ސްޕެނިޝް ލީގު ތާވަލުގެ ފުލުގައި އޮތް އަލްމޭރިއާ އަތުން ރެއާލް މެޑްރިޑް އުނދަގޫ މޮޅެއް ހޯދައިފިއެވެ.
ރެއާލްގެ ދަނޑުގައި ކުޅުނު ފޯރިގަދަ މި މެޗު އެ ޓީމު ކާމިޔާބުކޮށްފައިވަނީ 3-2 ގެ ނަތީޖާއަކުންނެވެ. މެޗު ފަށައިގެން 38 ވަނަ ސިކުންތުގެ ތެރޭގައި ރަމަޒާނީ ވަނީ އަލްމޭރިއާ އަށް ލީޑު ނަގައިދީފަ އެވެ. އަދި ފުރަތަމަ ހާފް ނިމެން ދެ މިނެޓަށް ވެފައިވަނިކޮށް އެޑްގާ ގޮންޒާލޭޒް ވަނީ އަލްމޭރިއާގެ ދެވަނަ ގޯލު ކާމިޔާބުކޮށްދީފައެވެ.
ގާތްގާތުގައި ޖެހި ދެ ގޯލާއެކު ރެއާލަށް ފުރަތަމަ ހާފުގައި ހަމަނޭވާ ލުމުގެ ފުރުސަތެއް ނުލިބުނެވެ. ފުރަތަމަ ހާފު ނިމުނީ މި ނަތީޖާގައި އޮވެގެންނެވެ. މެޗުގެ 57 ވަނަ މިނެޓްގައި ލިބުނު ޕެނަލްޓީއަކުން ޖޫޑް ބެލިންހަމް ވަނީ ރެއާލްގެ ފުރަތަމަ ގޯލު ކާމިޔާބުކޮށްދީފަ އެވެ. އަދި މެޗުގެ 67 ވަނަ މިނެޓްގައި ވިނީޝަސް ޖޫނިއާ ވަނީ ރެއާލްގެ ދެވަނަ ގޯލު ކާމިޔާބުކޮށްދީފައެވެ.
ރެއާލުން ތިން ޕޮއިންޓް ކަށަވަރުކުރި ލަނޑު ފެނިގެންދިޔައީ އިތުރު ވަގުތުގެ ގޮތުގައި 11 މިނެޓުގެ ތެރޭގައެވެ. މިއީ ޑެނީ ކަވަހާލް ކާމިޔާބުކުރި ގޯލެކެވެ. މި މެޗުގައި ރެފްރީއާއި ދެކޮޅު ހެދުމުން އަލްމޭރީއާގެ ކޯޗު ގައިޒްކާ ގަރިޓާނޯއަށް ވަނީ ރަތްކާޑު ދައްކާފައެވެ.
މި މޮޅާއެކު 20 މެޗު ކުޅެގެން ލިބުނު 51 ޕޮއިންޓާ އެކު ރެއާލް އޮތީ ލީގުގެ ދެވަނައިގަ އެވެ. އެއްވަނައިގައި 21 މެޗުން 52 ޕޮއިންޓް ހޯދައިގެން އޮތީ ޖިރޯނާ އެވެ.