މިދިޔަ 2015 ވަނަ އަހަރުގެ ނޮވެމްބަރު 05 ވަނަ ދުވަހު، ޝްރީލަންކާގައި، ހ. ހަންޑްރެޑް ފްލާވަރ، ޙުސައިން ރަޒީން (29)، މަރާލީ މާލޭގައި ހުރި ދިވެއްސަކު ފައިސާ ދޭން އެއްބަސްވެގެންކަން ތަޙްޤީޤަށް ކަށަވަރުވެފައިވާ ކަމުގައި ކްރައިމް އިންވެސްޓިގޭޝަންސް ކޮމާންޑުގެ ޑެޕިއުޓީ ހެޑް ޗީފް އިންސްޕެކްޓަރ އޮފް ޕޮލިސް މުޙައްމަދު ރިޔާޒް ވިދާޅުވެއްޖެއެވެ.
ޗީފް އެސްޕީ މުޙައްމަދު ރިޔާޒް ވިދާޅުވީ މި މައްސަލައިގައި 2016 އޭޕްރީލް 12 ވަނަ ދުވަހު 28 އަހަރުގެ ދިވެހި ފިރިހެނަކު ރާއްޖެއިން ހައްޔަރުކޮށް ތަޙްޤީގު ކުރަމުންދާ ކަމަށާއި، ހައްޔަރުކޮށްފައިވާ މީހާއަކީ ޙުސައިން ރަޒީން މަރާލަން ފައިސާ ޚަރަދު ކުރި މީހާކަން ތަޙްޤީޤަށް ކަށަވަރު ވެފައިވާ ކަމަށެވެ. މިގޮތުން، ޙުސައިން ރަޒީން މަރާލުމަށްފަހު ވޭން ތެރޭގައި ނަގާފައިވާ ފޮޓޯތައް ރާއްޖެއިން ހައްޔަރު ކުރި މީހާގެ ފޯނަށް ވަގުތުން ފޮނުވާފައިވާކަން ފޮރެންސިކް ތަޙްލީލުތަކުން އެގިފައިވާ ކަމަށާއި އަދި ޖެހިގެން އައިދުވަހު ހެނދު ފޮޓޯ އަލުން ފޮނުވުމުން، ކުޑައިރުކޮޅެއްގެ ތެރޭގައި ޙުސައިން ރަޒީން މަރާލިކަމުގެ ތުހުމަތުގައި ޝްރީލަންކާގައި ހައްޔަރުކޮށްފައިވާ ފިރިހެން މީހާގެ ބެންކް އެކައުންޓަށް މާލެއިން ހައްޔަރުކޮށްފައިވާ މީހާ ފައިސާ ޓްރާންސްފަރ ކޮށްފައިވާކަންވެސް ތަޙްޤީޤަށް ހޯދިފައިވަން މުޙައްމަދު ރިޔާޒް ފާހަގަ ކުރެއްވިއެވެ.
މިމައްސަލާގައި މިހާތަނަށް ޝްރީލަންކާގެ ފުލުހުންވެސް މީގެ ކުރިން ގިނަ މަޢުލޫމާތުތަކެއް ހާމަކޮށްފައިވާކަމަށާއި މައްސަލަ ތަޙްޤީޤު ކުރުމުގައި ދިވެހި ފުލުހުންގެ ފުރިހަމަ އެހީތެރިކަން ޝްރީލަންކާގެ ފުލުހުންނަށް ދެމުންދާކަމުގައި މުޙައްމަދު ރިޔާޒް ވިދާޅުވިއެވެ. އަދި މި މައްސަލާގައި ދެޤައުމުގައި ހައްޔަރުކުރެވިފައިވާ މީހުންގެ ތަޙްޤީޤަށް ލިބިފައިވާ ހެކި ޤަރީނާ ބަދަލުކުރުމާއި ދެގައުމުގައި ހައްޔަރުކޮށްފައިވާ މީހުންގެ ޝަރީއަތް ކުރިޔަށް ގެންދާނެގޮތަކާއި މެދު މަޝްވަރާ ކުރަމުންދާކަމަށްވެސް މުޙައްމަދު ރިޔާޒް ވިދާޅުވިއެވެ.
ޙުސައިން ރަޒީން މަރާލި މައްސަލައިގެ ތުހުމަތުގައި 28 އަހަރުގެ ދިވެހި ފިރިހެނަކު ރާއްޖެއިން ހައްޔަރުކޮށް އެމީހާގެ ބަންދަށް 15 ދުވަސް ކްރްމިނަލް ކޯޓުން ވަނީ ދީފައެވެ.