ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބުގައި ވާދަކުރާ ދެ ކެންޑިޑޭޓުންނަށް ކުލަބު ވެލެންސިއާއިން ދީފައިވާ ތާއީދު ސިޓީ ބަލައިނުގަންނަން އިލެކްޓޯރަލް ކޮމިޓީން ނިންމުމާއެކު، އިންތިޚާބުގައި ވާދަކުރައްވާ ގައުމީ ޓީމުގެ ކުރީގެ ފޯވާޑް އަޙްމަދު ތޯރިގު (ޓޮމް) ގެ ކެންޑިޑެސީ ބާތިލުވެއްޖެއެވެ.
މި މަހުގެ 31 ވަނަ ދުވަހު އެފްއޭއެމުގެ އިންތިޚާބު ބާއްވަން ތާވަލުކޮށްފައިވާއިރު، ވެލެންސިއާއިން ވަނީ އިންތިޚާބުގައި ވާދަކުރާ ދެ ކެންޑިޑޭޓުން ކަމަށްވާ އެފްއޭއެމުގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު ތޯރިގާއި މިހާރުގެ ރައީސް ބައްސާމް އަދީލް ޖަލީލުގެ ހިންގާ ކޮމިޓީގެ މެންބަރު އަދި ކުލަބު އީގަލްސްގެ ވައިސް ޗެއާމަން މުފާވިޒު ހާޝިމް (މުފާ) އަށްވެސް ތާއީދު ސިޓީއެއް ދީފައެވެ.
އޭގެ ތެރެއިން ތޯރިގަށް ތާއީދު ސިޓީ ދީފައިވަނީ އެ ކުލަބުގެ ޗެއާމަނަކަށް ހުންނެވި އަބްދުﷲ އަޒްމީން ސޮއިކުރައްވައެވެ. އަދި މުފާ ހުށަހެޅުއްވި ސިޓީއަކީ ވެލެންސިއާގެ ވައިސް ޗެއާމަން އިލްމާއު ހުސެއިން ސޮއިކުރައްވާފައިވާ ސިޓީއެކެވެ.
އެކަމަކު ވެލެންސިއާގެ ޗެއާމަންކަމުގެ މަގާމުން އަޒްމީން ވަކިކުރަން މިދިޔަ ޑިސެމްބަރު މަހުގެ 26 ވަނަ ދުވަހު ބޭއްވި އެ ކުލަބުގެ ބޯޑު މެންބަރުންގެ ބައްދަލުވުމެއްގައި ވަނީ ނިންމާފައެވެ. އެ ބައްދަލުވުމުގައި އަަޒްމީނުގެ އިތުބާރު ނެތްކަމަށް ފާސްކުރިއިރު، އެރޭގެ ވަގުތެއްގައި ޗެއާމަންކަމުން އަޒްމީން އިސްތިއުފާދިން ކަމަށްވެސް އެ ކުލަބުން ވަނީ ބުނެފައެވެ. ނަމަވެސް އަޒްމީން ވަނީ ވެލެންސިއާގެ ޗެއާމަންގެ މަގާމުން އިސްތިއުފާ ނުުދެއްވާ ކަމަށް ވިދާޅުވެފައެވެ.
އެހެންކަމުން މި މައްސަލައިގައި ގޮތެއް ނިންމުމަށް ދުނިޔޭގެ ފުޓްބޯޅައިގެ މައި ޖަމުއިއްޔާ ފީފާ އާއި އޭޝިއާގެ ފުޓްބޯޅައިގެ މައި އިދާރާ އޭއެފްސީގެ ލަފަޔަކަށް އެފްއޭއެމުން މީގެ ކުރިން ވަނީ އެދިފައެވެ. އެ ލަފާގެ މަތިން މިއަދު ބޭއްވި އެފްއޭއެމުގެ އިލެކްޓޯރަލް ކޮމިޓީގެ ބައްދަލުވުމުގައި ވަނީ ވެލެންސިއާއިން ދިން ދެ ސިޓީވެސް ބަލައިނުގަންނަން ނިންމާފައެވެ. އަދި އެ ނިންމުން އިލެކްޓޯރަލް ކޮމިޓީން ވަނީ ފީފާ އާއި އޭއެފްސީއަށް ހިއްސާކޮށްފައެވެ.
ވެލެންސިއާގެ ތާއީދު ސިޓީ ބަލައިނުގަންނަން ނިންމުމާއެކު ތޯރިގުގެ ކެންޑިޑެސީ ބާތިލުވާނެއެވެ. އެއީ އެ ނިންމުމުގެ ސަބަބުން ތޯރިގު އަތުގައި އޮތީ ފުރަތަމަ ޑިވިޝަނުގެ ދެ ކުލަބުގެ ތާއީދު ކަމަށްވާތީއެވެ. އެ ކުލަބުތަކަކީ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކުލަބެވެ.
އިންތިޚާބުގައި ދެން ވާދަކުރައްވާ މުފާއަށް މީގެ ކުރިން ފަސް ކުލަބަކުން ތާއީދުކޮށްފައިވާއިރު، އެފްއޭއެމުގެ އިންތިޚާބުގައި ވާދަކުރެވޭނީ މަދުވެގެން ފުރަތަމަ ޑިވިޝަނުގެ ތިން ކުލަބެއްގެ ތާއީދާއެކުއެވެ. ވެެލެންސިއާގެ ތާއީދު ސިޓީ ބަލައިނުގަތުމުން މުފާއަށް ތާއީދުކުރާ ފުރަތަމަ ޑިވިޝަނުގެ ކުލަބުތަކަކީ އީގަލްސް، ކުލަބު ގްރީން ސްޓްރީޓްސް، ޔުނައިޓެޑް ވިކްޓަރީ (ޔޫވީ)، ސުޕަ ޔުނައިޓެޑް ސްޕޯޓްސް (ސަސް) އަދި ބުރު ސްޕޯޓްސް ކުލަބެވެ.
އިލެކްޓޯރަލް ކޮމިޓީން ތޯރިގުގެ ކެންޑިޑެސީ ބާތިލުކުރުމުން، އެ ނިންމުން އިސްތިއުނާފު ފުރުސަތު އޭނާއަށް އޮންނާނެއެވެ. އަދި އިސްތިއުނާފުކޮށްގެން ތޯރިގުގެ ކެންޑިޑެސީ ސައްހަ ކަމަށް ކަނޑަނޭޅިއްޖެނަމަ، އެފްއޭއެމުގެ އިންތިޚާބުގައި ކުރިއަށްދާނީ މުފާގެ ޓީމާ މެދު ނަގާ ފެންނަ ނުފެންނަ ވޯޓެކެވެ. މީގެ އިތުރުން މި މައްސަލައިގައި ވެލެންސިއާގެ ޑިސިޕްލިނަރީ މައްސަލައެއްވެސް ކުރިއަށްދާނެއެވެ.
އެފްއޭއެމުގެ އިންތިޚާބާ ގުޅޭ ގިނަ މަސައްލަތަކެއް ފެންމަތިވެފައިވާއިރު، ކޮމިޝަނަރ އޮފް ސްޕޯޓްސް މުޙައްމަދު ޠަލާލް ވަނީ އިންތިޚާބުގެ ކަންކަން ކުރިއަށް ނުގެންގޮސް ހުއްޓާލުމަށް މީގެ ކުރިން އަންގަވާފައެވެ. ނަމަވެސް އެފްއޭއެމުގެ އިންތިޚާބުގެ ކަންކަން ހުއްޓާލާފައިނުވާ ކަމަށް އެ އިދާރާގެ އެކްޓިން ޖެނެރަލް ސެކްރެޓަރީ މުޙައްމަދު ޖައުޝަން ޝަރީފް (ޖައު) ވަނީ ވިދާޅުވެފައެވެ.