ވިއްސާރައިގައި ލިބުނު ގެއްލުން ދެނެގަތުމުގެ މަސައްކަތް އެމްއެންޑީއެފްއިން ފަށައިފި

ޑިސެމްބަރު މަހުގެ 31 ވަނަ ދުވަހު މާލެއަށް ބޯކޮށްވާރޭވެހި މާލޭގެ ބޮޑު ސަރަޙައްދެއްގައި ފެންބޮޑުވުމުގެ ސަބަބުން ގެއްލުން ލިބިފައިވާ ގެތަކުގެ މަޢުލޫމާތު އެއްކުރުމުގެ މަސައްކަތް މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފްއިން ފައްޓަވައިފިއެވެ.

އެމްއެންޑީއެފްއިން ވިދާޅުވީ، ވިއްސާރައިގެ ސަބަބުން ލިބިފައިވާ ގެއްލުން ދެނެގަތުމުގެ ސަރވޭ ކުރިއަށްގެންދަނީ މާލެ އޭރިއާ ކޮމާންޑުންކަމަށެވެ. މިސަރވޭގައި ވިއްސާރައިގައި ގެއްލުން ލިބުނު ގެތައް ދެނެގަނެ އެގޭބިސީތަކުގެ ލޮކޭޝަން މެޕްކޮށް ކުރިއަށް އޮތްތަނުގައި ފެންބޮޑުވެގެން ލިބޭ ގެއްލުން ކުޑަކުރުމަށް ދުރާލާ އެޅިދާނެ ފިޔަވަޅުތައް ހިއްސާކުރައްވާނެކަމަށެވެ. މި ސަރވޭ ކުރިއަށްދާނީ މި މަހުގެ 8 ވަނަ ދުވަހުގެ ނިޔަލަށްކަމަށްވެސް އެމްއެންޑީއެފްއިން ވިދާޅުވެއެވެ.

ވިއްސާރަވުމުގެ ސަބަބުން މާލޭގައި ފެންބޮޑުވެ ގެއްލުންވާ ގެތަކުގެ މަޢުލޫމާތު އެއްކުރުމަށް އެމްއެންޑީއެފް މާލެ އޭރިއާ ކޮމާންޑުން ސާވޭއެއް ފަށައިފި.https://t.co/wmHLXU2b9g pic.twitter.com/ZkdGpCW31n

— Maldives National Defence Force (@MNDF_Official) January 6, 2024

މިވިއްސާރައިގައި ލިބުނު ގެއްލުން ދެނެގަތުމުގެ މަސައްކަތް އެންޑީއެމްއޭއިންވެސް އަންނަނީ ކުރައްވަމުންނެވެ. އެއިދާރާއިން ވިދާޅުވީ، ވިއްސާރައިގައި ފެންވަދެ 164 ގެއަކަށް ގެއްލުންވި ކަމަށް ރިޕޯޓުކޮށްފައިވާކަމަށެވެ.

ޑިސެމްބަރު 31 ވަނަ ދުވަހު މާލެއަށް ބޯކޮށް ވާރޭ ވެހި ފެންބޮޑުވުމާއި ގުޅިގެން ހާލުގައިޖެހުނު 11 ގޭބިސީއެއްގެ 46 މީހަކު ވަގުތީ ހިޔާވެއްސަށް ބަދަލުކޮށް 3 ދުވަހުގެ މުއްތަކަށް އެމީހުންގެ ހުރުމާއި ކެއިންބުއިމުގެ ހުރިހާ ޚަރަދެއް ސަރުކާރުން ވަނީ ހަމަޖައްސަވާދެއްވާފައެވެ.