ދިވެހިރާއްޖޭގެ އިސްލާމިކް ޔުނިވަރސިޓީ ތަރައްޤީކުރަމުންދާނީ އިރުމައްޗާއި ހުޅަނގުގެ ޔުނިވަރސިޓީތައް ނަމޫނާއަކަށް ބަލައިގެންކަމަށް އެޔުނިވަރސިޓީގެ ވައިސް ޗާންސެލަރ ޑރ.މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ދިވެހިރާއްޖޭގެ އިސްލާމިކް ޔުނިވަރސިޓީ އަކީ އަރަބި އިސްލާމީ ތަޢުލީމު ފޯރުކޮށްދިނުމަށްޓަކައި މީގެ ކުރިން ހިންގަމުން އައި ކުއްލިއްޔަތުލް ދިރާސާތިލް އިސްލާމިއްޔާ، އިސްލާމިކް ޔުނިވަރސިޓީއަކަށް ބަދަލުކުރުމަށް އިސްލާމިކް ޔުނިވަރސިޓީގެ ޤާނޫނަށް އަމަލުކުރަން ފެށުމާއެކު މިދިޔަ އަހަރުގެ ޖުލައި މަހުން ފެށިގެން ޔުނިވަރސިޓީއެއްގޮތުގައި ހިންގަމުން އަންނަ ތަނެކެވެ.
ޕީއެސްއެމްއަށް ދެއްވި އިންޓަރވިއުއެއްގައި އިސްލާމިކް ޔުނިވަރސިޓީގެ ވައިސް ޗާންސެލަރ ޑޮކްޓަރ ޝަހީމް ވިދާޅުވީ އިސްލާމިކް ޔުނިވަރސިޓީ ތަރައްޤީކުރުމުގައި މަސައްކަތްކުރަމުންދަނީ ޒަމާނީ އުސޫލުތަކުގެ ތެރެއިން ތަރައްޤީކުރެވޭ މުއައްސަސާއަކަށް ހެދުމަށްކަމަށެވެ. އެގޮތުން ޔުނިވަރސިޓީގެ މަންހަޖު ބިނާވެގެންވާނީ އިރުމަތީގެ ޤައުމުތަކުގެ ތެރެއިން އަޒްހަރު ޔުނިވަރސިޓީ އާއި ސައޫދީ އަރަބިއްޔާ އަދި މެލޭޝިޔާ އާއި އޯއައިސީ ޤައުމުތަކުގެ ޔުނިވަރސިޓީތައް ނަމޫނާއަކަށް ބަލައިގެންކަމަށާއި، ޔުނިވަރސިޓީ ހިންގުމުގައި އިދާރީގޮތުން ނަމޫނާއަކަށް ބަލާފައިވަނީ ހުޅަނގުގެ އިސްލާމީ ޔުނިވަރސިޓީތައްކަމަށް ޝަހީމް ވިދާޅުވިއެވެ.
އިސްލާމިކް ޔުނިވަރސިޓީއިން ހިންގާ ކޯސްތަކުގެ ފެންވަރު ރަގަޅުކޮށް މިއަހަރުގެތެރޭގައިވެސް އިތުރު ކޯސްތަކެއް ފެށުމަށް ވަނީ ނިންމާފައެވެ. ޝަހީމް ވިދާޅުވީ އެޔުނިވަރސިޓީ އިން ހިންގާ ކޯސްތަކުގެ ފެންވަރު އިތުރަށް ރަގަޅުކުރުމުގެ ގޮތުން އަލަށް ފަށާ ކޯހަށް ވަނުމަށް އެދޭ މިންގަނޑާއި ކޯހުން ގްރެޖުއޭޓްވެވޭނެ މިންގަނޑުވެސް ވަރަށް ވަރުގަދަކޮށްފައިވާކަމަށެވެ. އަދި ކުރިއާއި ޚިލާފަށް ކިޔަވާ ދަރިވަރުންގެ ބަހުގެ ފެންވަރު އިތުރުކުރުމުގެ ގޮތުން ބައިނަލްއަޤްވާމީ ފެންވަރުގެ ބަސްތަކުން ވާހަކަދައްކަން އެނގޭނެ ދަރިވަރުންތަކަކަށް ހެދުމަށް އަމާޒުކޮށްފައިވާކަމަށްވެސް ޝަހީމް ވިދާޅުވިއެވެ.
އިސްލާމިކް ޔުނިވަރސިޓީގައި ދެހާސް ދުއިސައްތައަށްވުރެ ގިނަ ދަރިވަރުން ދަނީ ތަޢުލީމު ހާސިލްކުރަމުންނެވެ. އެޔުނިވަރސިޓީން އަލަށް ތަޢާރަފްކުރާ އާކޯސްތަކާއެކުވެސް ޖާގައިގެ ދަތިކަން އިތުރުވެގެންދާނެތީ، ޖާގައިގެ ދަތިކަމަށް ވަރަށް އަވަހަށް ޙައްލެއް ލިބިގެންދާނެކަމަށް ޤަބޫލުކުރައްވާކަމަށް ޝަހީމް ވިދާޅުވިއެވެ.
ދިވެހިރާއްޖޭގެ އިސްލާމިކް ޔުނިވަރސިޓީ ވެގެންދާނީ ދިވެހިންނަށް ބޭނުންވާ ފަދަ އިސްލާމީ ތަޢުލީމު ފަހިކޮށްދެވޭނެ ޤާބިލްތަނަކަށްކަމަށް އެޔުނިވަރސިޓީން ވިދާޅުވެއެވެ.