އައިވަރީ ކޯސްޓުގައި މިހާރު ކުރިއަށްދާ އެފްރިކާ ކަޕް އޮފް ނޭޝަންސްގެ ގްރޫޕް ޑީގައި ފަހު ވަގުތުގައި ޖެހި ލަނޑާއެކު އަލްޖީރިއާ ޕޮއިންޓަކުން ފުއްދާލާފިއެވެ.
ބުރްކީނާ ފާސޯއާ ދެކޮޅަށް ރޭ ކުޅުނު މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ.
މި މެޗުގެ ފުރަތަމަ ހާފުގެ އިތުރު ވަގުތު ތެރޭގައި މުހައްމަދު ކޮނާޓޭ ވަނީ ބުރްކީނާ ފާސޯއަށް ލީޑު ނަގައިދީފައެވެ. އެކަމަކު މެޗުގެ ދެވަނަ ހާފު ފަށައިގެން ހަވަނަ މިނެޓުގައި އަލްޖީރިއާގެ ބެގްދާދް ބޮނޭޖާ ވަނީ ލަނޑެއް ޖަހައި، އެ ޓީމަށް ނަތީޖާ އެއްވަރުކޮށްދީފައެވެ.
މި މެޗުގައި ބުރްކީނާ ފާސޯއިން އަލުން ލީޑު ނެގީ މެޗުގެ 71 ވަނަ މިނެޓުގައި ލިބުނު ޕެނެލްޓީއަކުންނެވެ. މި ލަނޑު އެ ޓީމަށް ކާމިޔާބުކޮށްދިނީ ބާޓްރެންޑް ޓަރައޯރޭއެވެ. ދެ ފަހަރަށް މި މުބާރާތް ކާމިޔާބުކޮށްފައިވާ އަލްޖީރިއާއިން މެޗުގެ ނެތީޖާ ހަމަހަމަކުރީ އިތުރު ވަގުތު އެންމެ ފަހު މިނެޓުގައި ބޮނޭޖާ ކާމިޔާބުކޮށްދިން ލަނޑުންނެވެ.
މި ގުރޫޕުގެ އަނެއް މެޗުގައި ރޭ އަންގޯލާއިން ވަނީ މޮރަޓޭނިއާ އަތުން 3-2 ގެ ނަތީޖާއަކުން މޮޅުވެފައެވެ. އެއާއެކު ތާވަލުގެ އެއްވަނައިގައި އޮތް އަންގޯލާ އާއި ދެވަނައިގައި އޮތް ބުރްކީނާ ފާސޯއަށް ދެ މެޗުން ހަތަރު ޕޮއިންޓް ލިބިފައިވާއިރު، ތިންވަނައިގައި އޮތް އަލްޖީރިއާއަށް ދެ މެޗުން ލިބިފައިވަނީ ދެ ޕޮއިންޓެވެ. އަދި ފުލުގައި އޮތް މޮރަޓޭނިއާއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.
މީގެ އިތުރުން މި މުބާރާތުގެ ގްރޫޕް އީގައި ރޭ ޓިއުނޭޝިއާ އާއި މާލީ ވާދަކުރި މެޗު ނިމުނީ ފުރަތަމަ ހާފުގައި ޖެހި ލަނޑުތަކާއެކު 1-1 ގެ ނަތީޖާއަކުން އެއްވަރުވެގެންނެވެ. މިއީ މި ފަހަރު މުބާރާތުގައި ޓިއުނޭޝިއާއިން ހޯދި ފުރަތަމަ ޕޮއިންޓެވެ.