ގަތަރުގައި މިހާރު ކުރިއަށްދާ އޭއެފްސީ އޭޝިއަން ކަޕް ފުޓްބޯޅަ މުބާރާތުގެ ގުރޫޕް އީގައި ދެކުނު ކޮރެއާއިން ކުޅުނު ފުރަތަމަ މެޗު ކާމިޔާބުކޮށް، މުބާރާތުގެ ފެށުން ރަނގަޅުކޮށްފިއެވެ.
ޖާސިމް ބިން ހަމަދް ސްޓޭޑިއަމުގައި ކުޅުނު މެޗުން ކޮރެއާއިން ކާމިޔާބުކުރީ ބަހްރެއިންއާ ވަދަކޮށް 3-1 ގެ ނަތީޖާއަކުންނެވެ.
މި މެޗުގެ 13 ވަނަ މިނެޓުގައި ކޮރެއާއަށް ފުރަތަމަ ލަނޑު ކާމިޔާބުކޮށްދިނީ ސޮން ހިއުން-މިން ތަނަވަސްކޮށްދިން ފުރުސަތެއްގައި ހުވަންގް އިން-ބިއޮންއެވެ. އެކަމަކު ދެވަނަ ހާފު ފަށައިގެން ހަވަނަ މިނިޓުގައި ބަހްރެއިންއިން ނަތިޖާ އެއްވަރުކުރިއިރު، މި ލަނޑު ކާމިޔާބުކޮށްދިނީ އަބްދުލްﷲ އަލް ހަޝާޝްއެވެ. މި މެޗުގައި ކޮރެއާއިން ދެވަނަ ފަހަރަށް ލީޑު ނެގީ ލީ ކަންގް-އިން ކާމިޔާބުކުރި ލަނޑުންނެވެ. އަދި މެޗުގެ 69 ވަނަ މިނެޓުގައި ކޮރެއާގެ ތިންވަނަ ލަނޑުވެސް ޖަހައިދިނީ ލީ ކަންގް-އިންއެވެ.
މީގެ އިތުރުން މި މުބާރާތުގައި އިއްޔެ އިރާގުން އިންޑޮނޭޝިއާ ބަލިކުރިއިރު، ޖޯޑަންއިން ވަނީ މެލޭޝިއާގެ މައްޗަށް ފަސޭހަ މޮޅެއް ހޯދާފައެވެ.