ފިލިޕީންސްގެ ނިއު ކްލަރކް ސިޓީގައި މިހާރު ކުރިއަށްދާ 11 ވަނަ އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕުގައި ދިވެހި ފެތުންތެރިން އިތުރު ދެ ރިކޯޑެއް ހަދައިފިއެވެ.
އެގޮތުން ފިރިހެނުންގެ ލޯންގްކޯސް ހަތަރެއް ގުނަ 100 މީޓަރު ފްރީސްޓައިލް ރިލޭގެ ގައުމީ ރިކޯޑު ދިވެހި ފެތުންތެރިން ވަނީ އައުކޮށްފައެވެ. މި ރިކޯޑު ދިވެހި ފެތުންތެރިން އައުކޮށްފައިވަނީ ތިން މިނެޓު 49.94 ސިކުންތުން ރޭސް ނިންމައިގެންނެވެ. މި ރިކޯޑު އައުކުރި ޓީމުގައި ހިމެނެނީ މުޙައްމަދު އާން ޙުސައިން އާއި، ޢަލީ އިމްޢާނާއި، މުބާލް ޢައްޒާމް އިބްރާހިމް އަދި މުޙައްމަދު ޔަމަން ޔާސީނެވެ.
މި ރިކޯޑު މީގެ ކުރިން އައުކޮށްފައިވަނީ ތިން މިނެޓު 57.16 ސިކުންތުން ރޭސް ފުރިހަމަކޮށްގެން މިދިޔަ އަހަރު ބޭއްވި 19 ވަނަ އޭޝިއަން ގޭމްސްގައެވެ. އެ ފަހަރު ރިކޯޑު ހެދި ޓީމުގައި ހިމެނުނީ އިމްޢާން އާއި، މުބާލުގެ އިތުރުން މުޙައްމަދު ރިޙާން ޝިހާމް އަދި އަޙްމަދު ނީޤް ނިޔާޒެވެ.
މީގެ އިތުރުން ލޯންގްކޯސް 100 މީޓަރު ބަޓަފްލައި އިވެންޓުގެ ގައުމީ ރިކޯޑު ރިޙާން ވަނީ އައުކޮށްފިއެވެ. ރިޙާން މި ރިކޯޑު އައުކޮށްފައިވަނީ އެއް މިނެޓު 1.60 ސިކުންތުން ރޭސް ފުރިހަމަކޮށްގެންނެވެ. މި ރިކޯޑު މީގެ ކުރިންވެސް ހަދާފައިވަނީ ރިޙާނެވެ. އެއީ މިދިޔަ އަހަރު ބޭއްވި އޭޝިއަން ގޭމްސްގައި އެއް މިނެޓު 2.41 ސިކުންތުން ނިންމައިގެންނެވެ.
އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕުގައި ދިވެހި ފެތުންތެރިން އިތުރު ދެ ރިކޯޑެއް ހެދިއިރު، ލޯންގްކޯސް 50 މީޓަރު ބެކްސްޓްރޯކް އިވެންޓުގެ ގައުމީ ރިކޯޑު މުޙައްމަދު އާން ޙުސައިން ވަނީ މީގެ ކުރިން އައުކޮށްފައެވެ. އޭޝިއަން އޭޖް ގްރޫޕް އެކުއަޓިކްސް ޗެމްޕިއަންޝިޕުގައި ޖުމްލަ 28 ދިވެހި ފެތުންތެރިން ވާދަކުރެއެވެ. މި މުބާރާތުގައި މިހާތަނަށް ދިވެހި ފެތުންތެރިން ވަނީ ތިން ރިކޯޑެއް ހަދާފައެވެ.