ގަތަރުގައި މިހާރު ކުރިއަށްދާ އޭއެފްސީ އޭޝިއަން ކަޕް ފުޓްބޯޅަ މުބާރާތުގެ ގުރޫޕް ސީގައި ފަލަސްތީނާ ދެކޮޅަށް ކުޅުނު މެޗު އީރާނުން ފަސޭހަކަމާއެކު ކާމިޔާބުކޮށްފިއެވެ.
އެޑިއުކޭޝަން ސިޓީ ސްޓޭޑިއަމުގައި ރޭ ކުޅުނު މެޗުން އީރާން މޮޅުވީ 4-1 ގެ ނަތީޖާއަކުންނެވެ.
މި މެޗުގެ ވަރަށް ކުރީކޮޅު އީރާނުން ވަނީ ލީޑު ނަގާފައެވެ. މެޗު ފަށައިގެން ދެވަނަ މިނެޓުގައި މި ލަނޑު ކާމިޔާބުކޮށްދިނީ ކަރީމް އަންސަރީފާދެވެ. އަދި މެޗުގެ 12 ވަނަ މިނެޓުގައި ޝޮޖާ ޚަލީލްޒާދޭ ވަނީ ލަނޑެއް ޖަހައި، އީރާނުގެ ލީޑު ފުޅާކޮށްދީފައެވެ. މި މެޗުގައި އީރާނުން ކާމިޔާބުކުރި ތިންވަނަ ލަނޑު މެޗުގެ 38 ވަނަ މިނެޓުގައި ކާމިޔާބުކޮށްދިނީ މެހެދީ ޣަޔޭދީއެވެ. އެކަމަކު ފުރަތަމަ ހާފުގެ އިތުރު ވަގުތުގެ ތެރޭގައި ތަމޭރް ސެޔާމް ވަނީ މި މެޗުގައި ފަލަސްތީނުން ކާމިޔާބުކުރި ހަމައެކަނި ލަނޑު ޖަހައިދީފައެވެ.
މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ހާފު ފަށައިގެން 10 ވަނަ މިނެޓުގައި އީރާނުން ވަނީ ހަތަރުވަނަ ލަނޑެއް ޖަހާފައެވެ. މި ލަނޑު އެ ޓީމަށް ކާމިޔާބުކޮށްދިނީ ސަރްދާރް އަޒްމޫނެވެ.
މި މެޗުން އީރާން ފަސޭހަ މޮޅެއް ހޯދިއިރު، މި ގްރޫޕުގައި ރޭ ކުޅުނު އަނެއް މެޗުގައި ޔުނައިޓެޑް އަރަބް އެމިރޭޓްސް (ޔޫއޭއީ) އިން ވަނީ 3-1 ގެ ނަތީޖާއަކުން ހޮންގް ކޮންގް ބަލިކޮށްފައެވެ.