ކުއްލި ފަރުވާދެވޭނެ ގޮތްތަކާއެކު ސޯޝަލް ސެންޓަރުގައި ފުރަތަމަ ފަހަރަށް ފެސިލިޓީއެއް

ކުޅިވަރު މުބާރާތްތައް ބާއްވާ ތަންތަނުގައި ހުރުން ލާޒިމުކުރާ ސިއްހީ ޚިދުމަތް ފޯރުކޮށްދިނުމަށް ބޭނުންވާ ވަސީލަތްތައް ޤާއިމުކުރުމުގެ މަސައްކަތުގެ ދަށުން ސޯޝަލް ސެންޓަރުގައި ޤާއިމުކުރި ފުރަތަމަ ފެސިލިޓީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިފްތިތާޙްކޮށްދެއްވައިފި އެވެ.

ރައީސުލްޖުމްހޫރިއްޔާ މި ފެސިލިޓީ އިފްތިތާޙްކޮށްދެއްވީ ޤައުމީ އަދި ބައިނަލްއަޤްވާމީ ކުޅިވަރު މުބާރާތްތައް ބާއްވާ ތަންތަނުގައި ހުރުން ލާޒިމުކުރާ ޞިއްހީ ޚިދުމަތް ފޯރުކޮށްދިނުމަށް ބޭނުންވާ ވަޞީލަތްތައް ޤާއިމުކުރަން ފެށުމުގެ ގޮތުން ސޯޝަލް ސެންޓަރުގައި ބޭއްވި ރަސްމިއްޔާތުގައެވެ.

މިއީ ސަރުކާރުގެ ހަފްތާ 14 ގެ މަސައްކަތްތަކުގެ ތެރޭގައި ހިމެނޭ ކުޅިވަރާ ގުޅުންހުރި ހަތް ލަނޑުދަނޑިތަކުގެ ތެރޭގައި ހިމެނޭ އެއް މަސައްކަތެވެ. މި މަސައްކަތުގެ ދަށުން ސޯޝަލް ސެންޓަރުގައި ވަނީ ކުއްލި ހާލަތެއްގައި ފަރުވާ ލިބޭނެގޮތަށް ހާއްސަ ފެސިލިޓީއެއް ޤާއިމުކޮށްފައެވެ. އަދި ކޯޓު ތެރޭގައި ވަނީ ކުއްލިއަކަށް ދިމާވާ ހިތުގެ މައްސަލަތަކާއި ބޮޑެތި އަނިޔާތަކަށް އަވަސް ގޮތެއްގައި ފަރުވާދޭނެ ނިޒާމެއް ޤާއިމުކޮށްފައެވެ.

މިއީ ރާއްޖޭގެ ކުޅިވަރު ތާރީޚުގައި މިފަދަ ފެސިލިޓީއެއް ޤާއިމުކުރި ފުރަތަމަ ފަހަރެވެ. އަދި މިއީ މި ސަރުކާރުގެ ވައުދުފުޅުތަކުގެ ތެރޭގައި ހިމެނޭ ކަންކަމުގެ ތެރެއިން ހާއްސަ އިސްކަމެއް ދެއްވައިގެން ކުރިއަށްގެންދިޔަ ބޮޑެތި މަސައްކަތްތަކުގެ ތެރެއިން އެއް މަސައްކަތެވެ.

ކުޅިވަރު ކުޅޭ ތަންތަނުގައި ހުންނަ މެޑިކަލް ރޫމް، ދަށްވެގެން ވަކި ޞިއްޙީ މިންގަނޑެއްގައި ޤާއިމުކޮށްފައި ހުންނަންޖެހެއެވެ. ޤައުމީ އަދި ބައިނަލްއަޤްވާމީ ކުޅިވަރު މުބާރާތްތައް ބާއްވާ ތަންތަނުގައި ހުރުން ލާޒިމްކުރާ ޞިއްޙީ ޚިދުމަތް ފޯރުކޮށްދިނުމުގެ ވަޞީލަތްތައް ޤާއިމުކުރުމުގެ މަޤްޞަދުތަކުގެ ތެރޭގައި ކުޅުންތެރިއަކަށް، އޮފިޝަލަކަށް ނުވަތަ ބެލުންތެރިއަކަށް ޞިއްޙީ ފުރަތަމަ އެހީ ދޭންޖެހޭފަދަ ހާލަތެއް މެދުވެރިވެއްޖެނަމަ އެހީތެރިވެދޭނެ އިންތިޒާމުހަމަޖެހިފައިވާކަން ކަށަވަރުކުރުން ހިމެނެއެވެ. އަދި އެފަދަ ހާލަތެއް މެދުވެރިވެއްޖެނަމަ އަވަސްފަރުވާ ދިނުމާއި ވީއެންމެ އަވަސް ފުރުޞަތެއްގައި ރައްކާތެރިކަމާއެކު ޞިއްޙީ ފަރުވާދޭ ހޮސްޕިޓަލަކަށް ނުވަތަ އިމަރޖެންސީ ފަރުވާދޭ ތަނަކަށް ގެންދިއުމުގެ އިންތިޒާމު ހަމަޖެހިފައިވާކަން ކަށަވަރުކުރުން މަޤްޞަދުތަކުގެ ތެރޭގައި ހިމެނެއެވެ.

ސަރުކާރުގެ ބައެއް ވަޒީރުންނާ ކުޅިވަރު އެސޯސިއޭޝަންތަކުގެ އިތުރުން ކުޅިވަރު އެތުލީޓުންގެ ބައިވެރިވުމާއެކު، މި ފެސިލިޓީ އިފްތިތާޙްކޮށްދެއްވުމަށް ސޯޝަލް ސެންޓަރުގައި ކުރިއަށްދިޔަ ރަސްމިއްޔާތުގައި ވާހަކަފުޅުދައްކަވަމުން ކުޅިވަރާ، ހަށިހެޔޮކަމާބެހޭ ވަޒީރު އަބްދުﷲ ރާފިޢު ވިދާޅުވީ މި ފެސިލިޓީ މެދުވެރިކޮށް ހަފްތާއަކު ތިން ދުވަހު ތެރަޕީ ހެދުމުގެ ފުރުސަތު ދިވެހި އެތުލީޓުންނަށް ހުޅުވާލާފައިވާ ކަމަށެވެ. އަދި އެކަމަށް ޚާއްސަ ވެބްސައިޓެއް ތައާރަފްކުރާއިރު، މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ އެހީތެރިކަމާއެކު މިކަމަށް ހާއްސަ އެޕްލިކޭޝަނެއް ވެސް ތައާރަފްކޮށްދެއްވާނެ ކަމަށް ވަޒީރު ވިދާޅުވިއެވެ.

މި ފެސިލިޓީގައި އެމެރިކަން ހާޓް އެސޯސިއޭޝަނުގެ މިންގަނޑުތަކާ އެއްގޮތަށް ތަމްރީނުވެފައިވާ ސިއްހީ އެހީތެރިން ތިބޭނެއެވެ. ސިއްހީ އެހީތެރިން ތަމްރީނުކޮށްދޭނީ މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި އެމްއެންޑީއެފް ގެ އެހީތެރިކަމާއެކު އެވެ.

ސޯޝަލް ސެންޓަރުގައި ޤާއިމްކުރި މި ފެސިލިޓީ އިފްތިތާޙްކޮށްދެއްވުމަށްފަހު ރައީސުލްޖުމްހޫރިއްޔާ އެތަން ބައްލަވާލެއްވިއެވެ. މީގެ އިތުރުން ސޯޝަލް ސެންޓަރުގައި ފަށާ މިއަހަރުގެ ބާސްކެޓްބޯލް ސީޒަން ހުޅުވުމުގެ ގޮތުން ބޭއްވި އެގްޒިބިޝަން ބާސްކެޓްބޯލް މެޗެއް ވެސް ރައީސުލްޖުމްހޫރިއްޔާ ބައްލަވާލެއްވިއެވެ.

ކުޅިވަރު ކުރިއެރުވުމާއި ކުޅުންތެރިންނަށް ބޭނުންވާ ޞިއްޙީ ފަރުވާ އަދި ފިޓްނަސްއާ ގުޅޭކަންކަން ފަހިކޮށްދެއްވުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ.