ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އެކްސްޓްރާ އޯޑިނަރީ ކޮންގްރެސްގެ ފުރަތަމަ ބައްދަލުވުމަށް ކޯރަމް ހަމަނުވުމުން، ދެވަނަ ބައްދަލުވުމެއް ބާއްވައި ކޮމިޓީތައް ފާސްކޮށްފިއެވެ.
މި ކޮންގްރެސްއަކީ އެފްއޭއެމުގެ އަސާސީ ގަވާއިދުގެ ދަށުން ކޮންމެހެން ހަދަންޖެހޭ ބައެއް ކޮމިޓީތައް އެކުލަވާލާފައިނުވާތީވެ، ފީފާ އާއި އޭއެފްސީން އެކަން ކުރަން އެންގުމުން ބޭއްވި ކޮންގްރެސްއެކެވެ. ޗަމްޕާ ސެންޓްރަލް ހޮޓެލްގައި މިއަދު ބޭއްވި ކޮންގްރެސްގައި ބައިވެރިވުމަށް ނުވަ ކުލަބެއް ރަޖިސްޓްރީވި ނަމަވެސް، ކޮންގްރެސްގައި ބައިވެރިވެފައިވަނީ ފަސް ކުލަބެކެވެ. އޭގެ ތެރެއިން ޔުނައިޓެޑް ވިކްޓަރީ ކޮންގްރެސްގައި ބައިވެރިވީ އޮންލައިންކޮށެވެ.
އެހެންކަމުން ކޯރަމް ހަމަނުވެގެން އެކްސްޓްރާ އޯޑިނަރީ ކޮންގްރެސްގެ ފުރަތަމަ ބައްދަލުވުން ނިންމާލިއިރު، އޭގެ އިރުކޮޅެއް ފަހުން ވަނީ އަސާސީ ގަވާއިދާ އެއްގޮތަށް ދެވަނަ ބައްދަލުވުމެއް ބާއްވާފައެވެ. އެފްއޭއެމުން ބުނީ ކޯރަމް ހަމަނުވެގެން އެކްސްޓްރާ އޯޑިނަރީ ކޮންގްރެސް ކެންސަލް ކުރަން ޖެހުމުން، 24 ގަޑިއިރުގެ ތެރޭގައި ދެވަނަ ބައްދަލުވުމެއް ބޭއްވުމުގެ ފުރުސަތު އޮންނަ ކަމަށެވެ. އަދި އެ ބައްދަލުވުމުގައި ކޯރަމް ހަމަކުރަން ނުޖެހޭ ކަމަށްވެސް ވަނީ ބުނެފައެވެ. މިއަދުގެ ބައްދަލުވުން ބާއްވާފައިވަނީ ސްޕޯޓްސް ކޮމިޝަނާއި، ކުޅިވަރާ ބެހޭ ވުޒާރާ އާއި، މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ އިތުރުން އޭއެފްސީގެ މަންދޫބުންނާއެކުގައެވެ.
އެކްސްޓްރާ އޯޑިނަރީ ކޮންގްރެސްގެ ދެވަނަ ބައްދަލުވުން ފަށައި އެފްއޭއެމުން ވަނީ ކޮންގްރެސްގައި ބައިވެރިވި ފަސް ކުލަބުގެ އިއްތިފާގުން ހަތަރު ކޮމިޓީއެއް ފާސްކޮށްފައެވެ. އެއީ އިންތިޚާބާ ގުޅޭ އިލެކްޓޯރަލް ކޮމިޓީ އާއި، އިލެކްޓޯރަލް އެޕީލްސް ކޮމިޓީގެ އިތުރުން ޑިސިޕްލިނަރީ ކޮމިޓީ އާއި އެޕީލްސް ކޮމިޓީއެވެ.
ފީފާ އާއި އޭއެފްސީން އެންގުމުން އެފްއޭއެމުން އެކްސްޓްރާ އޯޑިނަރީ ކޮންގްރެސްއެއް ބޭއްވިއިރު، މިދިޔަ ޖެނުއަރީ މަހުގެ 31 ވަނަ ދުވަހު ބާއްވަން ތާވަލުކުރި އެ އިދާރާގެ އިންތިޚާބުގެ ކަންކަން ހުއްޓާލަން ފީފާ އާއި އޭއެފްސީން މީގެ ކުރިން ވަނީ އަންގާފައެވެ. ފީފާ އާއި އޭއެފްސީން އެގޮތަށް އެންގީ އިންތިޚާބުގައި ރައީސް ކަމަށް ވާދަކުރައްވަން ހުށަހެޅި، އެ އެސޯސިއޭޝަންގެ ކުރީގެ ރައީސް އަޙްމަދު ޠާރިޤު (ޓޮމް) ގެ ކެންޑިޑެސީ ބާތިލުކުރަން އެފްއޭއެމުގެ އިލެކްޓޯރަލް ކޮމިޓީން ނިންމާފައިވަނިކޮށް، އިލެކްޓޯރަލް ކޮމިޓީ އެކުލަވާލައިފައިވާ ގޮތް ސައްހަ ނޫން ކަމަށް ބަޔާންކޮށެވެ.
ފީފާ އާއި އޭއެފްސީން ވަނީ އެފްއޭއެމުގެ އިންތިޚާބާ ގުޅޭ މި ހުރިހާ ހަރަކާތެއް ގާތުން ބަލަމުންގެންދާނެ ކަމަށްވެސް އަންގާފައެވެ. ޠާރިޤުގެ އިތުރުން އެފްއޭއެމް އިންތިޚާބަށް ވާދަކުރައްވަން ކެންޑިޑެސީ ފޯމު ދެން ހުށަހަޅުއްވާފައިވަނީ ކުލަބު އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އެވެ.