ހުޅުމާލޭގައި އަމިއްލަ ފަރާތަކާ ގުޅިގެން ގާއިމުކުރާ ދުނިޔޭގެ ފެންވަރުގެ ޓެނިސް ކޮމްޕްލެކްސްގެ މަސައްކަތް މިހާރު ކުރިއަށްދާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ހުޅުމާލޭ ސިންތެޓިކް އެތުލެޓިކްސް ޓްރެކް ކައިރީގައި މި ކޮމްޕްލެކްސް ގާއިމުކުރާއިރު، މި މަޝްރޫއަށް ޚަރަދުކުރައްވަނީ ޓެނިސް އެސޯސިއޭޝަން އޮފް މޯލްޑިވްސްގެ އޮނަނަރީ ޕްރެޒިޑެންޓް އަދި މަޝްހޫރު ވިޔަފާރިވެރިޔާ އަޙްމަދު ނަޒީރު (ކްރައުން ނަޒީރު) އެވެ. މިދިޔަ އަހަރުގެ މާޗު މަހު ޓެނިސް ކޮންޕްލެކްސްގެ މަސައްކަތުގެ ބިންގާ އެޅި ނަމަވެސް، އެ މަސައްކަތް ކުރިއަށް ގެންގޮސްފައެއް ނުވެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގުރާމުގައި ވާހަކަފުޅުދައްކަވަމުން ކުޅިވަރާއި ހަށިހެޔޮކަމާ ބެހޭ ވަޒީރު ރާފިޢު ވިދާޅުވީ ހުޅުމާލޭގައި ގާއިމުކުރެވިގެންދާނީ ދުނިޔޭގެ އެންމެ ފެންވަރު ރަނގަޅު މުބާރާތްތައް ބޭއްވޭވަރުގެ ޓެނިސް ކޮމްޕްލެކްސްއެއް ކަމަށެވެ. އަދި ފާއިތުވެގެންދިޔަ އަހަރެއްހާ ދުވަހު އެކަމުގެ މަސައްކަތް ހުއްޓިފައި އޮތުމަށްފަހު، މި ސަރުކާރުން ހަވާލުވެ ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް (އެޗްޑީސީ) އާއެކު ކުރެވުނު މަސައްކަތުން މިހާރު މަސައްކަތް ކުރިއަށްދާ ކަމަށްވެސް ވިދާޅުވިއެވެ.
ރާފިޢު ވިދާޅުވީ ރާއްޖޭގެ ކުޅިވަރަށް އެކި ގޮތްގޮތުން ޚިދުމަތް ކޮށްދެއްވަމުން އަންނަ ޓެނިސް އެސޯސިއޭޝަނުގެ ކުރީގެ ރައީސް އަޙްމަދު ނަޒީރު، އަމިއްލަ ޚަރަދުގައި ހުޅުމާލޭގައި އަޅާ ޓެނިސް ކޮމްޕްލެކްސްގެ ކަންކަން އަވަސްކުރަން ކޮށްދޭން ޖެހޭ ކަންކަން، ވުޒާރާގެ ޚާއްސަ ކަމެއްގެ ގޮތުގައި ދެކިގެން ކުރަމުން އަންނަ ކަމަށެވެ.
"އަމިއްލަ ފަރާތަކުން ކުރިއަށްގެންދަން ގަސްތުކުރައްވާފައި އޮތް ކަމެއް ޓެނިސް ކޮމްޕްލެކްސް އަކީ. އެވެސް ދުނިޔޭގެ އެންމެ ފެންވަރު ރަނގަޅު މުބާރާތްތައް ބޭއްވޭ ފެންވަރުގެ ކޮމްޕްލެކްސް އެއް.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކުލަވާލެއްވި ހަފުތާ 14 ގެ މަގުޗާޓުގައި ކުޅިވަރުގެ ދާއިރާއިން ހާސިލުކުރުމަށް ކަނޑައަޅާފައިވާ ކަންކަމުގެ ތެރޭގައި ކުޅިވަރުގެ ވަސީލަތްތަކަށް ޚާއްސަ ދެ ކަމެއް ވަނީ ހިމަނާފައެވެ. އެ އީފަސް ދަނޑުގެ މައްޗަށް އެކުލެވޭ ފުޓްސަލް އާއި ނެޓްބޯޅަ ކޮމްޕްލެކްސްގެ މަސައްކަތެވެ.
ރާފިޢު ވިދާޅުވީ ރާއްޖެއަށް މި ވަގުތު ދިމާވަމުން އަންނަ މައްސަލައަކީ އައުޓްޑޯގައި ތަމްރީން ހޯދައިގެން ބައިނަލްއަގުވާމީ މުބާރާތްތަކުގައި އިންޑޯގައި އެންމެ އެކަށީގެންވާ ގޮތެއްގައި ޕާފޯމްކުރެވިގެން ނުދާ މައްސަލަ ކަމަށެވެ. އެހެންކަމުން ސަރުކާރުން އަލަށް ގާއިމުކުރުމަށް ހަމަޖެހިފައިވާ ކުޅިވަރު ކޮމްޕްލެކްސްތަކާއެކު، އެ މައްސަލައަށް ހައްލެއް ލިބިގެންދާނެ ކަމަށްވެސް ވިދާޅުވިއެވެ.
ސަރުކާރުން ގާއިމުކުރާ ފުޓްސަލް އާއި ނެޓްބޯޅަ ކޮމްޕްލެކްސް އިމާރާތްކުރާ ބިން މިހާރު ހަވާލުކޮށްފައިވާއިރު، ފުޓްސަލް ކޮމްޕްލެކްސް ގާއިމުކުރުމަށް ހަމަޖެހިފައިވަނީ ހުޅުމާލެ ފޭސް ދޭއްގައެވެ. އަދި ނެޓްބޯޅަ ކޮމްޕްލެކްސް ގާއިމުކުރާނީ ހުޅުމާލެ ފޭސް އެކެއްގައެވެ. މިއީ ރާއްޖޭގައި ގާއިމުކުރާ ފަސް ދަނޑުގެ ފުރަތަމަ ކޮމްޕްލެކްސްތަކެވެ. އަދި މި ދެ ކޮމްޕެލްކްސް ވެގެންދާނީ މަލްޓި ސްޕޯޓްސް ކުޅެވޭ ގޮތަށް ފަރުމާކުރެވިގެން ތައްޔާރުކުރެވޭ ދެ ތަނަށް ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.