ސިފައިންގެ ސަތޭކަ ސައުވީސް ވަނަ އަހަރީ ދުވަހުގެ މުނާޞަބަތާއި ގުޅުވައިގެން "ފޯރސް ރަން"، ގެ ނަމުގައި މިއަދު ހެނދުނު މާލޭގައި ދުވުމެއް ބާއްވައިފިއެވެ.
މޯލްޑިވްސް ނެޝަނަލް ޑިފެންސް ފޯރސްގެ ހުރިހައި ގިންތިއެއްގެ އޮފިސަރުން ހިމެނޭ މި "ފޯރސް ރަން" ފެށީ، ކަޅުތުއްކަލާކޮށީ ދެކުނު ގޭޓުންނެވެ. އަދި ބޮޑުތަކުރުފާނު މަގުން ހުޅަނގަށް ގޮސް، ނިންމާލާފައިވަނީ ކަޅުތުއްކަލާކޮއްޓަށެވެ.
"ފޯރސް ރަން" އަކީ، އަސްކަރީ ސަފުތައް އެކަތިގަނޑެއްގެ ގޮތުގައި ދެމިތިބުމާއި، އަސްކަރީ އަދަބު އަޚްލާޤު އޭގެ އެންމެ މަތީ ފެންވަރުގައި ފެނިގެންދާ، އަދި ޚާއްޞަކޮށް އަސްކަރިއްޔާ ތަކުގައި ކާމިޔާބީތަކުގެ އުފާ ހާސިލުކުރުމަށް މުޅި ލަޝްކަރު އެކުގައި ޤައުމީ ޚިދުމަތުގައި ސާބިތުވެ ދެމިތިބިކަމުގެ ފުރިހަމަ ރަމްޒެއްގެ ގޮތުގައި އަސްކަރިއްޔާ ތަކުގައި ބާއްވަމުންދާ ހަރަކާތެއް ކަމަށް އެމް.އެން.ޑީ.އެފުން ވިދާޅުވެއެވެ.
"ފޯރސް ރަން" ފެށުމުގެ ގޮތުން ބޭއްވި ރަސްމިއްޔާތު ޝަރަފުވެރި ކޮށްދެއްވީ، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޝާހިދުއެވެ. މިއަދު ބޭއްވި ފޯސް ރަންގައި ސިފައިންގެ ޖެނެރަލް އޮފިސަރުންނާއި އޮފިސަރުންގެ އިތުރުން އެހެނިހެން ރޭންކުތަކުގެ ގިނަ އަދަދެއްގެ ސިފައިން ބައިވެރިވިއެވެ.