ޚަބަރު

އެއަރ އެންބިއުލަންސްގެ ޚިދުމަތް ތައިލޭންޑާ ހަމައަށް ފުޅާކުރެވޭނެ: ރައީސުލްޖުމްހޫރިއްޔާ


  • އެއަރ އެންބިއުލަންސްގެ ޚިދުމަތް ރާއްޖޭން ބޭރަށް ފުޅާކުރެވޭނެ ކަމަށް ވިދާޅުވި

  • ރަނގަޅު ސިއްހީ ޚިދުމަތްދޭ ޤައުމުތަކުން އާސަންދައިން ބޭސްކުރެވޭނެ ކަމަށް

  • ފެންވަރު ރަނގަޅު ބޭރުގެ ކުންފުނިތަކުން ބޭސް އެތެރެކުރެވޭނެ ކަމަށް

ރާއްޖޭގައި ބަލިމީހުން ގޮވައިގެން ދަތުރުކުރުމަށް ތަޢާރަފްކުރެވޭ އެއަރ އެންބިއުލަންސްގެ ޚިދުމަތް ތައިލޭންޑާއި ހަމައަށް ފުޅާކުރެވިގެންދާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެވެ.

ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލައްވާ ރާއްޖެ ވަޑައިގަތުމަށްފަހު ނޫސްވެރިންނަށް މައުލޫމާތު ދެއްވަމުން، ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވީ، އެއަރ އެމްބިއުލަންސްގެ ޚިދުމަތް މާރިޗު މަހު ފެށުމަށް ހަމަޖެހިފައިވާ ކަމަށެވެ. އަދި އާންމުކޮށް ސިއްހީ ޚިދުމަތް ލިބިގަތުމަށް ނުދާ ޤައުމުތަކަށް ދާންޖެހިއްޖެނަމަ އެގައުމުތަކަށްވެސް އެއަރ އެންބިއުލަންސްގެ ދަތުރު ފެށިގެންދާނެކަމަށް ވިދާޅުވިއެވެ.

"ބަލިމީހުން އުފުލަން އެއަރ އެމްބިއުލަންސް 1 މާރިޗުގައި އިރާދަކުރެއްވިއްޔާ އުދުހެން ފަށާނެ. އެންމެ އުތުރުން ނޫނީ އެންމެ ދެކުނުން މާލެއަށް ކުޑައިރުކޮޅަކުން އާދެވުމުގެ އިތުރަށް ކުއްލިއަކަށް ރާއްޖެއިން ބޭރަށް ތައިލެންޑާ ހަމަޔަށް ގެންދަންވިޔަސް އެ ޑޭޝް 8 ގައި ދާނެ." ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ސިއްހީ ޚިދުމަތް ހޯދުމަށް ވަކި ޤައުމަކަށް ބަރޯސާވުމުގެ ބަދަލުގައި ދުނިޔޭގެ ނިސްބަތުން ފެންވަރު ރަނގަޅު ސިއްޙީ ޚިދުމަތް ލިބޭ ޤައުމުތަކުން، ރާއްޖޭގެ ރައްޔިތުންނަށް ސިއްޙީ ޚިދުމަތް ލިބޭނެ އިންތިޒާމު ހަމަޖެހިގެންދާނެކަމަށެވެ. އެގޮތުން ދުބާއީ އަދި ތައިލެންޑް ފަދަ ތަރައްޤީވެ ކުރިއަރާފައިވާ ޤައުމުތަކުން ރާއްޖޭގެ ރައްޔިތުންނަށް ހިލޭ ބޭސް ފަރުވާގެ ޚިދުމަތް ލިބިގެންދާ ގޮތް ހެދިގެން ދިއުމުން ރައްޔިތުންނަށް ލުއިފަސޭހަވެ ފެންވަރު ރަނގަޅު ބޭސްފަރުވާގެ ޚިދުމަތް ލިބިގެންދާނެކަމަށް ވިދާޅުވިއެވެ.

ދިވެހިން ޢާންމުކޮށް ބޭސްފަރުވާގެ ޚިދުމަތް ލިބިގަތުމަށް ދަތުރުކުރާ ޤައުމުތަކުގައި ގޮންޖެހުންތަކާއި ކުރިމަތިލާންޖެހެއެވެ. އޭގެ ތެރޭގައި އެތަންތަނުގައި ދިރިއުޅުމުގައި ބައެއް މައްސަލަތަށް ދިމާވާ ފަހަރުތައް އާދެއެވެ. މިހެން ދިމާވާ ސަބަބުތަކުގެ ތެރޭގައި ދިރިއުޅޭ ތަން ސާފުތާހިރު ނުވުމުގެ ސަބަބުން އެތަންތަނުގެ ޚިދުމަތް ލިބިގަތުމުގައި އުނދަގޫތައް ތަޙައްމަލް ކުރަންޖެހޭކަން ފާހަގަކުރެވެއެވެ.

ނަމަވެސް، ޔޫއޭއީ އާއިި ތައިލެންޑް ފަދަ ޤައުމުތަކަކީ ތަހުޒީބީ ގޮތުން ކުރިއަރާފައިވާ ޤައުމުތަކަށްވެފައި އެތަންތަނުން ދެވޭ ސިއްހީ ޚިދުމަތްތަކަކީ ދުނިޔޭގެ ފެންވަރުގައި ފާހަގަކޮށްލެވޭ ރަނގަޅު ސިއްޙީ ޚިދުމަތްދޭ ހޮސްޕިޓަލުތައް ހުންނަ ޤައުމުތަކެއްކަމުން، ރާއްޖޭން ބޭސްފަރުވާއަށްދާ ދިވެހިންނަށް ސިއްޙީ ޚިދުމަތް ލިބިގަތުމުގައި ލުއިފަސޭހަތަކެއް ލިބިގެންދާނެކަމަށް ރައީސުލްޖުމްހޫރިއްޔާ ފާހަގަކުރެއްވިއެވެ.

ރާއްޖެއަށް އެތެރެކުރާ ބޭހައަކީ ފެންވަރު ރަނގަޅު ބޭސްކަން ކަށަވަރުކޮށް އާދައިގެ ބޭސް އެތެރެކުރުމުގެ ބަދަލުގައި، ބޭސްތައް އުފައްދާ ޤައުމުތަކުން ސީދާ ރާއްޖެއަށް ބޭސް އެތެރެކުރުމުގެ އިންތިޒާމްވެސް ހަމަޖައްސައި ދެއްވާނެކަމުގެ ޔަގީންކަން ރައީސުލްޖުމްހޫރިއްޔާވަނީ ދެއްވާފައެވެ.

"އިރާދަކުރެއްވިއްޔާ އަޅުގަނޑުމެންގެ ޤައުމަށް ދެން މާލަސްތަކެއްނުވެ އެތެރެކުރާނީ، ޔޫރަޕްގެ ބޭސް އުފައްދާ އަޞްލު އެކިތަންތަނުންނާއި، އެމެރިކާގެ ތަންތަނުން. ވަކި ޤައުމަކުން ގެންނަ، ބޭސް ގެނައުންވެސް އިރާދަކުރެއްވިއްޔާ ނިމުމަކަށް އަންނާނެ." ރައީސުލްޖުމްހޫރިއްޔާ ވިދާޅުވިއެވެ.

މި ބަދަލުތައް ގެނެވުމާއެކު ބޭސް އެތެރެކުރުމުގައި ހިނގާ ކޮރަޕްޝަންގެ މުޢާމަލާތްތަކާއި، ބޭހުގެ ސައްޙަކަމާމެދު ޝައްކުކުރެވުން ނައްތާލެވި ރާއްޖޭގެ އެންމެހާ ރައްޔިތުންނަށް ފެންވަރު ރަނގަޅު ބޭސް އާސަންދައިގެ ދަށުން ހަމަޖެހިގެންދާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވިއެވެ.