ރަޝިޔާއިން ޔޫކްރެއިންގެ ވެރިރަށް ކީވާއި ބޮޑެތި ރަށްތަކަށް ދާދިފަހުން ދިން ވައިގެ ޙަމަލަތަަަށް އދގެ ސަލާމަތީ މަޖިލީހުގެ މެންބަރުންގެ ނުރުހުމާއި ފާޑުކިޔުން އަމާޒުވެއްޖެއެވެ. ޔޫކްރެއިންނަށް ތާޢީދު ކުރާ ޤައުމުތަކުގެ އެދުމުގެ މަތިން އދގެ ސަލާމަތީ މަޖިލީހުގެ ކުއްލި ބައްދަލުވުމެއް ބާއްވާފައިވާއިރު، 15 މެންބަރުން ހިމެނޭ މަޖިލީހުން ވަނީ ރަޝިޔާއިން އެންމެ ފަހުން ދީފައިވާ ޙަމަލަތައް ކުށްވެރި ކޮށްފައެވެ.
ރަޝިޔާ-ޔޫކްރެއިން ހަނގުރާމަ ފެށި ފަހުން ޔޫކްރެއިނަށް ދީފައިވާ އެންމެ ބޮޑު ވައިގެ ޙަމަލަތަކުގައި ޢާންމުންގެ 31 މީހުން މަރުވިއެވެ. އަދި، 160 އަށްވުރެ ގިނަ މީހުން ޒަޚަމުވިއެވެ. "2023 ވަނަ އަހަރު ނިމިގެން މި ދަނީ ޔޫކްރެއިންގެ އާންމު ރައްޔިތުންނާ ދެމުންދާ އަނިޔާތައް ނިމުމަކަށް ނުގެނެވި. އަހަރުގެ ނިމުން އެ މީހުންނާ އެ ކުރިމަތިލަނީ ބިންގަރާސްތަކުގެ ތެރެއިން. ގަދަ ފިނީގައި. ގިނަ ޢަދަދެއްގެ މީހުންގެ މަރާއެކު،" އދގެ ސެކްރެޓަރީ ޖެނެރަލްގެ ނައިބު ޚާލިދް ޚަޔާރީ ވިދާޅުވިއެވެ.
ސަލާމަތީ މަޖިލީހުގެ ބައްދަލުވުމުގައި ރަޝިޔާއަށް އެންމެ ބޮޑަށް ފާޑުކިޔުންތައް އަމާޒުކޮށްފައިވާ ޤައުމުތަކުގެ ތެރޭގައި އެމެރިކާއާއި އިނގިރޭސިވިލާތާއި ފަރަންސޭސިވިލާތް ހިމެނެއެވެ. "ސުލްޙައިގެ ބަދަލުގައި [ރަޝިޔާގެ ރައީސް ވްލަޑިމިޔަރ] ޕުޓިން އަނެއްކާ ވެސް އިސްކުރައްވާފައި ވަނީ އދގެ މެންބަރު ޤައުމަކާ ދެކޮޅަށް ޑްރޯނާއި މިސައިލް ޙަމަލަތަކެއް ދޭން،" އެމެރިކާގެ މިނިސްޓަރ-ކައުންސެލަރ ޖޯން ކެލީ ވިދާޅުވިއެވެ.
ޗައިނާއިން ރަޝިިޔާގެ ޙަމަލާތައް ކުށްވެރި ކޮށްފައެއް ނުވެއެވެ. ނަމަވެސް، ޗައިނާއިން އދއަށް ކަނޑައަޅާފައި ހުންނަވާ ސަފީރުގެ ނައިބު ޖެންގް ޝުއަންގް ވަނީ ހަނގުރާމައަށް ސިޔާސީ ޙައްލެއް ހޯދުމަށް ގޮވައިލައްވާފައެވެ. ރަޝިޔާގެ ސަފީރު ވަސީލީ ނިބިންޒިޔާ ވިދާޅުވީ ރަޝިޔާގެ ޙަމަލަތައް އަމާޒު ކޮށްފައި ވަނީ އަސްކަރީ މަރުކަޒުތަކަށް ކަމުގައެވެ. އަދި، އާންމުންގެ ބަޔަކު މަރުވެފައި ވަނީ ރަޝިޔާގެ ޙަމަލަތައް ދިފާޢު ކުރަން ޔޫކްރެއިނުން ބޭނުން ކުރި ވައިގެ ދިފާޢީ ނިޒާމުގެ މިސައިލްތަކުގެ ސަބަބުން ކަމުގައެވެ.
އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވެސް ވަނީ ރަޝިޔާގެ ޙަމަލާތައް އެންމެ ހަރުކަށި ޢިބާރާތުން ކުށްވެރި ކުރައްވާފައެވެ. "ޢާންމުން ދިރިއުޅޭ ޢިމާރާތްތަކާއި، ޢާންމުންނަށް ޒަރޫރީ ޚިދުމަތްތައް ފޯރުކޮށްދިނުމަށް ބޭނުންކުރާ ވަސީލަތްތަކަށް ޙަމަލަ ދިނުމަކީ ބައިނަލްއަޤުވާމީ އިންސާނީ ޤާނޫނުތަކާ ޚިލާފު އަމަލެއް. އެއީ، ބަލައިގަނެވޭނެ އަމަލެއް ނޫން. އެ ކަން ވަގުތުން ހުއްޓައިލަން ޖެހޭ،" ގުތެރޭޝްގެ ތަރުޖަމާނު ސްޓެފާން ދުޖަރީކް ވިދާޅުވިއެވެ.
2022 ފެބްރުވަރީ 24 ވަނަ ދުވަހު ރަޝިޔާއިން ޔޫކްރެއިނަށް އަރައި ފެށި ހަނގުރާމައިގައި އެ ޤައުމުގެ އިރުމައްޗާއި ދެކުނުގައިވާ ބައެއް ސަރަޙައްދުތަކަށް ވަނީ އަތްގަދަ ކޮށްފައެވެ. އޭގެ ތެރޭގައި އިރުމަތީގައި އޮންނަ ދޮނެޓްސްކާއި ލުހާންސްކްގެ އިތުރުން ދެކުނުގައިވާ ޒަޕޮރީޜިޔާ ހިމެނެއެވެ. ޔޫކްރެއިނުން ދަނީ އެ ސަރަޙައްދުތައް މިނިވަން ކުރަން ކައުންޓަރއޮފެންސިވެއް ނުވަތަ ރައްދު ހަމަލާގެ އަސްކަރީ ކެމްޕޭނެއް ފަށާފައެވެ.