ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބަށް އެކުލަވާލާފައިވާ އިލެކްޓޯރަލް ކޮމިޓީއާ ދެކޮޅަށް, ދުނިޔޭގެ ފުޓްބޯޅައިގެ މައި ޖަމުއިއްޔާ ފީފާ އާއި އޭޝިއާގެ ފުޓްބޯޅައިގެ މައި އިދާރާ އޭއެފްސީއަށް މައްސަލަ ހުށަހަޅާފައިވާ ކަމަށް އިންތިޚާބުގައި ވާދަކުރައްވާ ގައުމީ ޓީމުގެ ކުރީގެ ފޯވާޑް އަޙްމަދު ޠާރިޤު (ޓޮމް) ވިދާޅުވެއްޖެއެވެ.
މި މަހުގެ 31 ވަނަ ދުވަހު އެފްއޭއެމުގެ އިންތިޚާބު ބާއްވަން ތާވަލުކޮށްފައިވާއިރު، އިންތިޚާބުގައި ވާދަކުރާ ދެ ކެންޑިޑޭޓުންނަށް ކުލަބު ވެލެންސިއާއިން ދީފައިވާ ތާއީދު ސިޓީ ބަލައިނުގަންނަން އިލެކްޓޯރަލް ކޮމިޓީން ނިންމުމާއެކު، އިންތިޚާބުގައި ވާދަކުރައްވާ އެފްއޭއެމުގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު ޠާރިޤުގެ ކެންޑިޑެސީ ވަނީ ބާތިލުވެފައެވެ.
އޭގެ ތެރެއިން ތޯރިގަށް ތާއީދު ސިޓީ ދީފައިވަނީ އެ ކުލަބުގެ ޗެއާމަނަކަށް ހުންނެވި އަބްދުﷲ އަޒްމީން ސޮއިކުރައްވައެވެ. އަދި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު އަދި ކުލަބު އީގަލްސްގެ ވައިސް ޗެއާމަން މުފާވިޒު ހާޝިމް (މުފާ) ހުށަހެޅުއްވި ސިޓީއަކީ ވެލެންސިއާގެ ވައިސް ޗެއާމަން އިލްމާއު ހުސެއިން ސޮއިކުރައްވާފައިވާ ސިޓީއެކެވެ.
އެކަމަކު ވެލެންސިއާގެ ޗެއާމަންކަމުގެ މަގާމުން އަޒްމީން ވަކިކުރަން މިދިޔަ ޑިސެމްބަރު މަހުގެ 26 ވަނަ ދުވަހު ބޭއްވި އެ ކުލަބުގެ ބޯޑު މެންބަރުންގެ ބައްދަލުވުމެއްގައި ވަނީ ނިންމާފައެވެ. އެ ބައްދަލުވުމުގައި އަަޒްމީނުގެ އިތުބާރު ނެތްކަމަށް ފާސްކުރިއިރު، އެރޭގެ ވަގުތެއްގައި ޗެއާމަންކަމުން އަޒްމީން އިސްތިއުފާދިން ކަމަށްވެސް އެ ކުލަބުން ވަނީ ބުނެފައެވެ. ނަމަވެސް އަޒްމީން ވަނީ ވެލެންސިއާގެ ޗެއާމަންގެ މަގާމުން އިސްތިއުފާ ނުުދެއްވާ ކަމަށް ވިދާޅުވެފައެވެ.
އެހެންކަމުން މި މައްސަލައިގައި ގޮތެއް ނިންމުމަށް ފީފާ އާއި އޭއެފްސީގެ ލަފަޔަކަށް އެފްއޭއެމުން މީގެ ކުރިން ވަނީ އެދިފައެވެ. އެ ލަފާގެ މަތިން އެފްއޭއެމުގެ އިލެކްޓޯރަލް ކޮމިޓީގެ ބައްދަލުވުމުގައި ވަނީ ވެލެންސިއާއިން ދިން ދެ ސިޓީވެސް ބަލައިނުގަންނަން ނިންމާފައެވެ. ވެލެންސިއާގެ ތާއީދު ސިޓީ ބަލައިނުގަންނަން ނިންމުމާއެކު ތޯރިގުގެ ކެންޑިޑެސީ ބާތިލުވާނެއެވެ. އެއީ އެ ނިންމުމުގެ ސަބަބުން ތޯރިގު އަތުގައި އޮތީ ފުރަތަމަ ޑިވިޝަނުގެ ދެ ކުލަބުގެ ތާއީދު ކަމަށްވާތީއެވެ.
އިލެކްޓޯރަލް ކޮމިޓީގެ ނިންމުން ޠާރިޤު އިސްތިއުނާފުކުރެއްވި ނަމަވެސް، އިލެކްޓޯރަލް އެޕީލް ކޮމިޓީއެއް ނެތުމުން ޖަލްސާއެއް އަދި މިހާތަނަށް ބޭއްވިފައިނުވާ ކަމަށް މިއަދު ނެރުނު ބަޔާނެއްގައި ޠާރިޤު ވަނީ ވިދާޅުވެފައެވެ. އަދި އެފްއޭއެމުގެ އަސާސީ ގަވާއިދާއި އިންތިޚާބީ ގަވާއިދާ ޚިލާފު ކޮމިޓީއަކުން އިންތިޚާބާ ބެހޭ އެއްވެސް ކަމެއް ކުރިއަށް ނުގެންދެވޭނެކަން ބަޔާންކޮށް، ފީފާ އާއި އޭއެފްސީއަށް މައްސަލަ ހުށަހަޅާފައިވާ ކަމަށްވެސް ޠާރިޤު ވަނީ ވިދާޅުވެފައެވެ.
އެފްއޭއެމުގެ އިންތިޚާބާ ގުޅޭ ގިނަ މަސައްލަތަކެއް ފެންމަތިވެފައިވާއިރު، ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވަނީ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް މީގެ ކުރިން އަންގަވާފައެވެ. ނަމަވެސް އެފްއޭއެމުގެ އިންތިޚާބުގެ ކަންކަން ހުއްޓާލާފައިނުވާ ކަމަށް އެ އިދާރާގެ އެކްޓިން ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް (ޖައު) ވަނީ ވިދާޅުވެފައެވެ.