އެމްޕީއެލް ދެވަނަ ޑިވިޝަން ފުޓްބޯޅަ މުބާރާތުގައި ޖޭޖޭ ސްޕޯޓްސް ކުލަބު ބަލިކޮށް، ކުއާޓާ ފައިނަލުގެ ޖާގައެއް މަސްއޮޑި ސްޕޯޓްސް ކުލަބުން ހޯދައިފިއެވެ.
ގައުމީ ފުޓްބޯޅަ ދަނޑުގައި އިއްޔެ ހަވީރު ކުޅުނު މެޗުން މަސްއޮޑި މޮޅުވީ ފަސޭހަކަމާއެކު 6-0 ގެ ނަތީޖާއަކުންނެވެ.
މި މެޗުގައި މަސްއޮޑިން ކާމިޔާބުކުރި ހަ ލަނޑުގެ ތެރެއިން ފަސް ލަނޑު އެ ޓީމުން ޖަހާފައިވަނީ ދެވަނަ ހާފުގައެވެ. މި މެޗުގެ ބޮޑުބައެއްގައި ޖޭޖޭ ސްޕޯޓްސްއިން ރަނގަޅު ޑިފެންސްއެއް ކުރިއިރު، މަސްއޮޑިއަށް ފުރަތަމަ ލަނޑު ކާމިޔާބުކުރެވުނީ ފުރަތަމަ ހާފުގެ އިތުރު ވަގުތުގައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ އައްޒާމް އަބްދުﷲ އެވެ.
މި މެޗުގެ ދެވަނަ ހާފުގައި މަސްއޮޑިން މޮޅު ކުޅުމެއް ދެއްކިއިރު، އެ ޓީމުން ލީޑު ފުޅާކޮށްފައިވަނީ މި ހާފު ފަށައިގެން ހަވަނަ މިނެޓުގައެވެ. އައްޒާމް ނަގައިދިން ހުރަހަކުން މި ލަނޑު ކާމިޔާބުކޮށްދިނީ ކެޕްޓަން އިބްރާހީމް ވަހީދު ހަސަން (އިއްބެ) އެވެ. އަދި މެޗުގެ 62 ވަނަ މިނެޓުގައި އަލީ ޝާމިސް ނަގައިދިން ކޯނަރަކުން އިއްބެ ވަނީ އިތުރު ލަނޑެއް ޖަހާފައެވެ.
މި މެޗުގައި މަސްއޮޑިން ކާމިޔާބުކުރި ހަތަރުވަނަ ލަނޑު މެޗުގެ 76 ވަނަ މިނެޓުގައި އިއްބެ ދިން ބޯޅައަކުން ޖަހައިދިނީ ޝާމިސްއެވެ. އަދި އޭގެ މިނެޓެއް ފަހުން އޭރިއާ ތެރެއިން ފޮނުވާލި ހަމަލާއަކުން ޖަޚޮނޯފް ސަރުދޯރް ވަނީ އެ ޓީމުގެ ފަސްވަނަ ލަނޑު ކާމިޔާބުކޮށްދީފައެވެ. އަދި މެޗުގެ އިތުރު ވަގުތުގައި މަސްއޮޑީގެ ފަހު ލަނޑު ޖަހައިދިނީ އޮޑީލީ ފީލިކްސް ޗިޑީއެވެ.
މި މޮޅާއެކު ބާކީ މެޗެއް އޮއްވައި ކުއާޓާ ފައިނަލުގެ ޖާގައެއް މަސްއޮޑިން ކަށަވަރުކުރީ ކުޅުނު ތިން މެޗުންވެސް މޮޅުވެ ނުވަ ޕޮއިންޓާއެކުއެވެ. އެގޮތުން ކޮންމެ ގްރޫޕަކުން ގަދަ ދެ ޓީމަކަށް ކުއާޓާ ފައިނަލްގެ ފުރުސަތު ދޭއިރު، ކުއާޓާގެ ބާކީ ދެ ޖާގަ ލިބޭނީ ތިން ގްރޫޕުން ތިންވަނައަށް ދާ ޓީމުތަކުގެ ތެރެއިން އެންމެ ރަނގަޅު ދެ ޓީމަކަށެވެ.