ކާމިޔާބުކަމާއެކު ދެވަނަ ޑިވިޝަން ނިންމާލެވުނީ އެފްއޭއެމްގެ މުވައްޒަފުންގެ ހިތްވަރުން: ޖައުޝަން
ނިމިގެންދިޔަ އެމްޕީއެލް ދެވަނަ ޑިވިޝަން ފުޓްބޯޅަ މުބާރާތް ކާމިޔާބުކަމާއެކު ނިންމާލެވުނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މުވައްޒަފުންގެ ހިތްވަރުން ކަމަށް އެ އިދާރާގެ އެކްޓިން ޖެނެރަލް ސެކްރެޓްރީ މުޙައްމަދު ޖައުޝަން ޝަރީފް ވިދާޅުވެއްޖެއެވެ.
މުބާރާތް ކާމިޔާބުކަމާއެކު ނިންމާލުމަށްފަހު "ޕީއެސްއެމް ސްޕޯޓްސް" އަށް ދިން އިންޓަވިއުއެއްގައި ޖައުޝަން ވަނީ މުބާރާތަށް އެކިއެކި ގޮތްގޮތުން ސްޕޮންސަރ ދިން ފަރާތްތަކުގެ ނަންތައް ފާހަގަކުރައްވާފައެވެ. ޖައުޝަން ވިދާޅުވީ މުބާރާތުގެ ކުރިންވެސް އަދި މުބާރާތުގެ ތެރޭގައިވެސް އެކި ކަހަލަ ގޮންޖެހުންތަކާ ކުރިމަތިވި ކަމަށާއި، އުއްމީދަކީ މިހާރު މި އޮތް ރޫހުގައި ކުރިއަށް ހުރި މުބާރާތްތައް ކާމިޔާބުކަމާއެކު ކުރިއަށްގެންދިޔުން ކަމަށެވެ.
މި އަހަރުގެ ސީޒަނުގެ މުބާރާތްތައް ފެށުމައްޓަކައި ތައްޔާރީތައްވަމުން އަންނަކަން ފާހަގަކުރައްވަމުން ޖައުޝަން ވިދާޅުވީ އެފްއޭއެމުގެ އެކްޓިވިޓީ ކަލަންޑަރު ނިންމުމަށްފަހު، ވަރަށް އަވަހަށް ކުލަބުތަކާ ހިއްސާކުރާނެ ކަމަށެވެ.
"އެފްއޭއެމުގެ މުވައްޒަފުން މި ހާލަތުގައިވެސް ދެއްވި އެއްބާރުލުން, ވެދެއްވި އެހީތެރިކަން މުބާރާތް ކުރިއަށްގެންދިޔުމައްޓަކައި. އަޅުގަނޑާއެކު ކުރި މަސައްކަތް ފާހަގަކޮށް ޝުކުރުއަދާކުރަން.މުޙައްމަދު ޖައުޝަން ޝަރީފް - އެފްއޭއެމުގެ އެކްޓިން ޖެނެރަލް ސެކްރެޓްރީ
ނިމިދިޔަ ސީޒަނުގެ ދެވަނަ ޑިވިޝަން ފުޓްބޯޅަ މުބާރާތް ބާއްވާފައިވަނީ އެކި ފަހަރު މަތިން މުބާރާތް ފަސްކުރުމަށްފަހުއެވެ. އެގޮތުން މިދިޔަ އަހަރުގެ ޑިސެމްބަރު މަހު މުބާރާތް ފެށިއިރު، މި މުބާރާތް އެންމެ ފުރަތަމަ ބާއްވަން ތާވަލުކުރީ މިދިޔަ އަހަރުގެ ނޮވެމްބަރު މަހުގެ 20 ވަނަ ދުވަހެވެ. މީގެ އިތުރުން ގަލޮޅު ދަނޑުގައި ލައިޓް ނެތުމުން، މުބާރާތުގެ މެޗުތައް ކުރިއަށްދިޔައީ ހަމައެކަނި ހަވީރު ވަގުތުގައެވެ. އެއާއެކު މުބާރާތް ދިގުލައިގެން ދިޔުމުން، ކުލަބުތަކުން ވަނީ ކަންބޮޑުވުން ފާޅުކޮށްފައެވެ.
އެފްއޭއެމުގެ މުވައްޒަފުންގެ ހިތްވަރުން ދެވަނަ ޑިވިޝަން ކާމިޔާބުކަމާއެކު ބޭއްވިއިރު، އެ އިދާރާގެ މުވައްޒަފުންނަށް ނުދެވި ހުރި އަހަރެއްހާ ދުވަހުގެ މުސާރައިގެ ތެރެއިން، އަށް މަސްދުވަހުގެ މުސާރަ ނިމިދިޔަ ހަފުތާގައި ވަނީ ދީފައެވެ.