އިންޓަރނޭޝަނަލް ހޭންބޯލް ފެޑެރޭޝަނުން ކޮންމެ އަހަރަކު ބާއްވަމުން އަންނަ އައިއެޗްއެފް ޓްރޮފީ ހޭންޑްބޯޅަ މުބާރާތުގައި ބައިވެރިވުމަށް ރާއްޖޭގެ 19 އަހަރުން ދަށުގެ ގައުމީ ފިރިހެން ހޭންޑްބޯޅަ ޓީމު ތައްޔާރުވާން ފަށައިފިއެވެ.
މި އަހަރު މި މުބާރާތް ޚާއްސަ ކުރެވިފައިވަނީ ފިރިހެން ޓީމުތަކަށެވެ. މި މުބާރާތް ބޭއްވުމަށް ތާވަލުކޮށްފަވަނީ އަންނަ މެއި މަހު ނޭޕާލުގައެވެ.
މުބާރާތުގެ ތައްޔާރީތަކާ ގުޅޭގޮތުން ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން އެ އެސޯސިއޭޝަންގެ ރައީސް އަޙްމަދު މުޖުތަބާ (މުޖޭ) ވިދާޅުވީ މި ވަގުތު 17 އަހަރުން ދަށުގެ ގައުމީ ޓީމާއި، 19 އަހަރުން ދަށުގެ ގައުމީ ޓީމުގެ ތަމްރީނުތައް ފެށިގެން ކުރިއަށްދާ ކަމަށެވެ.
"އިންޓަރނޭޝަނަލް ހޭންބޯލް ފެޑެރޭޝަނުން ކޮންމެ އަހަރުކުވެސް 17 އަހަރާއި 19 އަހަރުން ދަށުގެ މުބާރާތް ބާއްވާ. މި ފަހަރު އޮތީ ފިރިހެން މުބާރާތް. ދެން އަޅުގަނޑުމެންގެ ވިސްނުމަކީ އިދިކޮޅަށް ކުޅޭ ގައުމުގެ އާބާދީއެއް ނޫނޭ ބަލަން ޖެހޭނީ. އަޅުގަނޑުމެން ނިސްބަތަކަށް ބަލާކަށް މި ފަހަރު ނެތިން. މި ފަހަރު ގޯލްޑަށް މަސައްކަތް މިކުރަނީ.އަޙްމަދު މުޖުތަބާ - ހޭންޑްބޯލް މޯލްޑިވްސްގެ ރައީސް
މުޖުތަބާ ވިދާޅުވީ ރާއްޖޭ ޓީމުން މުބާރާތަށް ނުކުންނާނީ ނިސްބަތުން ވަރުގަދަ ބޮޑެތި ޓީމުތަކާ ދެކޮޅަށް ކަމަށާއި، އެހެންނަމަވެސް މުބާރާތުގައި ރާއްޖޭގެ އަމާޒަކީ ރަން މެޑަލް ހޯދުން ކަމަށެވެ. އަދި މުބާރާތާށް ތައްޔާރުވުމުގެ މަސައްކަތް ފެށީ ރަން މެޑަލް ހޯދުމުގެ ވިސުނުން ކުޅުންތެރިންނަށް ވިސްނައިދީގެން ކަމަށާއި، މުބާރާތަށް ކަނޑައެޅުނު އަމާޒު ހާސިލުކުރެވޭނެކަމުގެ ޔަގީންކަން ބޮޑު ކަމަށްވެސް މުޖުތަބާ ވިދާޅުވިއެވެ.
މިދިޔަ އަހަރު ކުރިއަށްދިޔަ އައިއެޗްއެފް ޓްރޮފީ މުބާރާތުގަައި ރާއްޖޭގެ 17 އަހަރުން ދަށާއި 19 އަހަރުން ދަށުގެ އަންހެން ޓީމުން ވަނީ ލޯ މެޑަލް ހޯދާފައެވެ.