ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިލެކްޓޯރަލް ކޯޑުގައި ބަޔާންކޮށްފައިވާ ގޮތަށް އެޕީލް ކޮމިޓީއެއް އެކުލަވާލެވިފައިނެތުމާއެކު، އިންތިޚާބުގައި ވާދަކުރައްވާ ގައުމީ ޓީމުގެ ކުރީގެ ފޯވާޑް އަޙްމަދު ޠާރިޤު (ޓޮމް) ހުށަހަޅާފައިވާ އިސްތިއުނާފުގެ މައްސަލައިގައި ގޮތެއް ނިންމަން ފީފާ އާއި އޭއެފްސީގެ ލަފަޔަކަށް އެދިއްޖެއެވެ.
މި މަހުގެ 31 ވަނަ ދުވަހު އެފްއޭއެމުގެ އިންތިޚާބު ބާއްވަން ތާވަލުކޮށްފައިވާއިރު، އިންތިޚާބުގައި ވާދަކުރާ ދެ ކެންޑިޑޭޓުންނަށް ކުލަބު ވެލެންސިއާއިން ދީފައިވާ ތާއީދު ސިޓީ ބަލައިނުގަންނަން އިލެކްޓޯރަލް ކޮމިޓީން ނިންމުމާއެކު، އިންތިޚާބުގައި ވާދަކުރައްވާ އެފްއޭއެމުގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު ޠާރިޤުގެ ކެންޑިޑެސީ ވަނީ ބާތިލުވެފައެވެ.
ވެލެންސިއާއިން ދެ ކެންޑިޑޭޓުންނަށް ސިޓީ ދިންއިރު، އޭގެ ތެރެއިން ޠާރިޤަށް ތާއީދު ސިޓީ ދީފައިވަނީ އެ ކުލަބުގެ ޗެއާމަނަކަށް ހުންނެވި އަބްދުﷲ އަޒްމީން ސޮއިކުރައްވައެވެ. އަދި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު އަދި ކުލަބު އީގަލްސްގެ ވައިސް ޗެއާމަން މުފާވިޒު ހާޝިމް (މުފާ) ހުށަހެޅުއްވި ސިޓީއަކީ ވެލެންސިއާގެ ވައިސް ޗެއާމަން އިލްމާއު ހުސެއިން ސޮއިކުރައްވާފައިވާ ސިޓީއެކެވެ.
އެކަމަކު ވެލެންސިއާގެ ޗެއާމަންކަމުގެ މަގާމުން އަޒްމީން ވަކިކުރަން މިދިޔަ ޑިސެމްބަރު މަހުގެ 26 ވަނަ ދުވަހު ބޭއްވި އެ ކުލަބުގެ ބޯޑު މެންބަރުންގެ ބައްދަލުވުމެއްގައި ވަނީ ނިންމާފައެވެ. އެ ބައްދަލުވުމުގައި އަަޒްމީނުގެ އިތުބާރު ނެތްކަމަށް ފާސްކުރިއިރު، އެރޭގެ ވަގުތެއްގައި ޗެއާމަންކަމުން އަޒްމީން އިސްތިއުފާދިން ކަމަށްވެސް އެ ކުލަބުން ވަނީ ބުނެފައެވެ. ނަމަވެސް އަޒްމީން ވަނީ ވެލެންސިއާގެ ޗެއާމަންގެ މަގާމުން އިސްތިއުފާ ނުުދެއްވާ ކަމަށް ވިދާޅުވެފައެވެ.
އެހެންކަމުން އެ މައްސަލައިގައި ގޮތެއް ނިންމުމަށް ފީފާ އާއި އޭއެފްސީގެ ލަފަޔަކަށް އެފްއޭއެމުން މީގެ ކުރިންވެސް އެދުނެއެވެ. އަދި އެ ފަހަރު ލިބުނު ލަފާގެ މަތިން އެފްއޭއެމުގެ އިލެކްޓޯރަލް ކޮމިޓީގެ ބައްދަލުވުމުގައި ވަނީ ވެލެންސިއާއިން ދިން ދެ ސިޓީވެސް ބަލައިނުގަންނަން ނިންމާފައެވެ. އެހެންކަމުން ޠާރިޤުގެ ކެންޑިޑެސީ ވަނީ ބާތިލުވެފައެވެ. އެއީ އެ ނިންމުމުގެ ސަބަބުން ތޯރިގު އަތުގައި އޮތީ ފުރަތަމަ ޑިވިޝަނުގެ ދެ ކުލަބުގެ ތާއީދު ކަމަށްވާތީއެވެ.
އިލެކްޓޯރަލް ކޮމިޓީގެ ނިންމުން ޠާރިޤު އިސްތިއުނާފުކުރެއްވި ނަމަވެސް، އިލެކްޓޯރަލް އެޕީލް ކޮމިޓީއެއް ނެތުމުން ޖަލްސާއެއް އަދި މިހާތަނަށް ބޭއްވިފައިނުވާ ކަމަށް އޭނާ ވަނީ ވިދާޅުވެފައެވެ. އަދި އެފްއޭއެމުގެ އަސާސީ ގަވާއިދާއި އިންތިޚާބީ ގަވާއިދާ ޚިލާފު ކޮމިޓީއަކުން އިންތިޚާބާ ބެހޭ އެއްވެސް ކަމެއް ކުރިއަށް ނުގެންދެވޭނެކަން ބަޔާންކޮށް، ފީފާ އާއި އޭއެފްސީއަށް މައްސަލަ ހުށަހަޅާފައިވާ ކަމަށްވެސް ޠާރިޤު މީގެ ކުރިން ވަނީ ވިދާޅުވެފައެވެ.
އެއާއެކު ރޭ ނެރުނު ބަޔާނެއްގައި އެފްއޭއެމުން ބުނީ މި ވަގުތު އެފްއޭއެމުގެ އިންތިޚާބީ އެޕީލް ކޮޮމިޓީއެއް އޮންނަ އުސޫލުގެ ތެރެއިން އެކުލަވާލެވިފައިނުވާތީ، މި ކަމުގައި އަމަލުކުރާނެ ގޮތެއް ކަނޑައަޅަން އެފްއޭއެމްގެ ދެ ބެލެނިވެރި ފަރާތް ކަމަށްވާ، ފީފާ އާއި އޭއެފްސީގައި އެދިފައިވާނެ ކަމަށެވެ.
އެފްއޭއެމުގެ އިންތިޚާބާ ގުޅޭ ގިނަ މަސައްލަތަކެއް ފެންމަތިވެފައިވާއިރު، ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވަނީ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް މީގެ ކުރިން އަންގަވާފައެވެ. ނަމަވެސް އެފްއޭއެމުގެ އިންތިޚާބުގެ ކަންކަން ހުއްޓާލާފައިނުވާ ކަމަށް އެ އިދާރާގެ އެކްޓިން ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް (ޖައު) ވަނީ ވިދާޅުވެފައެވެ.