ޖަޕާނުގެ މެދުތެރޭގައި އޮންނަ އިޝިކަވާ ޕުރޮވިންސަށް އައި ބާރުގަދަ ބިންހެލުމުގައި ބޮޑެތި ގެއްލުންތަކެއް ލިބިއްޖެއެވެ. ރިކްޓަރ މިންގަނޑުން 7.5ގައި ރެކޯޑު ކުރެވިފައިވާ ބިންހެލުމާ އެކު އެ ޤައުމުގެ އައްސޭރިފަށުގައި އޮންނަ ސަރަޙައްދުތަކަށް ސުނާމީއެއް އަރާފާނެ ކަމުގެ އިންޒާރު ދީފައިވެއެވެ. އިންޒާރު ދީފައި ވަނީ އިޝިކަވާގެ އިތުރުން ނީގަތާއާއި ޓޮޔާމާ ޕުރޮވިންސަށެވެ.
ސުނާމީގެ އިންޒާރު ދިނުމާ އެކު އެ ޕުރޮވިންސުތަކުގެ އައްސޭރިފަށުގައި ދިރިއުޅޭ ގިނަ ރައްޔިތުން ވަނީ ރައްކާތެރި ހިސާބުތަކަށް ބަދަލުވެފައެވެ. ބިންހެލުމާ ގުޅިގެން ބައެއް މީހުންގެ ގެދޮރާއި ޢިމާރާތްތައް ވެއްޓި، ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބުނެވެ. އަދި، ބައެއް ސަރަޙައްދުތަކުން ކަރަންޓުގެ ޚިދުމަތް ވަނީ ކެނޑިފައެވެ. ބިންހެލުމުގެ ސަބަބުން އެއް މީޓަރުގެ ރާޅުތައް އެރި ނަމަވެސް ސުނާމީއެއްގެ ނުރައްކާ ކުރިމަތިވެފައެއް ނުވެއެވެ.
ޖަޕާނަށް އައި ބިންހެލުމާ ގުޅިގެން ރަޝިޔާގެ އައްސޭރިފަށުގައި އޮންނަ ދެ ސަރަޙައްދަކަށް ވެސް ސުނާމީއެއްގެ އަސަރު ކޮށްފާނެ ކަމުގެ އިންޒާރު ދީފައިވެއެވެ. އެެއީ، ވްލަދިވަސްތޮކާއި ނަހޯދްކާއެވެ. ބިންހެލުމާ ގުޅިގެން ޖަޕާނުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދޭން އެ ޤައުމުގެ އަސްކަރިއްޔާއިން މިހާރު ދަނީ ޙަރަކާތްތެރިވަމުންނެވެ.
ޖަޕާނުގެ ސަރުކާރުގެ ތަރުޖަމާނު ޔޮޝިމަސަ ހަޔާސީ ވިދާޅުވީ ވެއްޓުނު ޢިމާރާތްތަކުގެ ދަށުގައި ބައެއް މީހުން ތާށިވި ކަމުގެ މަޢުލޫމާތު ލިބިފައިވާ ކަމަށާއި އެ މީހުން ސަލާމަތް ކުރަން އަސްކަރިއްޔާއިން މަސައްކަތް ކުރަމުންދާ ކަމުގައެވެ. އަދި ބިންހެލުމުގައި ލިބިފައިވާ ގެއްލުންތައް ވަޒަން ކުރުމުގެ މަސައްކަތް ކުރަމުންދާ ކަމުގައި ވެސް އޭނާ ވިދާޅުވިއެވެ.
ބިންހެލުން އައި ސަރަޙައްދަށް އިތުރު ލޮޅުންތަކެއް އަންނާނެ ކަމުގެ އިންޒާރު ޖަޕާނުގެ ބިންހެލުންތަކާ ބެހޭ އިދާރާއިން ވަނީ ދީފައެވެ. ބިންހެލުން އައިތާ ކުޑަ ވަގުތުކޮޅެއް ފަހުން ނޫސްވެރިންނާ ވާހަކަފުޅު ދައްކަވަމުން ޖަޕާނުގެ ބޮޑުވަޒީރު ފުމިޔޯ ކިޝިދާ ވަނީ އެ ސަރަޙައްދަށް އިތުރު ކާރިސާތަކެއް ކުރިމަތިވެދާނެ ކަމުގެ އިންޒާރު ދެއްވާ ރައްކާތެރި ކަމުގެ ފިޔަވަޅުތައް އެޅުމަށް ރައްޔިތުންނަށް އިރުޝާދު ދެއްވާފައެވެ.
ބިންހެލުމުގެ ލޮޅުންތަކުގެ އަސަރު އިޝިކަވާއާ 500 ކިލޯމީޓަރު ދުރުގައި އޮންނަ ވެރިރަށް ތޯކްޔޯއަށް ވެސް ފޯރާފައިވާ ކަމުގައި ޖޭ.އެމް.އޭން ބުނެއެވެ. އަދި، 36,000އަށްވުރެ ގިނަ ގެޔާއި ވިޔަފާރިތަކުން ކަރަންޓުގެ ޚިދުމަތް ކެނޑިފައިވެއެވެ. ބިންހެލުމުގެ ގެއްލުންތަކުގެ ސަބަބުން އެ ސަރަޙައްދުގެ ރޭލު ދަތުރުފަތުރުގެ ޚިދުމަތް ވެސް ވަނީ މެދުކަނޑައިލާފައެވެ. މީގެ އިތުރުން، އެ ސަރަޙައްދުގެ ވައިގެ އުދުހުންތައް ވެސް އޮތީ މެދުކަނޑައިލާފައެވެ.
ޖަޕާނަށް މި ފަދަ ބާރުގަދަ ބިންހެލުމެއް އެންމެ ފަހުން އައިސްފައި ވަނީ 2011 ވަނަ އަހަރުއެވެ. އެ ބިންހެލުމުގެ ސަބަބުން އުފެދުނު ސުނާމީގައި 20,000 އެއްހާ މީހުން މަރުވިއެވެ. އަދި، ގިނަ ޢަދަދެއްެގެ ގެދޮރާއި ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބުނެވެ. އެ ބިންހެލުމާ ގުޅިގެން ފުކުޝިމާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަކަށް ބޮޑެތި ގެއްލުންތަކެއް ލިބި، ނިއުކްލިޔަރ ކާރިސާއެއް ހިނގުމުގެ ބިރު ހީވިއެވެ.