ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އެކްސްޓްރާ އޯޑިނަރީ ކޮންގްރެސްއެއް ބާއްވައި، އެ އެސޯސިއޭޝަނުގެ އަސާސީ ގަވާއިދު ފާސްކޮށްފިއެވެ.
ސޮލައިޓް ރެސްޓޯރަންޓުގައި މިރޭ ބޭއްވި މި ކޮންގްރެސްގައި އަސާސީ ގަވާއިދު ފާސްކުރެވިގެންދިޔައީ ބައްދުލުވުމުގައި ބައިވެރިވި ކުލަބަތަކުގެ ފުރިހަމަ އަގުލަބިއްޔަތާއެކުއެވެ. މި ބައްދުވުން ޗެއާ ކުރެއްވީ ވީއޭއެމުގެ ރައީސް މުޙައްމަދު ރަނޭޝްއެވެ. މި ބައްދަލުވުމުގައި ވޮލީބޯލް އެކެޑަމީ ހިންގުމުގެ އުސޫލުވެސް ވަނީ ފާސްކޮށްފައެވެ.
އެކްސްޓްރާ އޯޑިނަރީ ކޮންގްރެސްގައި މެންބަރު ކުލަބުތަކާ ވާހަކަދައްކަވަމުން ރަނޭޝް ވަނީ އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް ކުލަބުތަކުން ގުޅިގެން ކުރި މަސައްކަތް ފާހަގަކުރައްވާފައެވެ. އަދި އެންމެ އެއްބައިވެ، ކުރިމުގައި ރަނގަޅު މަސައްކަތެއް ކުރެވޭނެ ކަމަށް އުއްމީދުކުރައްވާ ކަމަށްވެސް ވަނީ ވިދާޅުވެފައެވެ.
ވޮލީގެ އެކްސްޓްރާ އޯޑިނަރީ ކޮންގްރެސްއެއް މި ބޭއްވީ އެ އެސޯސިއޭޝަނުގެ އިދާރީކަންކަން ހަރުދާނާކުރުމަށް ކުލަބުތަކުން އިސްވެ ފަށާފައިވާ މަސައްކަތުގެ ތެރެއިންނެވެ. ވީއޭއެމުގެ ކަންކަން މި ފަހުން ހަމަޔަކަށް އެޅެމުން އަންނައިރު، އެ އެސޯސިއޭޝަނުގެ ރައީސް ރަނޭޝްގެ ސްޕެޝަލް އެޑްވައިޒަރަކަށް ކުރީގެ ރައީސް މުޙައްމަދު ލަތީފް ދާދި ފަހުން ވަނީ އައްޔަންކުރައްވާފައެވެ. އަދި ވީއޭއެމުގެ ޖެނެރަލް ސެކްރެޓަރީގެ މަގާމަށް މުޙައްމަދު ސައީދުވެސް ވަނީ އައްޔަންކުރައްވާފައެވެ.
ވީއޭއެމުގެ އެކްސްޓްރާ އޯޑިނަރީ ކޮންގްރެސްއެއް ބޭއްވިއިރު، މިދިޔަ އަހަރުގެ ޑިސެމްބަރު މަހުގެ ފަހުކޮޅު އެ އެސޯސިއޭޝަނުގެ އަހަރީ އާންމު ޖަލްސާއެއްވެސް ވަނީ ބާއްވާފައެވެ. އެ ޖަލްސާގައި ވަނީ މި އަހަރަށް 25 މިލިޔަން ރުފިޔާގެ ބަޖެޓެއް ކަނޑައަޅައި، ފާސްކޮށްފައެވެ. އަދި ދެން އެންމެ އަވަހަށް އޮންނަ އަހަރީ އާންމު ޖަލްސާއެއްގައި ވީއޭއެމުގެ ހުސްވެފައި ހުރި މަގާމުތަކަށް ބޭފުޅުން އިންތިޚާބުކުރަންވެސް ފާސްކުރިއިރު، މި އަހަރުގެ އަހަރީ އާންމު ޖަލްސާ އަންނަ މާޗު މަހުގެ 31 ވަނަ ދުވަހުގެ ކުރިން ބޭއްވުމަށްވެސް ވަނީ ނިންމާފައެވެ.