު މެޗުގެ 48 ވަނަ މިނެޓުގައި ކާމިޔާބުކޮށްދިނީ އަޙްމަދު ޝާމިންއެވެ. އޭގެ ފަހުން ސިފައިންގެ ކުލަބުގެ އަޙްމަދު ރަޝީދު ވަނީ އެއް މިނެޓުގެ ތެރޭގައި ދެ ލަނޑު ކާމިޔާބުކޮށްފައެވެ. އަދި އެ ޓީމުގެ ފަހު ލަނޑު މެޗުގެ ފަހު މިނެޓުގައި ޖަހައިދިނީ ތިންވަނަ ލަނޑުވެސް ކާމިޔާބުކޮށްދިން ޝާމިންއެވެ.
މި މެޗުން ވިލިމާލެ ޓީމު ބަލިވިއިރު، މުބާރާތުގައި ކުޅުނު ފުރަތަމަ މެޗުން އެ ޓީމު ވަނީ އެންމެ ފަހުގެ ޗެމްޕިއަން ހުޅުމާލެ ވެޓެރަންސް ކުލަބު އަތުން 7-0 ގެ ތަފާތު ބޮޑު ނަތީޖާއަކުން ބަލިވެފައެވެ.
40 އަހަރުން މަތީގެ ކުޅުންތެރިންނަށް ޚާއްސަކޮށްގެން ބާއްވާ ވެޓެރަންސް ލީގު މި ފަހަރު ކުރިއަށްދަނީ 10 ޓީމުގެ މެދުގައެވެ. ދެ ގްރޫޕަކަށް ބަހާލައިގެން މުބާރާތުގެ ކުޅުން ކުރިއަށްދާއިރު، ސިފައިންގެ ކުލަބާއި، ހުޅުމާލެ ވެޓެރަންސް އަދި ވިިލިމާލެ ޔުނައިޓެޑުގެ އިތުރުން ގްރޫޕް އޭގައި ހިމެނެނީ ޕޮލިސް ކުލަބު އަދި ހުއްރިއްޔާ ސްޕޯޓްސް ކުލަބެވެ. އަދި ގްރޫޕް ބީގައި ހިމެނެނީ އެންމެ ފަހުގެ ރަނަރަޕް ދަ ގްރާންޑޭ ސްޕޯޓްސް ކުލަބާއި، މޯލްޑިވްސް ސޮކަރ މޭޓްސް އާއި، މުއިވެޔޮ ފްރެންޑްސް އާއި، ލެގޫންސް ސްޕޯޓްސް ކުލަބު އަދި ކުލަބު ސްޓެލްކޯއެވެ.