ޔޫތު ޑިވެލޮޕްމަންޓް ޕްރޮގްރާމުގެ ދަށުން އަލަށް ތައާރަފުކުރެވުނު އެކެޑަމީތަކާއެކު، ކެރަމްގެ މުސްތަގުބަލާ މެދު ކުރެވޭ އުއްމީދު ބޮޑު ކަމަށް ކެރަމް އެސޯސިއޭޝަނުގެ ސެކްރެޓަރީ ޖެނެރަލް ހުސެއިން ރައުޝަން ވިދާޅުވެއްޖެއެވެ.
ކެރަމްގެ ތާރީޚުގައި މި އަހަރު އަލަށް އުފެދުނު އެކެޑަމީތަކުގައި 500 އަށްވުރެ ގިނަ ކުދިން ހަރަކާތްތެރިވަމުންދެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގުރާމުގައި ކެރަމް އެކެޑަމީތަކުގެ ތަފުސީލުތައް ހިއްސާކުރައްވަމުން ރައުޝަން ވިދާޅުވީ މި ވަގުތު މާލެ ސަރަހައްދުގައި އެކެޑަމީތަކުގެ މަސައްކަތް ކުރިއަށްދިޔަ ނަމަވެސް، އުއްމީދަކީ އަތޮޅުތެރެއަށް އެކެޑަމީތަކުގެ ހަރަކާތްތައް ފުޅާކުރުން ކަމަށެވެ. އަދި އަތޮޅުތަކަށް ކެރަމް ފުޅާކުރުމަށް ކޮންމެ ކުއާޓަރެއްގައި ދެ ރަށް ނުވަތަ ގިނަވަގެން ތިން ރަށުގައި ކެރަމް ތައާރަފުކުރުމުގެ މަސައްކަތް މިހާރު ފެށިފައިވާ ކަމަށްވެސް ވިދާޅުވިއެވެ.
"މިދިޔަ ކުއާޓަރުގައި އަޅުގަނޑުމެން ވާނީ ދެ ރަށަކަށް ގޮސް، އެ ދެ ރަށުގައި ކެރަމް މުބާރާތްތައް ފެށި، ކެރަމް ކުޅެވޭނެ ވަސީލަތްތައްވެސް ހަދިޔާކޮށްފައި.ހުސެއިން ރައުޝަން - ކެރަމް އެސޯސިއޭޝަނުގެ ސެކްރެޓަރީ ޖެނެރަލް
ރައުޝަން ވިދާޅުވީ މާލެ ސަރަހައްދުގައި އެކެޑަމީތައް އުފެދުމާއެކު، މުބާރާތްތަކުގެ ފޯމެޓަށް މިހާރު ބަދަލުތަކެއް ގެނެވިފައިވާ ކަމަށެވެ. އެގޮތުން މީގެ ކުރިން ޖޫނިއަރ އަދި ސީނިއަރ ކެޓެގަރީތަކަށް ޚާއްސަކުރި މުބާރާތްތައް މިހާރު ވާނީ އުމުރުފުރާތަކަކަށް ބަހާލެވިފައި ކަމަށްވެސް ވިދާޅުވިއެވެ.
ރައުޝަން ވިދާޅުވީ ކުރިން ޑިވެލޮޕްމަންޓަށް ކުރެވޭ ހަމައެކަނި މަސައްކަތަކީ އިންޓަރ ސުކޫލް މުބާރާތް ކަމަށެވެ. އޭގެ ބަދަލުގައި އެސޯސިއޭޝަނުން ރާވާ މުބާރާތްތައް އުމުރުފުރާތަކަށް ބަހާލުމަށް ގަސްތުކުރާ ކަމަށާއި، އެ ބަދަލާއެކު އުމުރުފުރާތަކުގެ ކުޅުންތެރިންގެ މެދުގައި ވާދަވެރިކަން އިތުރުވެގެންދާނެ ކަމަށްވެސް ވިދާޅުވިއެވެ.
އޭގެ ސަބަބުން މިހާރު ތައްޔާރުކުރަމުންދާ ޖޫނިއަރ ސްކޮޑް އެކުލަވާލުމަށް ފަސޭހަތަކެއް ވެގެންދާނެ ކަމަށްވެސް ރައުޝަން ވިދާޅުވިއެވެ. އަދި އިންޓަރ ސުކޫލާއި އެކެޑަމީތަކުން ހޮވާލެވޭ ކުދިންނާއެކު އިންޑިއާ ކަހަލަ ގައުމަކަށް ގޮސް، އިތުރު ތަމުރީންތަކެއް ދިނުން އެއީ އަމާޒެއް ކަމަށްވެސް ވަނީ ވިދާޅުވެފައެވެ.