ގަތަރުގައި މިހާރު ކުރިއަށްދާ އޭއެފްސީ އޭޝިއަން ކަޕުގެ ސެމީ ފައިނަލް ފުރަތަމަ މެޗުގައި ދެކުނު ކޮރެއާ ބަލިކޮށް، ފައިނަލުގެ ޖާގައެއް ޖޯޑަންއިން ހޯދައިފިއެވެ.
އަހްމަދު ބިން އަލީ ސްޓޭޑިއަމުގައި މިރޭ ކުޅުނު ސެމީ ފައިނަލް މެޗު ޖޯޑަންއިން ކާމިޔާބުކުރީ 2-0 ގެ ނަތީޖާއަކުންނެވެ. މި މޮޅާއެކު ޖޯޑަން ފައިނަލަށް ދަތުރުކުރިއިރު، މިއީ އޭޝިއަން ކަޕުގެ ފައިނަލުން އެ ޓީމު ޖާގައެއް ހޯދި ފުރަތަމަ ފަހަރެވެ.
މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި އެއްވެސް ލަނޑެއް ފެނިފައެއް ނުވެއެވެ. އެކަމަކު ދެވަނަ ހާފު ފަށައިގެން އަށްވަނަ މިނެޓުގައު ޖޯޑަންއިން ވަނީ ލީޑު ނަގާފައެވެ. މޫސާ އަލް-ތަމާރީ ދިން ބޯޅައަކުން މި ލަނޑު ކާމިޔާބުކޮށްދިނީ ޔަޒާން އަލް-ނައިމަތެވެ. އަދި މެޗުގެ 66 ވަނަ މިނެޓުގައި ނިޒާރް މަހްމޫދު އަލް-ރަޝްދާންގެ އެހީއާއެކު އަލް-ތަމާރީ ވަނީ ލަނޑެއް ޖަހައި، ޖޯޑަންގެ ލީޑު ފުޅާކޮށްދީފައެވެ.
މި މެޗުން ބަލިވެ ޔާގަން ކްލިންސްމަންގެ އިރުޝާދުދެމުން އަންނަ ދެކުނު ކޮރެއާ މުބާރާތުން ކެޓިއިރު، މި ފަހަރުގެ އޭޝިއަން ކަޕުގައި އެންމެ ފަހުން ކުޅުނު ހަތަރު މެޗުގައިވެސް އެ ޓީމު މޮޅުވެފައިވަނީ ފަހަތުން އަރައި ލަނޑު ޖަހައިގެންނެވެ. އެގޮތުން އޭޝިއަން ކަޕުގެ ޗެމްޕިއަންކަން ދެ ފަހަރު ހޯދާފައިވާ ދެކުނު ކޮރެއާ ސެމީއަށް ދަތުރުކުރީ ފަހު ވަގުތު ލަނޑު ޖަހައި ސައުދީ އަރަބިއްޔާ އާއި އޮސްޓްރޭލިއާ ބަލިކުރުމަށްފަހުއެވެ.
މި ފަހަރުގެ މުބާރާތުގެ ފައިނަލުގައި ޖޯޑަން ވާދަކުރަން ޖެހޭނީ ސެމީ ފައިނަލް ދެވަނަ މެޗުގައި މުބާރާތް ބާއްވާ ގައުމު ކަމަށްވާ ގަތަރާއި އިރާން ކުޅެގެން މޮޅުވާ ޓީމަކާއެވެ.