ގައުމީ ބާސްކެޓްބޯޅަ މުބާރާތުގެ އަންހެން ޑިވިޝަނުގެ ޗެމްޕިއަންކަން ކުއީންސް ބާސްކެޓްބޯލް ކުލަބުން ހޯދައިފިއެވެ.
ކުއީންސްއިން ޗެމްޕިއަންކަން ހޯދީ ޒުވާނުންގެ މަރުކަޒުގެ އެތެރޭ ކޯޓުގައި ރޭ ކުޅުނު ފައިނަލް މެޗުގައި ފަސޭހަކަމާއެކު 97-52 ޕޮއިންޓުން އެލީޓް ބާސްކެޓްބޯލް ކުލަބު ބަލިކޮށްގެންނެވެ.
މި ފަހަރުގެ އަންހެން ޑިވިޝަނުގެ ލީގު ޗެމްޕިއަންކަން ހޯދީވެސް ކުއީންސްއެވެ. އެ މުބާރާތުގައިވެސް ކުއީންސްއާ އެންމެ ގާތުން ވާދަކުރީ އެލީޓެވެ. އަދި ކުއީންސްއިން ވަނީ މި ފަހަރުގެ ލީގާއި ގައުމީ މުބާރާތުގައި ކުޅުނު ހުރިހާ މެޗެއް ކާމިޔާބުކޮށް، ސައްތައިން ސައްތަ ރިކޯޑެއް ދަމަހައްޓާފައެވެ.
ރޭ ކުޅުނު ފައިނަލް މެޗުގައި ކުއީންސްއިން މޮޅު ކުޅުމެއް ދެއްކިއިރު، ތަޖުރިބާކާރު ކުޅުންތެރިޔާ ފާތިމަތު ރިޝްމާ ވަނީ 29 ޕޮއިންޓް ހޯދައިދީ 22 ރީބައުން ނަގައިދީ ފަސް އެސިސްޓް ކޮށްފައެވެ. އަދި އެ ޓީމުގެ އާމިނަތު ޝިއުރާ އަބްދުލް ބާރީ ވަނީ 18 ޕޮއިންޓް ހޯދައިދީ 22 ރީބައުން ނަގައިދީ ތިން އެސިސްޓް ކޮށްފައެވެ. މި މެޗުގައި އެލީޓް ސްޕޯޓްސް ކުލަބަށް އެންމެ ރަނގަޅު ކުޅުމެއް ދެއްކީ ފާތިމަތު އީހައު ޝަމީމެވެ. އެގޮތުން އޭނާ ވަނީ 13 ޕޮއިންޓް ހޯދައިދީ ދެ ރީބައުން ނަގައިދީ އެއް އެސިސްޓް ކޮށްފައެވެ.
މި މުބާރާތުގެ ފައިނަލް މެޗުގެ އެންމެ މޮޅު ކުޅުންތެރިއަކަށް ހޮވުނީ ކުއީންސްގެ ރިޝްމާއެވެ. އަދި އެންމެ އުންމީދީ ކުޅުންތެރިއަކަށް ހޮވިފައިވަނީ އެލީޓުގެ ކައިލީން ޝިރުހާނެވެ.
މި މޮޅާއެކު ކުއީންސްއިން ގައުމީ މުބާރާތުގެ ޗެމްޕިއަންކަން ހޯދިއިރު، މި އަހަރުގެ ކުރިން އެ ޓީމުން އެންމެ ފަހުން ގައުމީ މުބާރާތް ކާމިޔާބުކޮށްފައިވަނީ 2020 ވަނަ އަހަރެވެ.