އިޓާލިއަން ލީގުގައި ރޭ ހަނި ގޮތަކަށް ރޯމާ ބަލިކޮށް، ޔުވެންޓަސްއިން ތާވަލުގެ އެއްވަނައިގައި އޮތް އިންޓަ މިލާނާ ގާތަށް ޖެހިލައިފިއެވެ.
އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވީ 1-0 ގެ ނަތީޖާއަކުންނެވެ.
މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ދެ ޓީމަށްވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބިގެންގޮސްފައެވެ. މި މެޗުގައި ފެނިގެންދިޔަ ހަމައެކަނި ލަނޑު ޔުވެންޓަސްއިން ކާމިޔާބުކޮށްފައިވަނީ ދެވަނަ ހާފު ފަށައިގެން ދެވަނަ މިނެޓުގައެވެ. ޑޫސާން ވްލާހޮވިޗުގެ އެހީއާއެކު މި ލަނޑު ޖަހައިދިނީ މިޑްފީލްޑަރު އޭޑްރިއަން ރަބިއޯއެވެ.
މި މޮޅާއެކު ޔުވެންޓަސްއިން ވަނީ ލީގުގައި ބަލިނުވެ 13 މެޗު ހަމަކޮށްފައެވެ. އެންމެ ފަހުން ލީގުގައި އެ ޓީމު ބަލިވެފައިވަނީ ސެޕްޓެމްބަރު މަހު ރަށުން ބޭރުގައި ކުޅުނު މެޗުން ސަސުއޯލޯ އަތުންނެވެ.
ރޭ ހޯދި މޮޅާއެކު ތާވަލުގެ ދެވަނައިގައި ޔުވެންޓަސް އޮތީ ކުޅުނު 18 މެޗުން ލިބުނު 43 ޕޮއިންޓާއެކުއެވެ. އެއްވަނައިގައި އިތް އިންޓަ މިލާނަށް 18 މެޗުން ވަނީ 45 ޕޮއިންޓް ލިބިފައެވެ. އަދި ރޭގެ މެޗުން ބަލިވި ރޯމާ އޮތީ ތާވަލުގެ ހަތްވަނައިގައި 18 މެޗުން ލިބުނު 28 ޕޮއިންޓާއެކުއެވެ.