އައިޓީއެފް މުބާރާތުގެ ކާމިޔާބީގެ ފަހަތުގައި ގިނަ ބައެއްގެ ހިއްސާ އެކުލެވޭ ކަމަށާއި، އުނދަގޫ ގިނަ މެޗުތަކަކާ ކުރިމަތިލާން ޖެހުނު ކަމަށް އުއްމީދީ ޓެނިސް ތަރި ނަބާ ނިޝާން ބުނެފިއެވެ.
ވިއެޓްނާމުގައި ކުރިއަށްދިޔަ އައިޓީއެފް އޭޝިއާ 14 އަހަރުން ދަށުގެ ޑިވެލޮޕްމަންޓް ޗެމްޕިއަންޝިޕުގެ ރީޖަނަލް ކޮލިފައިން އިވެންޓުގައި ނަބާ ވަނީ އަންހެން ސިންގަލްސްގެ ދެ މުބާރާތުންވެސް ރަން މެޑަލް ހޯދާފައެވެ.
ވިއެޓްނާމުގައި ދެ ހަފުތާއެއްގައި ދެ މުބާރާތް ކުރިއަށްދިޔައިރު، ފުރަތަމަ ހަފުތާގައި ބޭއްވި މުބާރާތުގެ ޗެމްޕިއަންކަން ނަބާ ހޯދީ ފައިނަލުގައި ސްރީ ލަންކާގެ އަންނަޔާ ޖޯނީ ނޯބާޓް އަތުން ފަސޭހަކަމާއެކު ސީދާ ދެ ސެޓުން މޮޅުވެގެންނެވެ. އެ މެޗުގެ ސެޓުތައް ނަބާ ގެންދިޔައީ 6-1 އަދި 6-0 އިންނެވެ. އަދި ދެވަނަ ހަފުތާގެ މުބާރާތުގެ ޗެމްޕިއަންކަން ނަބާ ހޯދީ ފައިނަލުގައި ރާއްޖޭގެ މަންހާ މުޙައްމަދު ބަލިކޮށްގެންނެވެ. މި މެޗުން ފަސޭހަކަމާއެކު ސީދާ ދެ ސެޓުން ނަބާ މޮޅުވިއިރު، މެޗުގެ ސެޓުތައް އޭނާ ގެންދިޔައީ 6-0 އަދި 6-1 އިންނެވެ. މިއީ މި ފެންވަރުގެ މުބާރާތެއްގައި ރާއްޖޭގެ ކުޅުންތެރިޔަކު ހޯދީ ތާރީޚީ ކާމިޔާބެކެވެ.
މުބާރާތުގެ މެޑަލްތަކާއެކު އެނބުރި ރާއްޖެ އައިސް "ޕީއެސްއެމް ސްޕޯޓްސް" އާ ވާހަކަދައްކަމުން ނަބާ ބުނީ މިއީ އުނދަގޫ މުބާރާތެއް ކަމަށާއި، ރާއްޖޭގެ ޓެނިހުގެ ތާރީހުގައި މިވަރުގެ ކާމިޔާބެއް ލިބުމަކީ ކެރިއަރުގައި ކުރިއަށްދާން ލިބުނު ބޮޑު ހިތްވަރެއް ކަމަށެވެ. އަދި އުއްމީދަކީ ކުރިއަށްއޮތް ތަނުގައި އިތުރު ކާމިޔާބީތަކެއް ހޯދުންކަމަށްވެސް ނަބާ ބުންޏެވެ.
އައިޓީއެފް އޭޝިއާ 14 އަހަރުން ދަށުގެ ޓެނިސް ޑިވެލޮޕްމަންޓް ޗެމްޕިއަންޝިޕުގެ ރީޖަނަލް ކޮލިފައިން އިވެންޓުގައި ރާއްޖޭގެ ނަބާ ދެ ރަން މެޑަލް ހޯދިއިރު، މި މުބާރާތުގައި ނަބާ އާއި މަންހާގެ ޕެއާ ވަނީ އަންހެނުންގެ ޑަބަލްސް އިވެންޓުގެ ފައިނަލުގައި ވާދަކޮށްފައެވެ. އަދި ރާއްޖޭގެ އާދަމް އާލް ނިޔާޒް އާއި މީކާ މުޙައްމަދު ކަލީމުގެ ޕެއާ ވަނީ ފިރިހެން ޑަބަލްސް ބައިގެ ސެމީ ފައިނަލުގައިވެސް ވާދަކޮށްފައެވެ.
މި މުބާރާތަކީ އިންޓަނޭޝަނަލް ޓެނިސް ފެޑެރޭޝަން (އައިޓީއެފް) އިން އިންތިޒާމުކޮށްގެން ކޮންމެ އަހަރަކު ބާއްވާ މުބާރާތެކެވެ. މި މުބާރާތުގައި ރާއްޖެ، ލަންކާ، ލާއޯސް، ކެންބޯޑިއާ، މޮންގޯލިއާ އަދި ބްރޫނާއީ ދާރުއްސަލާމް ހިމެނޭހެން އަށް ގައުމެއްގެ ކުޅުންތެރިން ވާދަކުރިއެވެ.