ދެކުނު އޭޝިއާގެ 17 އަހަރުން ދަށާއި، 15 އަހަރުން ދަށުގެ ރީޖަނަލް ޖޫނިއަރ ޗެމްޕިއަންޝިޕުގައި ވާދަކުރާ ބެޑްމިންޓަން ކުޅުންތެރިންނާ ބައްދަލުކުރައްވައި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ހިތްވަރުދެއްވައިފިއެވެ.
އަންނަ މާޗު މަހުގެ 3-7 އަށް ޕާކިސްތާންގެ އިސްލާމްއާބާދުގައި ކުރިއަށްދާ ސަރަހައްދީ ޖޫނިއަރ މުބާރާތުގައި ރާއްޖެއިން ވާދަކުރާނީ އަށް ކުޅުންތެރިންނެވެ. އެއީ ފިރިހެން ހަތަރު ކުޅުންތެރިންނާއި، އަންހެން ހަތަރު ކުޅުންތެރިންނެވެ.
ޖޫނިއަރ ޓީމުގެ ކުޅުންތެރިންނާ ބައްދަލުކުރައްވައި ރާފިޢު ވަނީ ޖޫނިއަރ އުމުރުފުރާގެ ކުޅުންތެރިން ކުޅިވަރުގައި ކުރިއަށްދާން ކުރާ މަސައްކަތަށް ހިތްވަރުދެއްވާފައެވެ. އަދި ކުރިއަށް އޮތް މުބާރާތުގައި ރަނގަޅު ކާމިޔާބީއެއް ހޯދާނެކަމަށް އުއްމީދުކުރައްވާ ކަމަށްވެސް ވިދާޅުވިއެވެ.
ކުޅިވަރު އެކުވެނީގެ ބެޑްމިންޓަން ކޯޓުގައި ކުރިއަށްދިޔަ މި ބައްދަލުވުމުގައި ބެޑްމިންޓަން އެސޯސިއޭޝަން އޮފް މޯލްޑިވްސްގެ ރައީސް މޫސާ ނާޝިދާއި، އެ އެސޯސިއޭޝަންގެ އިސްވެރިންގެ އިތުރުން ކުޅުންތެރިންގެ ބެލެނިވެރިން ވަނީ ބައިވެރިވެފައެވެ.