ކުޅިވަރު އެސޯސިއޭޝަންތަކުން އެތުލީޓުންގެ ދަތުރުތަކަށް ކުރާ ޚަރަދު ހަމަޖައްސަން ދިމާވާ ދަތިތައް އަވަހަށް ހައްލުކުރުމަށް، އެ ދަތުރުތަކުގެ މައުލޫމާތު ކުރިއާލާ ފޯރުކޮށްދޭން އެދިފައިވާނެ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
"އަހާ" ފޯރަމުގައި ރައްޔިތުންގެ ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ އެ މައްސަލަ ހައްލުކުރުމަށް އެސޯސިއޭޝަންތަކާ ވާހަކަ ދައްކަވާފައިވާނެ ކަމަށާއި، އަހަރު ތެރޭގައި ކުރާ ހުރިހާ ދަތުރުތައް ދުރާލާ ރާވައިގެން ވުޒާރާއަށް އަންގައިދިނުމަށް އެދިފައިވާނެ ކަމަށެވެ.
"އެސޯސިއޭޝަންތަކުގެ ބަޖެޓް ދަތިވެ، އެތުލީޓުން ތަންތަނަށް ދަތުރުކުރުމަށް އޮންނަ ދަތިތައް ހައްލުކުރުމަށް މިހާރު ވަނީ އެސޯސިއޭޝަންތަކާއެކު މަޝްވަރާ ކުރެވި، ހައްލަކަށް މަސައްކަތް ކުރެވިފައި. މީގެ ކުރިން އެސޯސިއޭޝަންތަކާއި މިނިސްޓްރީއާ ދެމެދު ކޮމިއުނިކޭޝަން މައްސަލަތަކެއް އެބަ ދިމާވޭ. އެހެންވަމުން ގޮސް، އެންމެ ފަހު މިނެޓު ކަންކަން ހަމަނުޖެހިގެން އާންމުކޮށް ދަތިތައް މި ދިމާވަނީ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ވަޒީރު ވިދާޅުވީ ވުޒާރާއިން ކުޅިވަރު ރާވާ ނުހިންގި ނަމަވެސް، ރާއްޖޭގައި އެކަމާ ގުޅުންހުރި އެސޯސިއޭޝަންތަކަށް އެހީތެރިވެދެއްވާނެ ކަމަށެވެ. އަދި ޕެރަ އެތުލީޓުން ރާއްޖެއިން ބޭރުގެ ބައެއް ކުޅިވަރު މުބާރާތްތަކުގައި ބައިވެރިވުމަށް ގައުމުން ބޭރަށް ދާއިރު ފައިސާގެ ދަތިކަން ކުރިމަތިވާކަން ފާހަގަކުރައްވާ ވަޒީރު ވިދާޅުވީ އެކަމަށް ހައްލެއް ހޯދަން އެސޯސިއޭޝަންތަކާ ވާހަކަދެއްކުމުގެ މަސައްކަތް ފަށާފައިވާ ކަމަށެވެ.
ޕެރަ އެތުލީޓުންނަށް ޚާއްސަ ކުޅިވަރު މުބާރާތެއް ރާއްޖޭގައި ބާއްވަން އެކަމާ ގުޅުންހުރި އެސޯސިއޭޝަނަކުން އެދެފިނަމަ، އެކަމަށް އެހީވާނެ ކަމަށް ފޯރަމުގައި ވާހަދައްކަވަމުން ރާފިޢު ވަނީ ވިދާޅުވެފައެވެ.