ގަތަރުގައި މިހާރު ކުރިއަށްދާ އޭއެފްސީ އޭޝިއަން ކަޕް ފުޓްބޯޅަ މުބާރާތުގެ ގުރޫޕް ބީގައި އިންޑިއާއާ ދެކޮޅަށް ކުޅުނު މެޗު އޮސްޓްރޭލިއާއިން ކާމިޔާބުކޮށްފިއެވެ.
އަހްމަދު ބިން އަލީ ސްޓޭޑިއަމުގައި މިއަދު ހަވީރު ކުޅުނު މެޗުން އޮސްޓްރޭލިއާ މޮޅުވީ 2-0 ގެ ނަތީޖާއަކުންނެވެ.
މި މެޗުގެ ފުރަތަަމަ ހާފުގައި އޮސްޓްރޭލިއާއިން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، މި ހާފުގައި އިންޑިއާއިންވެސް ވަނީ ރަނގަޅު ފުރުސަތުތަކެއް ތަނަވަސްކޮށްފައެވެ. އެކަމަކު ފުރަތަމަ ހާފުގެ ކުޅުން ނިމިގެންދިޔައީ ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ.
މި މެޗުގެ ދެވަަނަ ހާފުގައި އޮސްޓްރޭލިއާއިން ވަނީ އެ ޓީމުގެ އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މި ހާފުގެ ފަށައިގެން ފަސްވަނަ މިނެޓުގައި އެ ޓީމުން ވަނީ ލީޑު ނަގާފައެވެ. އިންޑިއާގެ ގޯލްކީޕަރު ގުރްޕްރީތު ސިންގް ސަންދޫގެ އަތުގައި ޖެހިފައި ނުކުތް ބޯޅައަކުން މި ލަނޑު ކާމިޔާބުކޮށްދިނީ ޖެކްސަން އާވިންއެވެ.
އަދި މެޗުގެ 73 ވަނަ މިނެޓުގައި ބަދަލަކަށް އެރި ދެ ކުޅުންތެރިންގެ ބައިވެރިވުމާއެކު އޮސްޓްރޭލިއާއިން ވަނީ ލީޑު ފުޅާކޮށްފައެވެ. ރައިލީ މެކްގްރީ ނަގައިދިން ހުރަހަކުން މި ލަނޑު ކާމިޔާބުކޮށްދިނީ ޖޯޑަން ބޮސްއެވެ.
މި މެޗު ބަލަން 36،253 ސަޕޯޓަރުން ދަނޑަށް ވަންއިރު، މި މެޗުގެ ރެފުރީ އަކީ ޖަޕާންގެ އަންހެން ރެފުރީ ޔޮޝީމީ ޔަމަޝީޓާއެވެ. އެއާއެކު ޔަމަޝީޓާ ވެފައިވަނީ އޭޝިއަން ކަޕުގެ ތާރީޚުގައި މެޗެއްގެ ރެފުރީކަން ކުރި ފުރަތަމަ އަންހެން ރެފުރީއަށެވެ.
މި މުބާރާތުގެ ގްރޫބް ބީގައި ކުޅުނު ފުރަތަމަ މެޗުން އޮސްޓްރޭލިއާ މޮޅުވިއިރު، މި ގްރޫޕުގެ އަނެއް މެޗުގައި މިރޭ އުޒްބެކިސްތާނާއި ސީރިއާ ބައްދަލުކުރި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހި އެއްވަރުވެގެންނެވެ.