ރާއްޖޭގައި މިހާރު ލިބެން ނެތް ސްޕެޝަލިސްޓް އަދި ސުޕަރ ސްޕެޝަލިސްޓުންގެ ޚިދުމަތްތަކާއި، ރާއްޖެއިން ލިބެން ހުރި ބައެއް ސުޕަރ ސްޕެޝަލިޓީގެ ޚިދުމަތްތައް، ފޯރުކޮށްދިނުމުގެ ގޮތުން ރާއްޖެއިން ބޭރުގެ 3 ޑޮކްޓަރަކަށް ދެއްކުމުގެ އިންތިޒާމް ހިތަދޫ ރީޖަނަލް ހޮސްޕިޓަލްގައި ހަމަޖައްސާފައިވާ ކަމަށް އާސަންދަ ކުންފުނިން ބުނެފިއެވެ.
ހިތަދޫ ރީޖަނަލް ހޮސްޕިޓަލްގައި މިމަހުގެ 25 އަދި 26 ވަނަ ބައްލަވާނީ ނާރުގެ ބަލިތަކަށް ޚާއްސަ ޑޮކްޓަރަކާއި، ހަޖަމްކުރުމުގެ ނިޒާމާއި ގޮހޮރުގެ ބަލިތަކަށް ޚާއްސަ އަދި ކިޑްނީގެ ބަލިތަކަށް ޚާއްސަ ޑޮކްޓަރުންކަމަށް އާސަންދަ ކުންފުނިން ބުނެއެވެ.
ނާރުގެ ބަލިތަކަށް ޚާއްސަ ޑޮކްޓަރު ފަރުވާ ދެއްވާނީ، ކަންކަމުގެ ތެރޭގައި ސިކުނޑީގެ ބަލި، މައިބަދައިގެ މައްސަލަތައް، ނާރާއި މަސްގަނޑަށް ދިމާވާ މައްސަލަތަކަށް ފަރުވާކުރުން ހިމެނެއެވެ. އެގޮތުން ވާގިނެތޭ ބަލި، ވެއްޓޭބަލި، އުމުރުން ދުވަސްވުމާއި ގުޅިގެން ދިމާވާ ހަނދާންނެތޭ ބަލި އަދި އާދަޔާ ޚިލާފަށް އެކިއެކި ތަންތަން އައްސިވުމާއި، މެނިންޖައިޓިސް ފަދަ ބަލިތައް ހިމެނޭކަމަށް އެފަރާތުން ބުނެއެވެ.
ހަޖަމް ކުރުމުގެ ނިޒާމާއި، ގޮހޮރުގެ ބަލިތަކަށް ޚާއްސަ ޑޮކްޓަރު ބައްލަވާނީ، ހަޖަމުކުރުމުގެ ނިޒާމުގެ ބަލިތަކަށެވެ. މީގެތެރޭގައި ބަނޑާއި ގޮހޮރުގެ އަދި ބޮޑުކަމުދާ ނިޒާމުގެ މައްސަލަތައް ހިމެނެއެވެ. އެގޮތުން ބަނޑުގައި ފާރު ހެދުން، ގޭހުގެ އުދަގޫވާ މީހުން، ޗިސްމޭ އަދި ޕޭންކްރިއޭސްގެ މައްސަލަތައް ހުންނަ މީހުން، ބޮޑުކަމުދާ ނިޒާމުގެ މައްސަލަތައް ހުންނަ މީހުން އަދި ހެޕަޓައިޓިސް ސީ އަދި ބީ ހުންނަ މީހުން ހިމެނެއެވެ.
މީގެ އިތުރުން ކިޑްނީގެ ބަލިތަކަށް ޚާއްސަ ޑޮކްޓަރު ބައްލަވާނީ، ކިޑްނީ ފެއިލްވުމާއި، ކިޑްނީގައި ހިލަ އުފެދުމާއި، ކިޑްނީ ބަދަލުކޮށްފައިވާ ބަލި މީހުން އަދި ޑައިލިސިސް ހަދަމުންދާ ބަލިމީހުން ހިމެނެއެވެ.
މިއީ، އާސަންދައިގެ ދަށުން އެންޕެނަލްވެފައިވާ ރާއްޖެއިން ބޭރުގެ ހޮސްޕިޓަލްތަކުގެ އެހީއާއެކު ކުރިއަށް ގެންދާ ޕްރޮގްރާމްގެ ދަށުން ކުރިއަށް ގެންދާ ޕްރޮގްރާމެކެވެ. މިޕްރޮގްރާމްގެ ދަށުން ހުޅުމާލެ ހޮސްޕިޓަލްގައިވެސް ވަނީ ބޭރުގެ ދެ ޑޮކްޓަރަކު ބަލި މީހުން ބައްލަވާފައެވެ.