މ. ރަތްމަންދޫ އައުޓްޑޯ ވޮލީބޯޅަ ކޯޓު ތަރައްގީކުރުމުގެ މަސައްކަތް ބަޔަކާ ހަވާލުކޮށްފިއެވެ.
ކުޅިވަރާއި ހަށިހެޔޮކަމާ ބެހޭ ވުޒާރާގައި މިއަދު ކުރިޔަށްގެންދިޔަ ރަސްމިއްޔާތެއްގައި ރަތްމަންދޫ އައުޓްޑޯ ވޮލީ ކޯޓު ތަރައްގީކުރުމުގެ މަސައްކަތް ހަވާލުކޮށްފައިވަނީ އުފާ ފާގަތި ޕްރައިވެޓް ލިމިޓެޑާއެވެ.
މި އެއްބަސްވުމުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރު އިބްރާހީމް އާމިރެވެ. އަދި އުފާ ފާގަތި ޕްރައިވެޓް ލިމިޓެޑުގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ޙުސައިން ރަޝީދެވެ.
ރަތްމަންދޫ އައުޓްޑޯ ވޮލީ ކޯޓު ތަރައްގީކުރުމަށް އުފާ ފާގަތި ޕްރައިވެޓް ލިމިޓެޑާ ހަވާލުކުރީ 1،140،700.32 (އެއް މިލިޔަން އެއް ލައްކަ ސާޅީސް ހާސް ހަތް ސަތޭކަ ތިރީސް ދެ ލާރި) އަށެވެ.
މި މަސައްކަތް އުފާ ފާގަތި ޕްރައިވެޓް ލިމިޓެޑާ ހަވާލުކޮށްފައިވަނީ 40 ދުވަހުގެ ތެރޭގައި ނިންމަންޖެހޭ ގޮތަށެވެ. މި 40 ދުވަހުގެ އިތުރުން މަސައްކަތު ސައިޓާ ހަވާލުވެ، ބޭނުންވާ ސާމާނު ސައިޓަށް ޖަމާކޮށް މަސައްކަތް ފެށުމަށް 14 ދުވަސް އުފާ ފާގަތި ޕްރައިވެޓް ލިމިޓެޑަށް އިތުރަށް ލިބޭނެ ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.