ކުޑަހުވަދޫގައި ސަރުކާރުން ތަރައްޤީކުރައްވާ ޑޮމެސްޓިކް އެއަރޕޯޓްގެ މަސައްކަތް ނިމި، މިއަހަރުގެ ޑިސެމްބަރުމަހުގެ ތެރޭގައި އެއަރޕޯޓް ބޭނުންކުރަން ފެށޭވަރުވާނެ ކަމަށް، ކޮންޓްރެކްޓަރާ ޙަވާލާދީ ދ. އަތޮޅު ކައުންސިލުން ވިދާޅުވެއްޖެއެވެ.
ކޮންޓްރެކްޓަރ ފައިނޭންސް އުޞޫލުން ކުޑަހުވަދޫ އެއަރޕޯޓް ތަރައްޤީކުރުމުގެ މަސައްކަތް، ޙަވާލުކުރައްވާފައިވަނީ ރިއޮއްލޯ އިންވެސްޓްމެންޓް ޕްރައިވެޓް ލިމިޓެޑާއެވެ. ކުޑަހުވަދޫ އެއަރޕޯޓްގައި އަޅާ ޢިމާރާތްތަކުގެ މަސައްކަތްވެސް ނިމުމަކާ ކައިރިފައިވާއިރު، މިހާރު އެންމެ ބާރަށް ކުރިޔަށްދަނީ އެއަރޕޯޓް ޓާރމިނަލްގެ މަސައްކަތެވެ.
އެއަރޕޯޓް އެޅުމުގެ މަސައްކަތަށް ކުޑަހުވަދޫ ދެކުނު ފަރާތުން ފަސްދޮޅަސް ދޭއް ޕޮއިންޓް އަށެއް އެކެއް ހެކްޓަރުގެ ބިން ހިއްކުމަށް ހަމަޖެހިފައިވެއެވެ. ކުރިޔަށް އޮތް ހަފްތާއެއްހާ ދުވަހުގެ ތެރޭގައި ރަންވޭ އެޅުމަށް ހަމަޖެހިފައިވާ ސަރަޙައްދުގެ ބިންހިއްކާ ނިމޭނެކަމަށް ކޮންޓްރެކްޓަރާ ޙަވާލާދީ، ދ. އަތޮޅު ކައުންސިލު އިދާރާއިން މަޢުލޫލާތުދެއްވައެވެ.
ކުޑަހުވަދޫގައި ޤާއިމުކުރައްވާ އެއަރޕޯޓަކީ ޕްރައިވެޓް ޖެޓްތަކަށްވެސް ޖެއްސޭގޮތަށް ފަރުމާކުރެވޭ އެއަރޕޯޓެކެވެ. މި އެއަރޕޯޓް ތަރައްޤީކުރުމުގެ މަސައްކަތް ރިއޮއްލޯ އިންވެސްޓްމެންޓް ޕްރައިވެޓް ލިމިޓެޑާ ސަރުކާރުން ޙަވާލުކުރައްވާފައިވަނީ ދެހާސް ތޭރަވަނަ އަހަރުގެ ތެރޭގައެވެ.