ޖަޕާންގެ ކުމަމޯޓޯ ޕްރީފެކްޗަރ އަށް މިރޭ އަނެއްކާ 7.1ގެ ބާރުމިނުގައި 2 ބިންހެލުން އަތުވެއްޖެއެވެ.
ކިޔޫޝޫ ޖަޒީރާގެ ކުމަމޯޓޯ ޕްރީފެކްޗަރއަށް ރޭވެސް ވަނީ 6.2ގެ ބާރުމިނުގައި 2 ބިންހެލުން އައިސްފައެވެ. މިރޭގެ ބިންހެލުން އައިސްފައިވަނީ ބިމުގެ 10 ކިލޯމީޓަރު އަޑިންކަމަށް ރިޕޯޓްތައް ބުނެއެވެ. މިއީ ނިސްބަތުން ވަރަށް ތިލަ އިން އައި ބިންހެލުމެއް ކަމަށް މާހިރުން ބުނެއެވެ. ރޭއައި ދެބިންހެލުމުގައި 9 މީހުން މަރުވެފައިވީ ނަމަވެސް މިރޭގެ ބިންހެލުމުގައި މީހަކު މަރުވި ކަމުގެ ޚަބަރެއް ލިބިފައެއް ނުވެއެވެ.
ބިންހެލުމާއި ގުޅިގެން އެއްމީޓަރުގެ ސުނާމީއެއް އަރާފާނެ ކަމަށް ބެލެވި ޖަޕާނުގެ ކިޔޫޝޫ ޖަޒީރާ އަށް ސުނާމީ އިންޒާރު ދިންނަމަވެސް ފަހުން އިންޒާރުވަނީ ވީއްލާފައެވެ. ކިޔޯޑޯ ނިއުސް އޭޖެންސީ އިން ބުނާ ގޮތުގައި ބިން ހެލުމާއި ގުޅިގެން އިތުރު އެތައް ސަތޭކަ ލޮޅުން އައަންނާނެ ކަމަށް ބެލެވެއެވެ. ރޭގެ ބިންހެލުމަށްފަހު ސާޅީހަކަށް ހާސް މީހުން ސަލާމަތީ ސަބަބުތަކަށްޓަކާ އެހެން ހިސާބުތަކަށް ބަދަލު ކޮށްފައިވެއެވެ.
ޖަޕާނުގެ ނިއުކްލިއަރ ރެގިއުލޭޝަން އޮތޯރިޓީއިން ބުނާ ގޮތުގައި ބިން ހެލުމުގެ ސަބަބުން ކުމަމޯޓޯ ސަރަހައްދުގައި ހުރި ދެ ނިއުކްލިއަރ ރިއެކްޓަރަށް މިހާތަނަށް އެއްވެސް ގެއްލުމެއް ލިބިފައެއްނުވެއެވެ.