ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2024 ފެށުމަށް ބޭއްވި ޗެރިޓީ ޝީލްޑް މެޗު ކާމިޔާބުކޮށް، އެންމެ ފަހުގެ ޗެމްޕިއަން ލ. ގަމުން ޝީލްޑް އުފުލާލައިފިއެވެ.
މިއީ ގޯލްޑަން ފުޓްސަލް ޗެލެންޖުން ޝީލްޑް މެޗު ބޭއްވި ދެވަނަ ފަހަރެވެ. މި ދެ ފަހަރުވެސް ޝީލްޑް މެޗުގައި މުބާރާތުގެ އެންމެ ކާމިޔާބު ޓީމު ކަމަށްވާ ތ. ތިމަރަފުށި ވާދަކުރި ނަމަވެސް، ދެ މެޗުންވެސް ތިމަރަފުށި ވަނީ ބަލިވެފައެވެ. އެގޮތުން ރޭ ކުޅުނު މެޗުގައި 3-2 ގެ ނަތީޖާއަކުން ގަން އަތުން ބަލިވިއިރު، މިދިޔަ އަހަރު ކ. ގާފަރު އަތުން ތިމަރަފުށި ބަލިވީ 3-0 ގެ ނަތީޖާއަކުންނެވެ.
ހުޅުމާލޭ ރެހެންދި ފުޓްސަލް އެއް ނަންބަރު ދަނޑުގައި ރޭ ކުޅުނު މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ގަމުންނެވެ. ފުރަތަމަ ހާުފުގެ ފަހުކޮޅު އަލީ ޝާމިސް ދިން ބޯޅައަކުން މި ލަނޑު ކާމިޔާބުކޮށްދިނީ ހުސެއިން ނާޝިދެވެ.
އެކަމަކު މެޗުގެ ދެވަނަ ހާފުގެ ކުރީކޮޅު ތިމަރަފުށިން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އާދަމް ނާސިހެވެ. އެކަމަކު އޭގެ އިރުކޮޅެއް ފަހުން ދެވަނަ ހާފުގައި ކުޅެން ނުކުތް ގަމުގެ އަޙްމަދު ހަލީމް ވަނީ ލަނޑެއް ޖަހައި، އެ ޓީމަށް އަލުން ލީޑު ނަގައިދީފައެވެ.
މި މެޗު ނިމެން މިނެޓަކަށް ވެފައި ވަނިކޮށް ތިމަރަފުށިން ވަނީ ލަނޑެއް ޖަހައި، ނަތީޖާ އެއްވަރުކޮށްފައެވެ. މި ލަނޑު ކާމިޔާބުކޮށްދިނީ ބަދަލަކަށް ކުޅެން އެރި އިސްމާޢީލް މުނީޒެވެ. ނަމަވެސް މެޗުގެ އިތުރު ވަގުތުގެ ތެރޭގައި ލިބުނު ހިލޭ ޖެހުމަކުން އަޙްމަދު ހަލީމް ވަނީ އިތުރު ލަނޑެއް ޖަހައި، މި މެޗުން ގަން މޮޅުކޮށްދީފައެވެ.
މި ފަހަރުގެ ޝީލްޑް މެޗުން މޮޅުވި ގަމަށް ގޯލްޑަން ފުޓްސަލް އެސޯސިއޭޝަނުން ދިން 25،000 ރުފިޔާ ވަނީ ފަލަސްތީނުގެ ގާޒާގެ ރައްޔިތުންނަށް އެހީގެ ގޮތުގައި ހަދިޔާކޮށްފައެވެ. އެގޮތުން މި ފައިސާ ހަވާލުކޮށްފައިވަނީ، އިންޓަނޭޝަނަލް އެއިޑް ކެމްޕޭން (އައިއޭސީ) އާއެވެ.
މި ފަހަރުގެ ގޯލްޑަން ފުޓްސަލް ޗެލެންޖުގައި ޖުމްލަ 129 ޓީމެއް ވަނީ ބައިވެރިވެފައެވެ. އަދި 320 މެޗު ކުޅޭ ގޮތަށް ހަމަޖެހިފައިވާއިރު، މި ފަހަރުގެ މުބާރާތުގައި ރާއްޖޭގެ ހުރިހާ އަތޮޅަކުން ޓީމުތައް ވާދަކުރާނެއެވެ.