ދިވެހިރާއްޖޭގައި ސިފައިންގެ ޚިދުމަތް ލިބެމުން އަންނަތާ 124 އަހަރު ފުރިއްޖެއެވެ.
ދިވެހި ސިފައިން އުފެދިފައިވަނީ މީލާދީން އަށާރަސަތޭކަ ނުދިހަ ދެވަނަ އަހަރުގެ އޭޕްރީލް މަހުގެ އެކާވީސްވަނަ ދުވަހުއެވެ. މިއަދަކީ ދިވެހި ސިފައިންގެ އަހަރީ ދުވަހެވެ. ދިވެހި ސިފައިންނަކީ ޤައުމީ ބޮޑެތި މަސްއޫލިއްޔަތުތަކެއް މަތިކުރެވި، އެ މަސްއޫލިއްޔަތުތައް އަދާކުރުމަށް މުހިންމު މަސައްކަތްތައް ކުރަމުން އަންނަ ޢަސްކަރީ ފައުޖެކެވެ. ދިވެހި ސިފައިންގެ މަސްއޫލިއްޔަތުތަކުގެ ތެރޭގައި:
* ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީއާއި ދިވެހި ދައުލަތް ޙިމާޔަތްކޮށް ރައްކާތެރިކަމާއެކު ބެލެހެއްޓުމާއި
* ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީއާ އެއްގޮތްވާ ގޮތުގެ މަތީން ދިވެހިރާއްޖޭގެ ޖުމްހޫރިއްޔާގެ މިނިވަންކަމާއި އިސްތިޤުލާލް އަދި ސިޔާދަތު ޙިމާޔަތްކޮށް، ދިފާޢުކުރުމާއި
* ދިވެހިރާއްޖޭގެ ޤާނޫނީ ވެރިކަމަށް އުނިކަމެއް އަތުވެދާނެ، ޤާނޫނާ ޚިލާފު ކޮންމެ ކަމަކުން، ދިވެހިރާއްޖޭގެ ޤާނޫނީ ވެރިކަން ޙިމާޔަތްކުރުމާއި
* ދިވެހި ދައުލަތަށް ދިމާވާ ކުއްލި ޙާލަތްތަކުގައި އަވަސް އަދި ކުއްލި ޚިދުމަތް ފޯރުކޮށްދިނުމުގެ ގޮތުން ކުރަންޖެހޭ އެންމެހާ ކަންތައް ކުރުން ހިމެނޭ.
* ދިވެހި ސިފައިން ކޮންމެ މީހަކީ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީ އާއި އިސްލާމް ދީނާއި ދިވެހިރާއްޖެ ދިފާޢުކުރުމުގައި، ތެދުވެރިކަމާއި އަމާނާތްތެރިކަންމަތީ ދެމިހުރުމަށާއި ދުޝްމިނުންނާއި ބަޣާވާތްތެރިންގެ ކިބައިން ދިވެހި ދައުލަތް ސަލާމަތްކުރުމުގައި ހަށިގަނޑާއި ފުރާނައިން ޤުރުބާންވާން ޖެހިއްޖެ ޙާލަތެއްގައި ޤުރުބާންވުމަށް މާތް ﷲ ގަންދީ ހުވާކޮށްގެން ހުންނަ މީހެއް.
* ދިވެހިރާޖޭގެ ސިފައިން އަދާކުރައްވަމުން ގެންދަވާ ޤައުމީ މަސްއޫލިޔަތުތަކުގެ ތެރޭގައި ޤައުމުގެ ދިފާޢީ މައިގަނޑު މަސައްކަތްތަކުގެ އޮތުރަށް:
* ދިވެހިރާއްޖޭގެ އިޤްތިޞާދީ ސަރަޙައްދު ބެލެހެއްޓެވުމާއި
* ރާއްޖެއަށް ދިމާވާ ޤުދުރަތީ ޙާދިސާތަކާއި ކާރިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުމުގެ މަސައްކަތްކުރެއްވުމާއި
* އަލިފާންނިއްވުމުގެ ޚިދުމަތްދެއްވުމާއި އަލިފާނުގެ ޙާދިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުމާއި
* ކަނޑުމަތީގައި ޙާލުގައިޖެހޭ މީހުން ހޯދައި ސަލާމަތްކުރުމާއި ކަނޑާއި އެއްގަމުގައި ދިމާވާ ނުރައްކާތެރި ޙާދިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުމާއި
* ދިވެހިރާއްޖޭގެ ކަނޑާއި ވައިގެ ބަނދަރުތަކުގެ ސަލާމަތްތެރިކަމާއި ރައްކާތެރިކަން ބެލެހެއްޓުން ހިމެނެއެވެ.
ދިވެހި ސިފައިންނަކީ ޚިދުމަތުގެ އަގުހުރި ތާރީޚެއް އޮތް ބައެކެވެ. ދިވެހި ސިފައިންގެ ތާރީޚުން އެންމެ ފާހަގަކުރެވޭ ޚިދުމަތަކީ، 1988 ވަނަ އަހަރުގެ ނޮވެމްބަރ މަހުގެ 3 ވަނަ ދުވަހު ބޭރުގެ ޢައިރު ޤާނޫނީ ހަނގުރާމަވެރި ޖަމާޢަތެއްގެ އެތައް ހަނގުރާމަވެރިންނާއި ހަތިޔާރާއެކު ދިވެހި މަދު ޚާއިނުންގެ ބަޔަކު ވެރިޔަށް މާލެއަށް އަރައި، ދިން ޙަމަލާތަކާ ގުޅިގެން އެ ހަނގުރާމަވެރިންނާ ދެކޮޅަށް ކުރި ހަނގުރާމައެވެ. މި ޙާދިސާގައި ދިވެހި ސިފައިން ވަނީ އިސްލާމްދީނާއި ދިވެހި ޤައުމުގެ ދިފާޢުގައި ސާބިތުކަމާއެކު ހަނގުރާމަކޮށް، ދިވެހި ރައްޔިތުންނާއި ދިވެހި ދައުލަތާއި ޤައުމާއި ޤާނޫނީ ވެރިކަން ސަލާމަތްކުރުމުގައި ކާމިޔާބީ ހޯއްދަވާފައެވެ. އެ ޙަމަލާތަކުގައި ދިވެހި ސިފައިން ބަޔަކާއި ދިވެހި ޢާންމުގެ ބަޔަކު ޝަހީދުވެފައިވެއެވެ. އަދި ބޭރުން އެރި އެތައް ހަނގުރާމަވެރިންނެއް މަރާލާފައިވެއެވެ.
ދިވެހި ސިފައިންގެ ޚިދުމަތަކީ ގިނަ ޒަމާންތަކެއް ވަންދެން މާލޭގައި ޤާއިމްވެ ތިބި ބަޔެއްނަމަވެސް، ފަހުން ވަނީ ރާއްޖޭގެ އެކި ސަރަޙައްދުތަކުގައި ސިފައިންގެ މަރުކަޒުތައް ޤާއިމްކުރައްވައި އެތަންތާނގައި ޚިދުމަތް ދެއްވަން ފަށްޓަވާފައެވެ. އަދި ސިފައިންގެ މައްޗަށް އޮތް ޤައުމީ ވާޖިބު އަދާކުރެއްވުމަށް ބޭނުންވާ ލޮޖިސްޓިކް ޤާބިލްކަމާއި ސިފައިންގެ ތަމްރީނާއި ހުނަރުގެ ޤާބިލްކަން އިތުރުކުރެއްވުމުގައި ވަނީ ކުރިއެރުންތައް ހޯއްދަވާފައެވެ. ޚާއްޞަކޮށް ދުނިޔޭގެ އެންމެ މަތީފެންވަރުގެ ޢަސްކަރީ ތަމްރީން ލިބިފައިވާ ސިފައިން ދިވެހި ސިފައިންގެ ތެރޭގައި ހިމެނޭކަން ފާހަގަކުރެވެއެވެ.
ދިވެހި ސިފައިންގެ އަހަރީ ދުވަސް ކޮންމެ އަހަރަކުވެސް އަންނަނީ ފާހަގަކުރަމުންނެވެ. މިކަމަށްޓަކައި ކުރެވޭ މަސައްކަތްތައް ޢާންމުކޮށް ބިނާކުރައްވަނީ ސިފައިންގެ ޚިދުމަތާމެދު ރައްޔިތުންނަށް އޮންނަ އިތުބާރު ވަރުގަދަކުރައްވައި ސިފައިންގެ ތަޞައްވުރު ރަނގަޅު ކުރައްވައި، ސަފުތައް ބަދަހިކުރައްވައި އަދި ޤައުމީ ރޫޙު ވަރުގަދަ ކުރެއްވުމުގެ މައްޗަށެވެ.