ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ޤަތުލުއާންމުގެ މައްސަލަ އިންސާފާ ބެހޭ ބައިނަލްއަޤުވާމީ ކޯޓު (އައިސީޖޭ)އަށް ހުށަހަޅައިފިއެވެ. ޔަހޫދީން ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނަކީ ޤަތުލުއާންމެއް ކަމަށް ބުނެ އައިސީޖޭއަށް މައްސަލަ ވައްދާފައި ވަނީ ދެކުނު އެފްރިކާއިންނެވެ. އެ ޤައުމުން ހުށަހެޅި މައްސަލައިގައި ބުނެފައި ވަނީ 1948 ވަނަ އަހަރުގެ ޤަތުލުއާންމާ ބެހޭ މުއާހަދާއާ ޔަހޫދީން ޚިލާފުވަމުންދާ ކަމުގައެވެ.
އައިސީޖޭއަކީ ދަޢުލަތްތަކުގެ މެދުގައި އުފެދޭ މައްސަލަތަކުގައި ގޮތް ނިންމައި އިންސާފު ހޯދައިދޭ އދގެ އެންމެ މަތީ ކޯޓެވެ. ދެކުނު އެފްރިކާއިން ޔަހޫދީންނާ ދެކޮޅަށް ހުށަހަޅާފައި ވަނީ އެއްވެސް އޮއްޓަރެއް ހުރި މައްސަލައެއް ނޫން ކަމުގައި ޔަހޫދީން ވަނީ ބުނެފައެވެ. ނަމަވެސް، ފަލަސްޠީނުގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުވުމުގެ ޢަމުރެއް ނެރެދިނުމަށް ދެކުނު އެފްރިކާއިން ހުށަހެޅި މައްސަލައިގައި ވަނީ އެދިފައެވެ. ޔަހޫދީންގެ ޢުދުވާނާ ގުޅިގެން ފަލަސްޠީނުގެ ރައްޔިތުންނަށް އިޔާދަ ނުކުރެވޭ ވަރުގެ ގެއްލުމަކާ ކުރިމަތިވެފައިވާ ކަމުގައި ވެސް ދެކުނު އެފްރިކާއިން ހުށަހެޅި މައްސަލައިގައި ބުނެފައިވެއެވެ.
އެ މައްސަލައިގެ އަޑުއެހުންތައް ފަށާނެ ވަކި ތާރީޚެއް ނެދަރލެންޑްސްގެ ދަ ހޭގްގައި ހުންނަ އައިސީޖޭން ކަނޑައަޅާފައެއް ނުވެއެވެ. ޔަހޫދީންގެ އެ މައްސަލަ ދުނިިޔޭގެ ކޯޓަށް ހުށަހަޅާފައިވީ ނަމަވެސް އެ ކޯޓުގެ އެއްވެސް ނިންމުމަކަށް ޔަހޫދީން އިޙުތިރާމު ކުރާނެ ކަމަކަށް ނުބެލެވެއެވެ. ރަޝިޔާއިން ޔޫކްރެއިނާ ދެކޮޅަށް ކުރަމުންދާ ހަނގުރާމަ ހުއްޓައިލުމަށް 2022 ވަނަ އަހަރުގެ މާރިޗު މަހު އެ ކޯޓުން ޙުކުމް ކޮށްފައިވެއެވެ. ނަމަވެސް، ރަޝިޔާއިން ވެސް އެ ޙުކުމަށް އިޙުތިރާމު ކޮށްފައެއް ނުވެއެވެ.
ފަލަސްޠީނަކީ އައިސީޖޭގެ ފުރިހަމަ މެންބަރެއް ނޫން ނަމަވެސް އެ ކޯޓުން ވަނީ ފަލަސްޠީނަށް އޮބްޒާވަރެއްގެ މަޤާމު ދީފައެވެ. ޔަހޫދީންނާ ދެކޮޅަށް ދެކުނު އެފްރިކާއިން ދުނިޔޭގެ ކޯޓަށް މައްސަލަ ހުށަހެޅުމުން ފަލަސްޠީނުން ވަނީ އެ ކަމަށް މަރުޙަބާ ކިޔާފައެވެ. "ޔަހޫދީންގެ އިސްތިޢުމާރީ ފައުޖުގެ ނުބައިކަމުން ފަލަސްޠީނުގެ ރައްޔިތުން ސަލާމަތް ކުރަން ކޯޓުން ވަގުތުން ފިޔަވަޅު އަޅަން ޖެހޭ. އަދި، ޔަހޫދީންގެ ޢުދުވާންތައް ހުއްޓުވަން ޖެހޭ،" ފަލަސްޠީނުގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވެއެވެ.
ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާާނާ ދެކޮޅަށް ފާޅުގައި މަސައްކަތް ކުރަމުންދާ ޤައުމުތަކުގެ ތެރޭގައި ދެކުނު އެފްރިކާ ހިމެނެއެވެ. ހުސްވި ނޮވެންބަރު މަހު އެ ޤައުމުގެ ޤާނޫނު ހަދާ މަޖިލީހުން ވަނީ ޕްރިޓޯރިޔާގައި ހުންނަ ޔަހޫދީންގެ އެމްބަސީ ބަންދުކޮށް، ޔަހޫދީންގެ ދަޢުލަތާ އެކު އޮތް ސިޔާސީ ގުޅުންތައް ކަނޑައިލަން ފާސް ކޮށްފައެވެ.
ދަ ހޭގްގައި ހުންނަ ބައިނަލްއަޤުވާމީ ޖިނާޢީ ކޯޓު (އައިސީސީ)ން ވެސް ދަނީ ޣައްޒާގެ ޢުދުވާނާ ގުޅިގެން ޔަހޫދީންނާ ދެކޮޅަށް ހުށަހަޅާފައިވާ މައްސަލައެއް ބަލަމުންނެވެ. ކޯޓުން އެ މައްސަލައިގެ ތަހުޤީޤު ހިންގަމުން ދިޔަ ނަމަވެސް، ތުހުމަތު ކުރެވޭ އެއްވެސް މީހެއްގެ ނުވަތަ ފަރާތެއްގެ ނަން ހާމަ ކޮށްފައެއް ނުވެއެވެ. ޔަހޫދީ ދަޢުލަތަކީ އައިސީސީގެ މެންބަރެއް ނޫނެވެ. އަދި، ޔަހޫދީން އެ ކޯޓުގެ އިހުތިސާސް ބަލައިނުގަންނަ ކަން ވެސް ފާހަގަ ކޮށްލަން ޖެހެއެވެ.