މިދިޔަ އަހަރު އަލަށް ބޭއްވި ޖޫނިއަރ ސާފިން ޗެމްޕިއަންޝިޕާއެކު އުއްމީދު އައުވެގެން ހިނގައްޖެ ކަމަށް މޯލްޑިވިސް ސާފިން އެސޯސިއޭޝަން (އެމްއެސްއޭ) ގެ ރައީސް މުޙައްމަދު ސޮބާހު ވިދާޅުވެއްޖެއެވެ.
މިދިޔަ އަހަރު ފުރަތަމަ ފަހަރަށް ޖޫނިއަރ ކެޓެގަރީއަށް ހުޅުވާލައިގެން ބޭއްވި މުބާރާތާ ގުޅޭގޮތުން "ކުޅިވަރު ވިންދު" ޕްރޮގްރާމުގައި ވާހަދައްކަވަމުން ސޮބާހު ވިދާޅުވީ ބޮޑު މުބާރާތާ ހެދި ޖޫނިއަރ ސާފިން ޗެމްޕިއަންޝިޕުގެ ވާހަކަ މާ ގިނައިން ނުދެއްކުނު ނަމަވެސް، އެ މުބާރާތް ފާހަގަކުރެވުނީ ސަޕްރައިޒިން އަދި ކާމިޔާބު މުބާރާތެއްގެ ގޮތުގައި ކަމަށެވެ.
ސޮބާހު ވިދާޅުވީ ކުޑަކުދިން ގޮވައިގެން މުބާރާތެއް ބާއްވަން ޖެހުމަކީ ދިމާވި ޗެލެންޖެއް ކަމަށާއި، އެހެން ނަމަވެސް ސީނިއަރ އެތުލީޓުންނާ އެއް ފެންވަރެއްގެގެ ޕާފޯމަންސެއް ޖޫނިއަރ ބައިގައި ދެއްކި ކަމަށެވެ. އެގޮތުން އެ މުބާރާތް ފާހަގަކުރެވުނީ ވަރުގަދަ ޕާފޯމަންސެއް ޖޫނިއަރ ރާޅާއެޅުންތެރިންގެ ފަރާތުން ފެނުނު މުބާރާތެއް ގޮތުގައި ކަމަށްވެސް ވިދާޅުވިއެވެ.
"ބޮޑު މުބާރާތާ ހެދި ކޮންމެވެސް ވަރަކަށް އޯވާ ޝެޑޯވެފައި އިނީ ޖޫނިއަރ މުބާރަތް. އަޅުގަނޑުމެންނަށް ޖޫނިއަރ މުބާރާތްވެސް ބާއްވަން ވަރަށް ޗެލެންޖެސްތަކާ ކުރިމަތިވި. އެހެން ނަމަވެސް ޖުނިއަރ މުބަރާތް ވެގެންދިޔައީ ސަޕްރައިޒިން ނަތީޖާއެއް ފެނުނު މުބާރާތަކަށް.މުޙައްމަދު ސޮބާހު - އެމްއެސްއޭގެ ރައީސް
މީގެ އިތުރުން ސޮބާހު ވަނީ މި އަހަރުވެސް ސާފް ލީގު އިތުރަށް ފޯރިގަދަކުރުމަށްޓަކައި ގެނެވޭނެ ބަދަލުތަކަކާ މެދު މަޝްވަރާ ކުރަމުންދާ ކަމަށް ވިދާޅުވެފައެވެ. އެ އެސޯސިއޭޝަނުގެ ޖެނެރަލް ސެކްރެޓަރީ މުޙައްމަދު ޝަބީން ވިދާޅުވީ މި އަހަރުގެ ސާފިން ސީޒަނުގައި މުބާރަތްތައް މަދު ނަމަވެސް، އެ މުބާރަތްތަކުގެ ކޮލިޓީ ރަނގަޅުވާނެ ކަމަށާއި، މި ބަދަލު ގެނައުމުގެ އެންމެ ބޮޑު ބޭނުމަކީ ކޮލުޓީ ރަނގަޅުކުރަމަށް ބާރުއެޅުން ކަމަށެވެ.
ސާފިން އެސޯސިއޭޝަނުން ކާމިޔާބުކަމާއެކު ރާއްޖޭގެ އެކި ސަރަހައްދުތަކުގައި ދިވެހި ސާފް ލީގު ބާއްވަމުން އަންނައިރު، މި އަހަރުވެސް މާލޭގެ އިތުރުން ރާއްޖެތެރޭގެ ތިން ރަށެއްގައި މުބާރާތް ބޭއްވުމަށް ވަނީ ތާވަލުކޮށްފައެވެ. އެއީ ގދ. ގައްދޫ އާއި، ކ. ހިންމަފުށި އަދި މ. މުއްޔެވެ.