އަންނަ އަހަރުގެ ފެބުރުވަރީ މަހުގެ 8 ވަނަ ދުވަހު ޕާކިސްތާނުގައި ބާއްވާ ޢާންމު އިންތިޚާބުގައި ވާދަކުރައްވަން ނަން ހުށަހަޅުއްވާފައިވާ އެ ޤައުމުގެ ކުރީގެ ބޮޑުވަޒީރު އިމްރާން ޚާންގެ ކެނޑިޑެސީ ބަލައިނުގަތުމަށް އިންތިޚާބާ ބެހޭ ކޮމިޝަނުން ނިންމައިފިއެވެ. އިންތިޚާބުގައި އޭނާ ވަނީ ދެ ދާއިރާއަކުން ވާދަ ކުރެއްވުމަށް ފޯމު ހުށަހަޅުއްވާފައެވެ.
2022 ވަނަ އަހަރު އިތުބާރު ނެތް ކަމުގެ ވޯޓެއް ނަގައި ވެރިކަމުން ދުރުކޮށްފައިވާ 71 އަހަރުގެ ކުރީގެ ކްރިކެޓް ތަރި މިހާރު ގެންދަވަނީ އޭނާއާ ދެކޮޅަށް ހުށަހަޅާފައިވާ ކޮރަޕްޝަނާ ގުޅޭ ގިނަ ދަޢުވާތަކަކާ ކޯޓުގައި ކުރިމަތިލައްވަމުންނެވެ. 2018 އިން 2022 ވަނަ އަހަރާ ދެމެދު ވެރިކަމުގައި ހުންނެވި އިރު ލިބިވަޑައިގަތް ހަދިޔާތަކަކުން ޤަވާޢިދާ ޚިލާފަށް ވިޔަފާރި ކުރެއްވުމުގެ ކުށް ސާބިތުވެ، މިދިޔަ އޮގަސްޓު މަހު އޭނާއާ ދެކޮޅަށް ތިން އަހަރުގެ ދުވަހުގެ ޖަލު ހުކުމެއް އިއްވާފައިވެއެވެ.
ކުރިއަށް އޮތް ޢާންމު އިންތިޚާބުގައި ވާދަކުރުމަށް ޚާންގެ ޝަރުޠު ހަމަނުވާ ކަމަށް އިންތިޚާބީ ކޮމިޝަނުން ކަނޑައަޅާފައި ވަނީ އޭނާއާ ދެކޮޅަށް ކޮރަޕްޝަންގެ ކުށެއް ސާބިތުވެފައިވާތީއެވެ. ދެ ދާއިރާއަކުން ވާދަ ކުރެއްވުމަށް އޭނާ ނަން ހުށަހަޅުއްވާފައި ވަނީ އެ ކަން އެނގިވަޑައިގެން ހުންނަވައެވެ.
އިންތިޚާބާ ބެހޭ ކޮމިޝަނުން ބުނީ ޚާންގެ ޝަރުޠު ހަމަނުވާ ކަމަށް ކަނޑައަޅާފައި ވަނީ، އޭނާ ކުރިމަތިލައްވާފައިވާ އެއް ދާއިރާގައި ވޯޓުލުމަށް އޭނާ ރަޖިސްޓަރީ ކޮށްފައި ނެތުމުން ކަމުގައެވެ. ނަމަވެސް، އޭނާގެ އުފަން ދާއިރާ ކަމުގައިވާ މިއާންވާލީގެ ގޮނޑިއަށް ކުރިމަތިލެއްވުމަށް ވެސް ޝަރުޠު ހަމަނުވާ ކަމަށް ކޮމިޝަނުން ވަނީ ކަނޑައަޅާފައެވެ.
މި ވަގުތު ޕާކިސްތާނުގެ އެންމެ މަޝްހޫރު ސިޔާސީ ލީޑަރުގެ ގޮތުގައި ބެލެވޭ ޚާންގެ ކެނޑިޑެސީ ބާޠިލު ކޮށްފައިވާއިރު، މިއީ ޕާކިސްތާނުގެ ބާރުގަދަ އަސްކަރިއްޔާއިން ފަހަތުގައި އޮވެގެން ހިންގާފައިވާ ޖަރީމާއެއް ކަމަށް އޭނާ ތުހުމަތު ކުރައްވައެވެ. ނަމަވެސް، އަސްކަރިއްޔާއިން މި ތުހުމަތުތައް ދޮގު ކުރެއެވެ. ހުސްވި ހަފުތާގައި ޕާކިސްތާނުގެ ހައިކޯޓުން ވެސް ވަނީ، އިންތިޚާބުތަކުގައި ވާދަ ކުރުން މަނާ ކުރުމަށް އޭނާގެ މައްޗަށް އިއްވާފައިވާ ޙުކުމް ދަމަހައްޓާފައެވެ.
ޚާންގެ ކެނޑިޑެސީ ބަލައިގަތުމަށް އިންތިޚާބީ ކޮމިޝަނުން ދެކޮޅު ހަދާފައިވާއިރު، އޭނާގެ ތަހްރީކް އިންސާފް (ޕީޓީއައި) ޕާޓީގެ ޗެއަރމަންގެ ނައިބު ޝާހް މަޙްމޫދު ޤުރައިޝީގެ ކެނޑިޑެސީ ވެސް އެ ކޮމިޝަނުން ބަލައިގަނެފައެއް ނުވެއެވެ. ނަމަވެސް، ޕާކިސްތާނުގެ ކުރީގެ ބޮޑުވަޒީރު ނަވާޒް ޝަރީފް ވެސް އިންތިޚާބުުގައި ވާދަ ކުރެއްވުމަށް ފޯމު ހުށަހަޅުއްވާފައިވާއިރު، އިންތިޚާބީ ކޮމިޝަނުން ކަނޑައަޅާފައި ވަނީ އޭނާގެ ކެނޑިޑެސީ ބަލައިގަތުމަށެވެ.
އޭނާގެ ކެނޑިޑެސީ ބަލައިގަތުމަށް ނިންމާފައި ވަނީ، އޭނާގެ މައްޗަށް ޕާކިސްތާނުގެ ކޯޓުން ކުރިން ކޮށްފައިވާ ކޮރަޕްޝަންގެ ޙުކުމްތަކެއް ކޯޓުން ބާޠިލު ކުރުމުންނެވެ. ނަމަވެސް، އެއްވެސް އިންތިޚާބެއްގައި ވާދަ ނުކުރެއްވޭނެ ކަމަށް ވެސް އޭނާގެ މައްޗަށް އޮތީ ޙުކުމް ކޮށްފައެވެ. މި ޙުކުމުގެ އިސްތިޢުނާފީ އަޑުއެހުމެއް އަންނަ ޖަނަވަރީ މަހު ބޭއްވުމަށް އޮތީ ހަމަޖައްސާފައެވެ. ޝަރީފްގެ މައްޗަށް ކޮރަޕްޝަންގެ ކުށް ސާބިތުވާ ކަމަށް އެ ޤައުމުގެ ސުޕްރީމް ކޯޓުން 2017 ވަނަ އަހަރު ޙުކުމް ކޮށްފައި ވަނީ، އޭނާގެ ދަރިކަލުންގެ ނަމުގައި ހިންގި ކުންފުންޏަކުން ލިބުނު އާމްދަނީ ހާމަ ކުރައްވާފައި ނުވާތީއެވެ.