އެމްޕީއެލް ދެވަނަ ޑިވިޝަން ފުޓްބޯޅަ މުބާރާތުގެ ފައިނަލަށް ނިކުންނައިރު، ޓީމުގެ ކުޅުންތެރިން ބޭނުންވާނަމަ ކޯޗަށްޓަކާ ތަށި ކާމިޔާބުކުރުމުގެ ވިސްނުން ފިޔަވާ އިތުރު ވިސްނުމެއް ނެތް ކަމަށް މަސްއޮޑި ސްޕޯޓްސް ކުލަބުގެ ކޯޗު މުޙައްމަދު އާތިފް (އާތީ) ބުނެފިއެވެ.
މަސްއޮޑި ޓީމުން މުބާރާތުގެ ފައިނަލުގެ ޖާގައެއް ހޯދައި، ފުރަތަމަ ޑިވިޝަނަށް ކޮލިފައިވީ ސެމީ ފައިނަލް މެޗުގައި ޓެންޓް ސްޕޯޓްސް ކުލަބު 5-1 ގެ ނަތީޖާއަކުން ބަލިކުރުމަށްފަހު އެވެ.
އެ މެޗަށްފަހު އާތީ ބުނީ ޓީމުން ހަވާލުކުރި ޒިންމާ އަދާކުރެވިއްޖެ ކަމަށާއި، ތަށި ހޯދުން އޮތީ ކުޅުންތެރިންގެ އަތްމަތީގައި ކަމަށެވެ. ފުރަތަމަ ފަހަރަށް ރާއްޖޭގެ ފުރަތަމަ ޑިވިޝަނަށް މަސްއޮޑި ކޮލިފައިކޮށްދިން ކޯޗު ބުނީ މުބާރާތުގައި ވާދަކުރި ބައެއް ޓީމުތަކުން ސީރިއަސްނުވުމުގެ ސަބަބުން އެކަމުގެ ގެއްލުން ރަނގަޅަށް ތައްޔާރުވި ޓީމުތަކަށް ކުރިކަމަށެވެ.
އެގޮތުން ބައެއް ޓީމުތަކުން މެޗުތަކަށް ހާޒިރުނުވުން ފާހަގަކޮށް އާތީ ބުނީ މި މުބާރާތުގައި ބައެއް ޓީމުތަކުން ކުޅުނީ ހަމައެކަނި މުބާރާތުގައި ބައިވެރިވުމަށް ކަމަށެވެ.
އާތީ ބުނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ވެސް މުބާރާތަށް އެންމެ ރަނގަޅަށް ތައްޔާރުނުވާ ކަމަށާއި، ކުޅުންތެރިންނަށް އެންމެ ބޭނުން ހިފޭ ގަޑިއެއްގައި މެޗުތައް ކުޅެން ކުރިއަށްއޮތް ތަނުގައި ރޭވުން މުހިންމު ކަމަށެވެ.
"ފެޑެރޭޝަނުންވެސް މިވަރުގެ މުބާރާތެއް ބާއްވާއިރު މުބާރާތް ތިނެއް ޖަހާއިރު ކުޅުމަކީ ރަނގަޅުކަމެއް ނޫންކަންނޭގެ, ތިނެއް ޖަހާއިރު މެޗު ކުޅުމުގެ ބަދަލުގައި މިސާލަކަށް ހަތަރެއް ޖަހާއިރު ކުޅެން، ކުޅުންތެރިންގެ އެންމެ މެކްސިމަމް ލިބޭނެ ގަޑިއެއްގައި ކުޅުންމުޙައްމަދު އާތިފް (އާތީ) - މަސްއޮޑީގެ ކޯޗު
އާތީ ބުނީ ކުޅިވަރު އިދާރާއި އެފްއޭއެމް ގުޅިގެން މުސްތަޤްބަލުގައި ޒުވާނުންނަށްޓަކައި ހެޔޮ ބަދަލެއް ގެންނާނެކަމުގެ އުންމީދުކުރާ ކަމަށެވެ.
މުބާރާތުގެ ފައިނަލުގައި ހުކުރު ދުވަހުގެ ހަވީރު މަސްއޮޑި ނިކުންނާނީ ވިކްޓަރީ ސްޕޯޓްސް ކުލަބާ ދެކޮޅަށެވެ. މިދިޔަ ސީޒަނުގެ ތިންވަނަ ޑިވިޝަނުގެ ފައިނަލުގައި މަސްއޮޑި ވާދަކުރިއިރު، އެ ފައިނަލުން އެ ޓީމު ވަނީ ބަލިވެފައެވެ.